Author: Andri Sigfússon

Magnús Karl Magnússon hefur verið ráðinn yfirþjálfari Handknattleiksdeildar Gróttu til næstu tveggja ára. Hann tekur við því öfluga starfi sem Maksim Akbachev hefur sinnt undanfarin ár við að leiða uppbyggingu handboltans í Gróttu í samvinnu við stjórn, verkefnastjóra og þjálfara deildarinnar.

Magnús Karl er uppalinn Eyjamaður og spilaði handbolta með ÍBV. Hann hefur sinnt handknattleiksþjálfun hjá yngri flokkum ÍBV og Vals sem og styrktarþjálfun.
Magnús Karl er íþróttafræðingur að mennt og með MSc. í íþróttasálfræði. Þá heldur hann úti heimasíðunni andlegurstyrkur.is og hjálpar íþróttafólki að vinna að markmiðum sínum.

Það er mikil tilhlökkun hjá stjórn Barna-og unglingaráðs Gróttu fyrir komandi tímabilum með Magnús Karl við stjórnina enda á ferðinni metnaðarfullur og kraftmikill þjálfari.

Við óskum Magnúsi Karli til hamingju með nýja hlutverkið og bjóðum hann hjartanlega velkominn í Gróttu

Á miðvikudaginn fór fram lokahóf Handknattleiksdeildar Gróttu þar sem meistaraflokkar félagsins, þjálfarar, sjálfboðaliðar og starfsfólk kom saman og gerði upp tímabilið. Lokahófið var haldið í Hátíðarsal Gróttu.

Veittar voru viðurkenningar til þeirra sem sköruðu fram úr í vetur.

Meistaraflokkur kvenna

Mikilvægasti leikmaður – Katrín Helga Sigurbergsdóttir
Efnilegasti leikmaður – Katrín Anna Ásmundsdóttir
Besti leikmaður – Ída Margrét Stefánsdóttir

Ungmennalið karla

Mikilvægasti leikmaður – Sigurður Finnbogi Sæmundsson
Besti leikmaður – Ari Pétur Eiríksson

Meistaraflokkur karla

Mikilvægasti leikmaður – Einar Baldvin Baldvinsson
Stríðsmaðurinn – Hannes Grimm
Besti leikmaður – Birgir Steinn Jónsson

Þeir leikmenn sem höfuð náð leikjaáföngum fengu verðlaun en það voru:

50 leikir fyrir Gróttu
Andri Þór Helgason (68 leikir)
Birgir Steinn Jónsson (65 leikir)
Ísak Arnar Kolbeins (54 leikir)
Lilja Hrund Stefánsdóttir (59 leikir)
Lúðvík Thorberg Arnkelsson (62 leikir)

100 leikir fyrir Gróttu
Anna Katrín Stefánsdóttir (103 leikir)
Ágúst Emil Grétarsson (109 leikir)
Katrín Helga Sigurbergsdóttir (116 leikir)
Rut Bernódusdóttir (105 leikir)
Þorgeir Bjarki Davíðsson (102 leikir)

Við óskum þessum verðlaunahöfum til hamingju og hlökkum til að sjá þá og liðin okkar aftur í haust í Olísdeildinni, Grill 66-deildinni og 2.deild karla.

Ída Margrét, Katrín Anna og Katrín Helga

Sigurður Finnbogi og Ari Pétur

Einar Baldvin, Birgir Steinn og Hannes Grimm

Lúðvík Thoberg, Þorgeir Bjarki, Birgir Steinn, Andri Þór, Ísak Arnar og Ágúst Emil

Lilja Hrund, Rut, Katrín helga og Anna Katrín

Markvörðurinn Soffía Steingrímsdóttir hefur samið við Gróttu til næstu þriggja ára. Soffíu þekkir allt Gróttufólk enda uppalin í félaginu og leikið með Gróttu til fjölda ára. Seinasta haust skipti Soffía yfir í Fram en kom til baka á láni seinni hluta tímabilsins og stóð sig frábærlega.

Soffía er fædd árið 2000 og þrátt fyrir ungan aldur hefur hún leikið 123 leiki fyrir Gróttu.

„Það eru frábærar fréttir að Soffía verði hjá okkur næstu þrjú árin enda frábær markvörður með mikla reynslu. Soffía er auk þess mikill karakter sem við bindum miklar vonir við að verði í lykilhlutverki við atlöguna að Olísdeildarsæti á næsta tímabili“, sagði Sigurjón Friðbjörn Björnsson þegar samningar voru í höfn.

Handknattleiksdeild Gróttu hefur gert samninga við Daðeyju Ástu Hálfdánsdóttur og Tinnu Valgerði Gísladóttur um að þær leiki með félaginu næstu tvö árin.

Tinna Valgerður kemur aftur á Nesið eftir tveggja ára dvöl í Fram. Tinna er fædd árið 2000 og er uppalin í Gróttu. Hún er örvhent og leikur sem skytta og hornamaður. Tinna skoraði 38 mörk með Olísdeildarliði Fram síðastliðinn vetur.

Daðey Ásta kemur einnig úr Fram þar sem hún er uppalin. Daðey Ásta er fædd árið 2002 og er fjölhæfur leikmaður. Auk þess er hún afbragðs varnarmaður. Daðey lék bæði með Olísdeildarliði Fram síðastliðinn vetur þar sem hún gerði 8 mörk en einnig umgmennaliði Fram í Grill 66-deildinni þar sem hún skoraði 46 mörk.

Það er mikill hvalreki fyrir Gróttu að þessir leikmenn komi til félagsins. „Ég er himinlifandi með að Tinna komi til baka til félagsins og að Daðey söðli um og skipti yfir í Gróttu. Báðir leikmennirnir styrkja Gróttuliðið mikið og eru miklir karakterar. Þær smellpassa í liðið og það verður gaman að sjá þær í Gróttubúningnum í haust“, sagði Sigurjón Friðbjörn Björnsson við undirritun samninganna.

Mynd: Eyjólfur Garðarsson

Ída Margrét Stefánsdóttir hefur skrifað undir þriggja ára samning við Handknattleiksdeild Gróttu. Ída Margrét hefur verið á láni hjá okkur frá Val í vetur en skiptir nú varanlega yfir til Gróttu.

Ída er 21 árs gömul og leikur sem vinstri skytta. Hún hefur komið eins og stormsveipur inn í Gróttuliðið og leikur lykilhlutverk með liðinu á báðum endum vallarins. Ída hefur skorað 89 mörk fyrir félagið í vetur.

„Það eru mikil gleðitíðindi að Ída semji við okkur til þriggja ára. Hún er gríðarlega öflug skytta. Það eru miklar vonir bundnar við að hún eigi eftir dafna enn frekar sem leikmaður á næstu misserum og hjálpa liðinu að tryggja sig meðal bestu liða landsins“, sagði Sigurjón Friðbjörn Björnsson þjálfari liðsins við undirritunina.

Á næstu dögum má búast við frekari fréttum af leikmannamálum liðsins.

Mynd: Eyjólfur Garðarsson

Í dymbilvikunni fyrir páska mun Handknattleiksdeild Gróttu standa fyrir páskanámskeiði í handbolta. Æfingarnar fara fram 3. – 5.apríl og verða frá kl. 09:00-12:00. Æfingunum verður skipt upp eftir eldri og er krakkarnir beðnir um að koma með nesti.

Þjálfarar á námskeiðinu er þjálfarar Gróttu og leikmenn meistaraflokkanna.

Skráning fer fram í Sportabler: https://www.sportabler.com/shop/grotta/handbolti

Hægt er að skrá sig alla dagana eða einn og einn dag.

Grótta var með tvö lið í úrslitum Powerade-bikars HSÍ helgina 17. – 19.mars. 6.flokkur karla yngri lék gegn Haukum og 5.flokkur kvenna eldri lék gegn Val.

6.flokkur karla yngri
Eftir virkilega flottan leik voru það Haukar sem unnu með minnsta mögulega mun, 9-10 í úrslitaleik bikarsins hjá 6.flokki karla yngri. Strákarnir okkar stóðu sig vel og geta heldur betur verið sáttir með sinn leik þó að andstæðingurinn hafi verið sterkari í dag.

5.flokkur kvenna eldri
Stelpurnar í 5. flokki kvenna eldri tóku þátt í úrslitleik í Powerade-bikarnum gegn sterku Valsliði í gær. Mikið jafnræði var með liðunum í fyrri hálfleiknum og var aðeins tveggja marka munur í hálfleik. Gróttustelpur náðu ekki að fylgja eftir góðum fyrri hálfleik og vann Valur með sjö marka mun, 13-20. Stelpurnar stóðu sig frábærlega og var þetta gríðarlega skemmtileg upplifun og reynsla fyrir þær.

Sannarlega frábærir krakkar sem eru í yngri flokkum Gróttu.

9.flokks æfingarnar hefja göngu sína aftur í janúar. Fyrsta æfingin er laugardaginn 7.janúar. 30 krakkar á leikskólaaldri tóku þátt á haustönninni og lærðu undirstöðuatriðin í handbolta með skemmtilegum leikjum og æfingum undir stjórn þjálfara flokksins, þeirra Arndísar Maríu Erlingsdóttur, Írisar Bjarkar Símonardóttur og þeirra góða aðstoðarfólks.

Continue reading

Dagana 16. – 18.desember fóru fram æfingar hjá yngri landsliðum HSÍ. Við hjá Gróttu getum verið virkilega ánægð með okkar hlutskipti en samtals áttum við fimm leikmenn í æfingahópum helgarinnar. Þessi voru boðuð:

U19 ára landslið kvenna
Katrín Anna Ásmundsdóttir

U17 ára landslið kvenna
Dóra Elísabet Gylfadóttir

U16 ára landslið kvenna
Arndís Áslaug Grímsdóttir
Elísabet Ása Einarsdóttir

U17 ára landslið karla
Antoine Óskar Pantano

Við óskum leikmönnunum okkar hjartanlega til hamingju með valið og vonum að þetta eigi eftir nýtast þeim í komandi verkefnum, bæði hjá Gróttu og HSÍ.

Barna- og unglingaráð Handknattleiksdeildar Gróttu gaf á dögunum öllum markmönnum yngri flokka höfuðhlífar sem notaðar verða á æfingum og leikjum. Hlífarnar eru frá fyrirtækinu SecureSport.

Með þessum kaupum eykst öryggi markvarðanna okkar til muna við höfuðhöggum.

Á myndinni má sjá kampakáta markverði 3. og 6.flokks hjá félaginu með nýju hlífarnar sínar.