Kjartan Kári á úrtaksæfingum U19 ára landsliðsins

Gróttumaðurinn Kjartan Kári Halldórsson er einn af þeim sem Ólafur Ingi Skúlason, landsliðsþjálfari U19 karla, hefur valið til að taka þátt í úrtaksæfingum 21.-23. febrúar 🙌🏼💙

Æfingarnar fara fram í Skessunni í Hafnarfirði. Liðið undirbýr sig fyrir milliriðla í undankeppni EM 2022, en þar er Ísland í riðli með Rúmeníu, Georgíu og Króatíu og fer riðillinn fram dagana 23.-29. mars.

Aufí, Rebekka og Sara í Hæfileikamótun KSÍ

Gróttustelpurnar Sara Björk Arnarsdóttir, Rebekka Sif Brynjarsdóttir og Arnfríður Auður Arnarsdóttir hafa verið valdar til að taka þátt í Hæfileikamótun KSÍ. Við óskum stelpunum til hamingju með valið og góðs gengis!
Grótta er hreykið af því að eiga svona flotta fulltrúa í þessum hóp 👏🏼💙

Lilja Lív og Lilja Scheving á úrtaksæfingum U17 ára landsliðsins

 Gróttukonurnar Lilja Lív Margrétardóttir og Lilja Davíðsdóttir Scheving eru í hóp U17 ára landsliðsins sem æfir saman dagana 10.-12. janúar. Knattspyrnudeild Gróttu er stolt af því að eiga glæsilega fulltrúa félagsins í þessum hóp. 
Næsta verkefni U17 kvenna eru milliriðlar undankeppni EM 2022. Ísland er þar í riðli með Írlandi, Finnlandi og Slóvakíu og verður leikið á Írlandi 23.-29. mars. 

8 leikmenn valdir í unglingalandslið HSÍ

8 leikmenn frá okkur voru valin í unglingalandslið HSÍ núna fyrir helgi. Strákarnir Alex Kári Þórhallsson, Antoine Óskar Pantano og Hannes Pétur Hauksson voru valdir í U16 ára landsliðið. Stelpurnar Arndís Áslaug Grímsdóttir, Dóra Elísabet Gylfadóttir, Elísabet Ása Einarsdóttir, Helga Sif Bragadóttir og Margrét Lára Jónsdóttir voru valdar í U15 ára landsliðið.

Við óskum þessum iðkendum okkar hjartanlega til hamingju með valið. Landsliðin æfa á höfuðborgarsvæðinu í byrjun janúar auk þess sem haldið verður áfram með fyrirlestraröðina Afreksmaður framtíðarinnar. Þar fá yngri landsliðið fræðslu sem nýtist þeim jafnt innan vallar sem utan.

Mynd að ofan: Margrét Lára Jónsdóttir

Dóra Elísabet Gylfadóttir

Helga Sif Bragadóttir

Arndís Áslaug Grímsdóttir

Elísabet Ása Einarsdóttir

Antoine Óskar Pantano

Alex Kári Þórhallsson

Hannes Pétur Hauksson

Katrín Anna með U18 landsliðinu í Serbíu

U-18 ára landslið kvenna lék í Belgrad í Serbíu 22 – 25.nóvember síðastliðinn á umspilsmóti um sæti í A-keppni Evrópumóts kvenna í þessum aldurshópi á næsta ári. Katrín Anna Ásmundsdóttir leikmaður meistara- og 3.flokks var okkar fulltrúi í landsliðinu.

Stelpurnar unnu Slóveníu 24-21 í fyrsta leik og síðan Slóvakíu í öðrum leik 29-26. Því miður tapaðist úrslitaleikurinn við Serba stórt, 31-20. Okkar leikmaður Katrín Anna Ásmundsdóttir stóð sig vel á mótinu.

Katrín Anna hefur verið fastamaður í þessu landsliði undanfarin ár. Gríðarleg reynsla og tækifæri sem Katrín Anna fær í landsliðinu sem vonandi nýtist Gróttu næstu misseri.

Hákon kallaður inn í A-landsliðið og Orri Steinn í U-21

Gróttumenn gera það gott! Hákon kallaður inn í A-landsliðið og Orri Steinn í U-21 🇮🇸

Hinn 17 ára gamli Orri Steinn Óskarsson var kallaður inn í U21 árs landsliðið í gær en liðið spilaði við Liechtenstein í dag. Þar hitti Orri sinn fyrrum liðsfélaga hjá Gróttu, en Hákon Rafn Valdimarsson var milli stanganna hjá U21 árs landsliðinu í 3-0 sigri. Hákon var í byrjunarliði liðsins en Orri Steinn kom við sögu sem varamaður og lék sinn fyrsta landsleik með U21 ára liðinu. Það er skammt stórra högga á milli, en eftir leikinn var tilkynnt að Hákon Rafn Valdimarsson hefði verið kallaður inn í A-landsliðið. Hákon verður því í íslenska landsliðshópnum í leiknum gegn Norður-Makedóníu á sunnudag.
Geggjaðir 🙌🏼💙

5.flokkur á Eyjablikksmót

Helgina 8. – 10. október fór eldra árið í 5.flokki kvenna og karla til Vestmannaeyja og spiluðu á sínu fyrsta Íslandsmóti. Strákarnir tefldu fram einu liði en stelpurnar tveimur liðum. Ferðin heppnaðist vel bæði handboltalega séð og félagslega séð.

Stelpurnar mættu ferskar og spenntar í fyrstu leikina á föstudeginum. Lið 1 lék gegn HK en því miður tapaðist sá leikur. Lið 2 spiluðu gegn Fram og náðu í jafntefli eftir að hafa verið undir meirihluta leiksins. Á laugardeginum spiluðu bæði lið tvo leiki. Lið 1 gerði jafntefli gegn Fram og unnu síðan Stjörnuna. Lið 2 áttu fyrsta leik gegn Haukum sem voru mun sterkari og tapaðist sá leikur. Seinni leikurinn var gegn FH og unnu þær flottan sigur. Á sunnudeginum átti lið 1 erfiðan leik fyrir höndum gegn Val og unnu þær okkur stúlkur sem börðust hins vegar allt til loka leiks. Lið 2 spilaði sinn síðasta leik gegn sterku liði Selfoss og tapaðist sá leikur eftir mikla baráttu hjá okkar stúlkum.

Strákarnir spiluðu tvo leiki á föstudeginum. Fyrri leikurinn var við Aftureldingu og byrjuðu strákarnir af miklum krafti og voru þremur mörkum yfir í lok fyrri hálfleiks. Síðari hálfleikur gekk brösulega og fóru Afturelding með sigur úr leiknum. Seinni leikurinn var við Selfoss þar sem leikurinn var hnífjafn en endaði með sigri Selfyssinga. Á laugardeginum mættu strákarnir Fram í fyrsta leik og voru strákarnir greinilega ekki tilbúnir í þá baráttu. Seinni leikurinn var við ÍBV og sá leikur hnífjafn frá fyrstu mínutu, strákarnir spiluðu feikilega vel sóknarlega og endaði leikurinn með þriggja marka sigri Gróttu.

Á laugardagskvöldinu fór fram kvöldvaka og hluti af henni var leikur landsliðsins gegn pressuliðinu og áttum við einn strák í pressuliðinu; Arnar Magnús Andrason og tvær stúlkur; Sara Kristjánsdóttir og Arnfríður Auður Arnarsdóttir. Okkar fulltrúar stóðu sig feikivel í leikjunum.

Þessi ferð á Eyjablikksmótið skildi eftir sig góðar minningar og vonandi halda krakkarnir áfram að bæta sig í handboltanum eins og þeir hafa gert hingað til.

Þjálfarar strákanna eru Andri Þór Helgason og Hannes Grimm. Þjálfarar stelpnanna eru Davíð Örn Hlöðversson og Patrekur Pétursson Sanko.

Sara Kristjánsdóttir og Arnfríður Auður Arnarsdóttir

Arnar Magnús Andrason

Þrír í U16 ára landsliðinu

Helgina 5. – 7.nóvember æfir U16 ára landslið karla undir stjórn Heimis Arnar Árnasonar og Hrannars Guðmundssonar þjálfara liðsins.

Við eigum þrjá fulltrúa í þeim hópi, þá Alex Kára Þórhallsson, Antoine Óskar Pantano og Hannes Pétur Hauksson.

Við óskum strákunum til hamingju með valið og góðs gengis á æfingunum.

Arnfríður Auður í Hæfileikamótun KSÍ

Arnfríður Auður Arnarsdóttir er í hóp leikmanna sem hafa verið valdir til að taka þátt á æfingum í Hæfileikamótun stúlkna dagana 27.-29. október 2021.

Æfingarnar fara fram í Skessunni í Kaplakrika í Hafnarfirði og hafa hafa 64 stúlkur frá félögum víðs vegar af landinu verið boðaðar til æfinga.

Grótta er hreykið af því að eiga fulltrúa í þeim hóp og óskar Aufí góðs gengis á æfingunum!