Yfirþjálfari grunnhópa

Grunnhópar Gróttu eru ætlaðir börnum á aldrinum 5–7 ára. Markmið starfsins er að vekja og viðhalda áhuga barnanna á fimleikum ásamt því að efla þol, snerpu, styrk, liðleika og samhæfingu í jákvæðu og hvetjandi umhverfi.

Við leitum að metnaðarfullum og jákvæðum einstaklingi sem hefur gaman af því að starfa með ungum börnum og hefur áhuga á að leiða og styðja öflugt þjálfarateymi grunnhópa.

Starfið felur í sér yfirumsjón með starfsemi grunnhópa, skipulag æfinga og stuðning við þjálfara. Starfshlutfall er eftir samkomulagi.

Reynsla af fimleikaþjálfun og starfi með börnum er kostur, en við leggjum einnig mikla áherslu á frumkvæði, sjálfstæði, jákvæðni og góða samskiptahæfni.

Áhugasamir eru hvattir til að hafa samband við okkur á [email protected].

Yfirþjálfari stubbafimi

Við leitum að yfirþjálfara í Stubbafimi!

 
Stubbafimi er fyrir yngstu iðkendur okkar, 1–4 ára. Markmið Stubbafimi er að kynna börnum fimleika í gegnum leik í öruggu, jákvæðu og gleðilegu umhverfi.
 
Við leitum að metnaðarfullum og jákvæðum einstaklingi sem hefur gaman af því að starfa með ungum börnum. Starfið felur í sér að hafa umsjón með og skipuleggja æfingar fyrir okkar yngstu iðkendur. Um er að ræða hlutastarf (16 skipta námskeið) á vorönn. Kennt er á laugardags- og sunnudagsmorgnum.
 
Reynsla af starfi með ungum börnum er kostur en fyrst og fremst leitum við að einstaklingi með áhuga, frumkvæði og góða nærveru með börnum. Áhugasamir eru hvattir til að hafa samband við okkur.
 
Umsóknir og fyrirspurnir sendist á netfangið [email protected].

Leiðbeinendur á sumarnámskeiðum Gróttu

Grótta auglýsir eftir einstaklingum 18 ára og eldri til að starfa sem leiðbeinendur á sumarnámskeiðum félagsins sumarið 2026

Menntunar- og hæfniskröfur

  • Umsækjendur skulu vera 18 ára og eldri (fædd 2008 og eldri).
  • Góð þjónustulund og hæfni í mannlegum samskiptum.
  • Góð fyrirmynd og heilbrigður lífsstíll.
  • Stundvísi og samviskusemi.
  • Gaman að vinna með börnum
  • Hreint sakavottorð.

Endilega sóttu um! https://alfred.is/en/starf/leidbeinendur-a-sumarnamskeidum-grottu-6

Íslandsmeistaramót – frábær árangur hjá Gróttu 💙💛

Um helgina fór fram Íslandsmeistaramót í áhaldafimleikum og Grótta átti þar fimm keppendur. 

Eldey Erla Hauksdóttir keppti í frjálsum æfingum. Sunneva Eyþórsdóttir, Sigurrós Ylfa Rúnarsdóttir og Elsa Finnsdóttir kepptu í 3. þrepi og Sigríður Lára Indriðadóttir í 2. þrepi.

Eldey Erla keppti á gólfi og slá og stóð sig frábærlega.

Sigríður Lára keppti í 2. þrepi og átti frábæran dag og hafnaði í 5. sæti í fjölþraut. Sunneva átti líka góðan keppnisdag og náði 3. sæti í fjölþraut í flokki 12 ára. Elsa og Sigurrós kepptu í flokki 11 ára og yngri og stigu báðar á pall. Elsa hafnaði í 2. sæti og Sigurrós stóð uppi sem Íslandsmeistari í sínum flokki. 

Við óskum iðkendum og þjálfurum innilega til hamingju með frábæran árangur!

Áfram Grótta 💙

✨ FJÖLSKYLDUFJÖR SUMARDAGINN FYRSTA! ✨

Fimleikadeild Gróttu býður ykkur velkomin á fjölskyldufjör sumardaginn fyrsta! 🥳

Frjáls leikur í salnum fyrir börn og foreldra 🤸‍♀️ Greitt er fyrir hvert barn og fullorðnir fylgja með. Gjaldið er 1500 kr. per barn. Hægt er að skrá sig á milli kl. 10-11 eða kl. 11-12.

Skráning fer fram í gegnum abler eða á staðnum. Þá verður ýmislegt annað skemmtilegt í boði:

• Andlitsmálning 🎨

• Litir og blöð ✏️

• Popp og candyfloss til sölu 🍿🍭

Komið og njótið yndislegrar stundar saman – fullt af gleði, leik og góðri stemningu! https://www.abler.io/shop/grotta/fimleikar?program=Q2x1YlNlcnZpY2U6NTYzODY=

Íslandsmót í áhaldafimleikum

Grótta á fimm keppendur á Íslandsmótinu í áhaldafimleikum sem fer fram hjá Ármanni um helgina.

Elsa Finnsdóttir Fenger, Sigurrós Ylfa Rúnarsdóttir og Sunneva Eyþórsdóttir keppa í 3. þrepi. Sigríður Lára Indriðadóttir keppir í 2. þrepi og Eldey Erla Hauksdóttir keppir í frjálsum æfingum.

Mótið er einn af hápunktum vetrarins í íslenskum áhaldafimleikum og spennan verður án efa mikil. Við óskum stelpunum okkar og öllum keppendum góðs gengis og hvetjum alla til að fylgjast með og styðja þær um helgina.

Áfram Grótta

Námskeið í fullorðinsfimleikum

Fimleikadeild Gróttu býður upp á 14 skipta námskeið í fullorðinsfimleikum sem hefst þriðjudaginn 3. mars og lýkur þriðjudaginn 28. apríl.

Ekki verður æfing 31. mars (páskar), 2. apríl (páskar) og 23. apríl (sumardagurinn fyrsti).

Kennt verður á þriðjudags- og fimmtudagskvöldum frá kl. 20:00–21:15 í fimleikasal Gróttu. Ekki er gerð krafa um bakgrunn í fimleikum. Hægt er að velja um að æfa einu sinni eða tvisvar í viku.

Þjálfari námskeiðsins er Guðlaugur Jón Árnason. skráning fer fram á abler: https://www.abler.io/shop/grotta?program=Q2x1YlNlcnZpY2U6NTQyODA=