Leiðbeinendur á sumarnámskeiðum Gróttu

Grótta auglýsir eftir einstaklingum 18 ára og eldri til að starfa sem leiðbeinendur á sumarnámskeiðum félagsins sumarið 2026

Menntunar- og hæfniskröfur

  • Umsækjendur skulu vera 18 ára og eldri (fædd 2008 og eldri).
  • Góð þjónustulund og hæfni í mannlegum samskiptum.
  • Góð fyrirmynd og heilbrigður lífsstíll.
  • Stundvísi og samviskusemi.
  • Gaman að vinna með börnum
  • Hreint sakavottorð.

Endilega sóttu um! https://alfred.is/en/starf/leidbeinendur-a-sumarnamskeidum-grottu-6

Íslandsmeistaramót – frábær árangur hjá Gróttu 💙💛

Um helgina fór fram Íslandsmeistaramót í áhaldafimleikum og Grótta átti þar fimm keppendur. 

Eldey Erla Hauksdóttir keppti í frjálsum æfingum. Sunneva Eyþórsdóttir, Sigurrós Ylfa Rúnarsdóttir og Elsa Finnsdóttir kepptu í 3. þrepi og Sigríður Lára Indriðadóttir í 2. þrepi.

Eldey Erla keppti á gólfi og slá og stóð sig frábærlega.

Sigríður Lára keppti í 2. þrepi og átti frábæran dag og hafnaði í 5. sæti í fjölþraut. Sunneva átti líka góðan keppnisdag og náði 3. sæti í fjölþraut í flokki 12 ára. Elsa og Sigurrós kepptu í flokki 11 ára og yngri og stigu báðar á pall. Elsa hafnaði í 2. sæti og Sigurrós stóð uppi sem Íslandsmeistari í sínum flokki. 

Við óskum iðkendum og þjálfurum innilega til hamingju með frábæran árangur!

Áfram Grótta 💙

✨ FJÖLSKYLDUFJÖR SUMARDAGINN FYRSTA! ✨

Fimleikadeild Gróttu býður ykkur velkomin á fjölskyldufjör sumardaginn fyrsta! 🥳

Frjáls leikur í salnum fyrir börn og foreldra 🤸‍♀️ Greitt er fyrir hvert barn og fullorðnir fylgja með. Gjaldið er 1500 kr. per barn. Hægt er að skrá sig á milli kl. 10-11 eða kl. 11-12.

Skráning fer fram í gegnum abler eða á staðnum. Þá verður ýmislegt annað skemmtilegt í boði:

• Andlitsmálning 🎨

• Litir og blöð ✏️

• Popp og candyfloss til sölu 🍿🍭

Komið og njótið yndislegrar stundar saman – fullt af gleði, leik og góðri stemningu! https://www.abler.io/shop/grotta/fimleikar?program=Q2x1YlNlcnZpY2U6NTYzODY=

Íslandsmót í áhaldafimleikum

Grótta á fimm keppendur á Íslandsmótinu í áhaldafimleikum sem fer fram hjá Ármanni um helgina.

Elsa Finnsdóttir Fenger, Sigurrós Ylfa Rúnarsdóttir og Sunneva Eyþórsdóttir keppa í 3. þrepi. Sigríður Lára Indriðadóttir keppir í 2. þrepi og Eldey Erla Hauksdóttir keppir í frjálsum æfingum.

Mótið er einn af hápunktum vetrarins í íslenskum áhaldafimleikum og spennan verður án efa mikil. Við óskum stelpunum okkar og öllum keppendum góðs gengis og hvetjum alla til að fylgjast með og styðja þær um helgina.

Áfram Grótta

Námskeið í fullorðinsfimleikum

Fimleikadeild Gróttu býður upp á 14 skipta námskeið í fullorðinsfimleikum sem hefst þriðjudaginn 3. mars og lýkur þriðjudaginn 28. apríl.

Ekki verður æfing 31. mars (páskar), 2. apríl (páskar) og 23. apríl (sumardagurinn fyrsti).

Kennt verður á þriðjudags- og fimmtudagskvöldum frá kl. 20:00–21:15 í fimleikasal Gróttu. Ekki er gerð krafa um bakgrunn í fimleikum. Hægt er að velja um að æfa einu sinni eða tvisvar í viku.

Þjálfari námskeiðsins er Guðlaugur Jón Árnason. skráning fer fram á abler: https://www.abler.io/shop/grotta?program=Q2x1YlNlcnZpY2U6NTQyODA=

Gróttumessa

Gróttumessa mun fara framm sunnudaginn 8. mars, kl. 11. Messan verður með léttu sniði, Gróttulagið verður sungið, barnakór Seltjarnarnes kirkju syngur tvö lög, krakkarnir í sunnudagaskólanum syngja tvö lög,  Gróttu fólk sér um ritningarlestur og hugleiðingu. Boðið verður upp á veitingar fyrir fólkið sem mætir.

Væri gaman að sjá sem flesta mæta í Gróttu treyjum eða peysum.💙💛

Frábær árangur hjá fimleikakonum

Íþróttahátíð Seltjarnarness fór fram þriðjudaginn 2. febrúar í hátíðarsal Gróttu þar sem afreksfólk bæjarins kom saman til að fagna glæsilegum árangri sínum á árinu 2025 og taka við verðskulduðum viðurkenningum.

Hrefna Höskuldsdóttir Rafnar, Þuríður Katrín Kristinsdóttir og Sólveig Þóra Sölvadóttir hlutu allar viðurkenningu sem efnilegar íþróttakonur. Þessar ungu fimleikakonur hafa með elju, metnaði og jákvæðu viðmóti verið félagi sínu til mikils sóma. Þær hafa jafnframt haft afar góð áhrif á andrúmsloft og menningu deildarinnar og eru fyrirmyndir innan hennar.

Fimleikadeild Gróttu óskar þeim innilega til hamingju með þennan glæsilega árangur.

Bikarmeistarar í 3. þrepi A-deild hlutu einnig viðurkenningu fyrir frábæran árangur á árinu. Bikarlið Gróttu í 3. þrepi A-deild tryggði sér 2025 bikarmeistaratitilinn með glæsilegri frammistöðu og frábærri heildarútkomu, hvorki meira né minna en 223,196 stigum.

Liðið skipuðu Mjöll Jónsdóttir, Sigurrós Ylfa Rúnarsdóttir, Þuríður Katrín Kristinsdóttir, Fanney Petrea L. Arnórsdóttir, Sigríður Lára Indriðadóttir og Sunna Mist Sheehan.

Það er jafnframt vert að nefna að Grótta var með yngsta liðið í keppninni. Fimleikadeild Gróttu óskar þeim innilega til hamingju með þennan stórkostlega árangur.

Mynd: Eyjólfur Garðarsson

Ofurhetjumót Gróttu og Colgate haldið 13.–15. febrúar

Helgina 13.–15. febrúar fór fram hið árlega Ofurhetjumót Gróttu og Colgate þar sem yfir 220 efnilegar fimleika-ofurhetjur frá fimm félögum komu saman og sýndu listir sínar. Keppt var frá 6. þrepi og upp í frjálsar æfingar og var stemningin frábær alla helgina.

Það var sannarlega ánægjulegt að fylgjast með kraftinum, gleðinni og metnaðinum hjá keppendum. Ljóst er að framtíðin er björt í íslenskum fimleikum. 

Allir keppendur fengu þátttökuverðlaun frá Colgate að móti loknu og kunnum við þeim bestu þakkir fyrir stuðninginn.

Þá viljum við einnig þakka þjálfurum og dómurum fyrir vel unnin störf, ásamt öllum þeim fjölmörgu sjálfboðaliðum sem lögðu hönd á plóg við undirbúning og framkvæmd mótsins, án ykkar væri svona viðburður ekki mögulegur.

Takk fyrir frábæra helgi, við hlökkum til næsta móts!

Myndir : Eyjólfur Garðarsson

Ofurhetjumótið 2026

Nú styttist í skemmtilegasta mót ársins, Ofurhetjumótið! 

Ofurhetjumót Gróttu verður haldið dagana 13.–15. febrúar. Við erum ofur spennt og hlökkum til að sjá ykkur öll!