Kjör íþróttafólks Gróttu 2025

Kjör íþróttafólks Gróttu 2025 fór fram síðastliðinn 3.mars. Þar voru veitt verðlaun og viðurkenningar fyrir íþróttafólk, starfsfólk og sjálfboðaliða félagsins.

Frábær mæting var á viðburðinn þar sem Gróttufólk kom saman til að fagna og veita viðurkenningar fyrir framlag til félagsins. 

Þjálfari ársins er Vala Thoroddsen.

Íþróttakona Gróttu er Ída Margrét Stefánsdóttir.

Íþróttamaður Gróttu er Antoine Óskar Pantano.

Íþróttakona æskunnar er Kristín Fríða Scheving.

Íþróttamaður æskunnar er Björgvin Brimi Andrésson.

Íþróttafólk sem keppti í fyrsta sinn fyrir Íslands hönd árið 2025 

Hannes Pétur Hauksson, U20 ára landslið karla í handbolta. Æfingaleikur gegn A-landsliði  Grænlands

Soffía Helen Sölvadóttir, U15 landslið kvenna í handbolta. Æfingaleikir gegn Færeyjum

Sylvía Sigrún Eðvarðsdóttir, U15 landslið kvenna í handbolta. Æfingaleikir gegn Færeyjum

Kristján Tómas Björnsson, U16 landslið karla í fótbolta, Æfingamót í Finnlandi

Harpa Hlíf Bárðardóttir fékk gull heiðursmerki Gróttu

Harpa frímannsdóttir fékk silfur heiðursmerki Gróttu.

Sjálfboðaliðar ársins hjá handknattleiksdeild eru Bernódus Sveinsson og Kristín Björg Svövudóttir.

Sjálfboðaliði ársins hjá knattspyrnudeild er Sigmundur Einar Másson.

Sjálfboðaliði ársins hjá fimleikadeild er Anna Kristín Kristinsdóttir.

Myndir eftir Eyjólfur Garðarsson

Ída Margrét er íþróttakona Gróttu 2025

Árlegt kjör íþróttafólks Gróttu fyrir árið 2025 fór fram á þriðjudagskvöld. Handknattleiksfólk var fyrirferðamikið á hátíðinni og meðal annars í kjöri á íþróttakonu Gróttu. Ída Margrét Stefánsdóttir var tilnefnd frá handboltanum og Lovísa Davíðsdóttir Scheving frá knattspyrnudeild. Það var síðan Ída sem hlaut titilinn íþróttakona Gróttu.

Ída Margrét er fædd árið 2002 og er rétthent skytta. Ída Margrét hóf handknattleiksiðkun sína ung að árum og kemur úr mikilli handboltafjölskyldu. Hún kom fyrst til Gróttu á láni árið 2021. Hún staldraði þó stutt við það tímabilið þar sem hún var fljótlega kölluð til baka til Vals. Frá árinu 2022 hefur hún verið lykilleikmaður Gróttuliðsins og myndar í dag fyrirliðateymi liðsins með Katrínu Helgu Sigurbergsdóttur. Ída hefur leikið 85 leiki með Gróttu.

Gróttuliðið lék í Olísdeildinni meðal bestu liða landsins á seinasta leiktímabili. Liðið féll eftir hetjulega baráttu. Grótta komst alla leið í Final4 í bikarkeppninni og mætti þar stjörnuprýddu liði Hauka. Haukakonur voru sterkari og uppskáru að lokum bikarmeistaratitilinn.

Ída er stórskytta og var markahæsti leikmaður liðsins á seinasta tímabili í Olísdeildinni. Hún hefur haldið uppteknum hætti í vetur og er langmarkahæsti leikmaður Gróttu hingað til með 7 mörk að meðaltali í hverjum leik. Auk þess er hún frábær varnarleikmaður og fyrirmynd.

Á lokahófi handknattleiksdeildar Gróttu í vor þá var Ída Margrét valin mikilvægasti leikmaður liðsins.

Ída er mikil keppnismanneskja og leggur sig ávallt alla fram í öll verkefni, tekur leiðsögn vel og getur náð enn lengra á næstu árum. Það er virkilega gleðileg tíðindi fyrir jólin að hún ákvað að framlengja samninginn sinn við Gróttu til ársins 2029.

Myndir: Eyjólfur Garðarsson

Antoine Óskar er íþróttamaður Gróttu 2025

Árlegt kjör íþróttafólks Gróttu fyrir árið 2025 fór fram í gærkvöldi. Handknattleiksfólk var fyrirferðamikið á hátíðinni og meðal annars í kjöri á íþróttamanni Gróttu. Antoine Óskar Pantano var tilnefndur frá handboltanum og Grímur Ingi Jakobsson frá knattspyrnudeild. Antoine hlaut nafnbótina íþróttamaður Gróttu árið 2025.

Antoine Óskar er fæddur árið 2006 og er að leika á sínu fjórða leiktímabili með Gróttu þrátt fyrir ungan aldur. Grótta lék fyrri hluta ársins í Olísdeildinni á meðal bestu liða landsins en liðið þurfti að bíta í það súra epli að falla niður í næstefstu deild, Grill 66-deildina eftir spennandi fallbaráttu.

Hann er mikill leiðtogi sem lýsir sér best að hann er annar af tveimur fyrirliðum meistaraflokks karla. Hann hefur skoraði 85 mörk fyrir Gróttu í vetur og leikur lykilhlutverk í varnarleik liðsins.

Antoine lét sér það ekki nægja að leika með meistaraflokki á seinasta leiktímabili því hann lék með 3.flokki karla sem gerði sér lítið fyrir og varð bikarmeistari í mars og endaði í 2.sæti Íslandsmótsins eftir framlengdan úrslitaleik. Antoine var lykilleikmaður liðsins, fyrirliði og með hæfileikum sínum gerði hann alla leikmenn í kringum sig betri.

Antoine hefur verið fastamaður í unglingalandsliðum Íslands og verið þar fyrirliði. Vegna meiðsla sem hann glímdi við á seinasta leiktímabili gat hann ekki tekið þátt í landsliðsverkefnum síðastliðið sumar. Þar stóð hæst HM í Egyptalandi í ágúst.

Antoine Óskar hefur undanfarin þrjú árin verið þjálfari yngri flokka hjá félaginu og af honum fer virkilega góður orðstír. Hann hefur verið í forgrunni fyrir mikla uppbyggingu og fjölgun í vesturbæjarstarfi yngstu flokka félagsins. Samhliða því hefur hann verið aðstoðarþjálfari hjá eldri flokkum og nú í vetur annar af þjálfurum 5.flokks karla. Hann miðlar sinni þekkingu, reynslu og leiðtogahæfileikum til yngri iðkenda félagsins.

Myndir: Eyjólfur Garðarsson

Arndís Áslaug framlengir til 2028

Arndís Áslaug Grímsdóttir hefur framlengt leikmannasamninginn sinn við Handknattleiksdeild Gróttu út tímabilið 2028. Arndís er 18 ára gömul og leikur sem línumaður. Hún hefur verið í lykilhlutverki í 3.flokki kvenna undanfarin ár en Gróttuliðið hefur ekki tapað leik á þessu leiktímabili.

Í meistaraflokki hefur Arndís komið við sögu í 10 leikjum í Grill 66-deildinni og skoraði þeim 10 mörk. Þrátt fyrir ungan aldur hefur Arndís leikið 51 leik með meistaraflokki.

Arndís er ekki bara góður sóknarlínumaður því hún er líka öflugur varnarmaður og getur leikið nokkrar stöður þar. Hún hefur æft með unglingalandsliðum Íslands undanfarin ár.

„Arndís er virkilega efnilegur leikmaður sem gaman verður að sjá taka næsta skref. Hún er öflug beggja megin vallarins og hefur sýnt það að hún er framtíðarleikmaður Gróttu“ sagði Júlíus Þórir Stefánsson þjálfari Gróttuliðsins við undirritun samningsins.

Soffía Helen skrifar undir

Markvörðurinn Soffía Helen Sölvadóttir hefur skrifað undir sinn fyrsta leikmannasamning við Handknattleiksdeild Gróttu. Soffía er 15 ára gömul og leikur sem markvörður. Hún hefur undanfarin misseri verið valin í öll yngri landslið kvenna og nú nýverið í U16 ára landsliðið.

Soffía hefur leikið alla leiki með 4.flokki og 3.flokki kvenna núna í vetur og staðið sig vel. Báðir flokkar leika í 1.deild Íslandsmótsins.

Það verður spennandi að sjá Soffíu halda áfram að bæta sig og eflast á næstu misserum.

Á myndinni má sjá Soffíu Helen með Júlíusi Þóri þjálfara meistaraflokks kvenna.

Bessi valinn í úrvalsliðið

Íslenska landsliðið skipað leikmönnum 19 ára og yngri tók í síðustu viku þátt á Opna Evrópumótinu í Svíþjóð. Gróttumaðurinn Bessi Teitsson var valinn í lokahóp liðsins og segja má að hann hafi hafi átt frábært mót líkt og íslenska liðið. Liðið komst allal leið í úrslit á mótinu en tapaði með minnsta mun gegn Spánverjum í úrslitaleik að viðstöddum 2300 áhorfendum í Scandinavium höllinni í Gautaborg. Liðið þurfti því að sætta sig við silfrið.

Að móti loknu var Bessi valinn í úrvalslið mótsins. Hann skoraði 19 mörk í mótinu.

Við óskum Bessa og U19 ára liðinu til hamingju með þennan frábæra árangur. Næsta verkefni liðsins er HM í handbolta í byrjum ágúst. Mótið fer fram í Egyptalandi. Við munum flytja fréttir af mótinu þegar að því kemur.

Lokahóf Handknattleiksdeildar Gróttu

Á föstudaginn fór fram lokahóf Handknattleiksdeildar Gróttu þar sem meistaraflokkar félagsins, þjálfarar, sjálfboðaliðar og starfsfólk kom saman og gerði upp tímabilið. Lokahófið var haldið í vallarhúsinu við Vivaldivöllinn.

Veittar voru viðurkenningar til þeirra sem sköruðu fram úr í vetur.

Meistaraflokkur kvenna
Mikilvægasti leikmaður – Ída Margrét Stefánsdóttir
Efnilegasti leikmaður – Katrín Arna Andradóttir
Besti leikmaður – Karlotta Óskarsdóttir

Ungmennalið karla
Mikilvægasti leikmaður – Sigurður Finnbogi Sæmundsson
Besti leikmaður – Gísli Örn Alfreðsson

Meistaraflokkur karla
Stríðsmaðurinn – Antoine Óskar Pantano
Efnilegasti leikmaður – Bessi Teitsson
Besti leikmaður – Jakob Ingi Stefánsson

Þeir leikmenn sem höfuð náð leikjaáföngum voru verðlaunaðir en það voru:

50 leikir fyrir Gróttu
Antoine Óskar Pantano (63 leikir)
Anna Karólína Ingadóttir (51 leikur)
Ágúst Ingi Óskarsson (51 leikur)
Edda Steingrímsdóttir (64 leikir)
Elvar Otri Hjálmarsson (71 leikur)
Gunnar Hrafn Pálsson (52 leikir)
Jón Ómar Gíslason (52 leikir)
Kári Kvaran (51 leikur)
Þóra María Sigurjónsdóttir (52 leikir)

100 leikir fyrir Gróttu
Katrín Anna Ásmundsdóttir (122 leikir)
Lilja Hrund Stefánsdóttir (107 leikir)

Við óskum þessum verðlaunahöfum til hamingju og hlökkum til að sjá þá og liðin okkar aftur í haust í Grill 66-deildinni.

Meistaraflokkur kvenna
Karlotta Óskarsdóttir – Ída Magrét Stefánsdóttir – Katrín Arna Andradóttir

Meistaraflokkur karla
Bessi Teitsson – Jakob Ingi Stefánsson – Antonie Óskar Pantano

Ungmennalið karla
Gísli Örn Alfreðsson – Sigurður Finnbogi Sæmundsson

Góð stemning á Kynningarkvöldi

Mikill fjöldi og góð stemning var á Kynningarkvöldi Gróttu sem fram fór í kvöld í Hátíðarsal Gróttu. Þar hlýddu gestir á þjálfara meistaraflokkanna, þá Róbert Gunnarsson og Sigurjón Friðbjörn Björnsson fara yfir leikmannahópana, hvernig undirbúningurinn hefur verið og markmið fyrir veturinn.

Ólafur Finnbogason formaður Handknattleiksdeildar Gróttu ræddu hin ýmsu mál og kynnti breytt úrval árskorta sem eru komin í sölu á Stubbur appinu. Nýr og glæsilegur keppnisbúningur var frumsýndur og var Einar Örn Jónsson fjölmiðlamaður með létta tölu um Gróttu.

Kvöldið heppnaðist frábærlega og var góð stemning á meðal stuðningsfólks. Fyrstu eikir meistaraflokkanna okkar eru á laugardaginn þegar fyrsta Gróttutvenna tímabilsins fer fram.

Grótta – ÍBV kl. 14:00 / Mfl. kvenna

Grótta – KA kl. 16:15 / Mfl. karla

Fjölmennum og styðjum Gróttu til sigurs !

Óli í Gróttu

Hafsteinn Óli Berg Ramos Rocha hefur skrifað undir tveggja ára samning við Handknattleiksdeild Gróttu. Hafsteinn Óli, eða Óli eins og hann er kallaður kemur úr herbúðum HK þar sem hann hefur leikið undanfarin þrjú árin. Óli lék eitt tímabil með Aftureldingu en er uppalinn hjá Fjölni í Grafarvogi. Þar var hann hluti af sigursælum 2000-árgangi sem urðu meðal annars bikar- og Íslandsmeistarar í 3.flokki.

Óli er hávaxinn og er örvhentur. Hann eykur breidd Gróttuliðsins hægra megin á vellinum en hann muna deila stöðunni með Ara Pétri Eiríkssyni.

Óli lék með öllum yngri landsliðum Íslands og var til dæmis hluti af U18 ára landsliðinu sem fékk silfur á EM í Króatíu.

„Það eru góð tíðindi að Óli sé kominn á Nesið. Það býr mikið í honum enda hæfileikaríkur leikmaður. Það er ekki eingöngu mikil skotógn af honum, heldur er hann afbragðs varnarmaður. Ég hlakka mikið til að vinna með honum á næstu tímabilum“, sagði Róbert Gunnarsson þjálfari Gróttuliðsins þegar samningar voru í höfn.

Vertu velkominn í blátt, Óli !

Á myndinni má sjá Hafstein Óla með Hörpu Guðfinnsdóttur stjórnarkonu í stjórn Handknattleiksdeildar Gróttu.

Mynd: Eyjólfur Garðarsson

Íslenska U20 ára landsliðið í 7.sæti

Íslenska U20 ára landsliðið með okkar stelpum, Önnu Karólínu Ingadóttur og Katrínu Önnu Ásmundsdóttur innanborð gerði sér lítið fyrir og endaði í 7.sæti á HM. Mótið var haldið í Norður-Makedóníu og stóðu okkar leikmenn sig vel.

Íslenska liðið vann riðilinn sinn og komst í milliriðla með full hús stiga. Þar unnu þær íslensku Svartfjallaland en töpuðu gegn Portúgal. Með þeim úrslitum voru andstæðingar íslenska liðsins Ungverjaland í 8 liða úrslitum. Ungverjar eru ríkjandi Evrópumeistarar og því um erfiða leik að ræða. Okkar stelpur létu það lítið á sig fá og fór leikurinn í framlengingu. Ungverjar voru sterkari þar og mætti því íslenska liðið Svíum í krossspili um 5. – 8.sæti. Þar voru Svíar sterkari og mætti íslenska liðið því Svisslendingum um 7.sæti mótsins. Íslenska liðið sýndi mátt sinn og megin og vann 29-26 í miklum baráttuleik.

Þessi árangur, 7.sæti á HM er besti árangur sem kvennalandslið hefur náð frá upphafi. Við erum stolt af árangri liðsins og ekki síst okkar leikmanna, Önnu Karólínu Ingadóttur og Katrínar Önnu Ásmundsdóttur sem léku vel fyrir liðið. Þessi reynsla mun án efa hjálpa þessum efnilegum leikmönnum til frekari afreka og hjálpa Gróttuliðinu í Olísdeildinni í haust.

Til hamingju leikmenn og þjálfarar !