Flokkur: Almennt

Davíð B. Gíslason verður lagður til hinstu hvílu í dag. Hann lést á heimili sínu í lok janúar eftir erfið veikindi. Fjöldi ættingja, vina og samstarfsfélaga minnast Davíðs í minningargreinum Morgunblaðsins í dag og næstu daga. Davíð starfaði innan Gróttu frá 12 ára aldri. Fyrst sem iðkandi og síðar leikmaður meistaraflokks í handbolta um árabil. Hann kom einnig að starfinu sem þjálfari, dómari, stjórnarmaður, foreldri, fararstjóri og stuðningsmaður.Íþróttafélagið Grótta færir fjölskyldu Davíðs einlægar samúðarkveðjur með djúpri þökk fyrir ómetanlegt starf Davíðs á liðnum árum. Minningin um frábæran félaga mun lifa.

Skrifstofa Gróttu lokar kl. 13:00 á morgun, föstudaginn 11. febrúar vegna jarðarfarar Davíðs B. Gíslasonar.
Skrifstofan opnar aftur mánudaginn 14. febrúar kl. 13:00.

Svo óvænt er komið að leiðarlokum fallinn er frá einstakur Gróttumaður Davíð B. Gíslason, eftir harða baráttu við illvígan sjúkdóm.
Þegar fólk fellur frá í blóma lífsins, fyrirvaralaust, er okkur sem eftir lifum oft orða vant. Okkur verður oft starsýnna á það sem ekki varð fullgert, fremur en það góða og mikla dagsverk, sem unnið var. Davíð lifði góða ævi og lét margt gott af sér leiða, bæði með fjölskyldu sinni og í daglegum störfum sínum en ekki síður í margvíslegum félagsstörfum fyrir Gróttu. Davíð var um árabil óþreytandi í öllu starfi félagsins. Hann hóf handboltaiðkun tólf ára gamall og einungis fimmtán ára var hann farinn að æfa með meistaraflokki félagsins sem hann lék með lék alla tíð ef frá eru talin tvö keppnistímabil þegar hann lék með Fram. Lék hann með Gróttu allt þar til hann varð fertugur. Davíð spilaði jafnframt með öllum yngri landsliðum Íslands.

Auk þess að vera leikmaður Gróttu sinnti hann margvíslegum félagsstörfum fyrir félagið. Davíð sat m.a. í stjórn handknattleiksdeildar Gróttu/KR árin 2003-2004 og aftur í stjórn handknattleiksdeildar Gróttu 2012-2013. Hann var handknattleiksdómari á vegum HSÍ fyrir Gróttu á árunum 2010-2011. Jafnframt dæmdi Davíð fjölmarga leiki í yngri flokkum Gróttu, þann síðasta á vormánuðum árið 2021. Davíð sat í stjórn HSÍ sem varaformaður frá árinu 2013 og til dauðadags auk þess að sinna öðrum trúnaðarstörfum fyrir HSÍ frá árinu 2007.

Að auki sinnti Davíð margvíslegum störfum fyrir Íþróttafélagið sem foreldri. Þannig fylgdi Davíð börnum sínum þeim Evu Björk, Þorgeiri Bjarka, Önnu Láru og Benedikt Davíð á öll þau mót og alla þá leiki sem hann frekast gat komið við bæði í handbolta og fótbolta. Var hann oftar en ekki fararstjóri í þeim ferðum sem farið var út á land eða utan landsteina og í nokkrum ferðum var hann yfirfarastjóri enda átti hann auðvelt með að hrífa fólk með sér til starfa auk þess að vera einstaklega dugmikill og ósérhlífinn í félagsstörfum.

Davíð var árið 2010 sæmdur bronsmerki Gróttu fyrir óeigingjörn störf í þágu félagsins og árið 2014 fékk hann afhent silfurmerki Gróttu fyrir áralangt starf fyrir félagið sem leikmaður, þjálfari, dómari, stjórnarmaður, fararstjóri og stuðningsmaður.

Með Davíð er genginn drenglyndur og heilsteyptur maður langt um aldur fram. Grótta saknar vinar í stað og harmar einstakan liðsmann. Mestur er þó missir fjölskyldu Davíðs, móður, eiginkonu, barna og annarra aðstandenda. Stjórn og starfsmenn Gróttu færa þeim einlægar samúðarkveðjur með djúpri þökk fyrir ómetanlegt starf Davíðs á liðnum árum. Megi hið eilífa ljós lýsa Davíð á nýju og æðra sviði.

Undanfarið ár höfum við verið í átaki að leita uppi myndir úr starfi Gróttu í gegnum tíðina. 
Hrafnhildur Thoroddsen sem kemur til okkar þrisvar í viku og hún hefur undanfarið ár skannað allar þær myndir sem hafa safnast saman hjá okkur á skrifstofu Gróttu. 
Við viljum líka taka við stafrænum myndum sem við getum geymt í skýinu okkar. 

Nánar upplýsingar gullijons@grotta.is

Við höfum reglulega sett  inn gamlar Gróttumyndirí albúm  á Facebook síðu okkar. 
Sjá hér: https://www.facebook.com/media/set?vanity=grottasport&set=a.1015947284420987

Þorrablót Gróttu sem árlega fer fram í janúar fellur því miður niður vegna áhrifa heimsfaraldurs. Þetta er annað árið í röð sem fella þarf niður þorrablót Gróttu sem hefur verið gríðarlega vinsæll viðburður. Tekjutapið fyrir deildir félagsins er umtalsvert en þessi viðburður hefur verið mikilvægur hlekkur í félagslífi Gróttufólks undanfarin ár og þykir okkur því afar leitt að þurfa að aflýsa þorrablótinu. Við munum blása til viðburðar á vegum félagsins um leið og tækifæri gefst.

Arnar Daði Arnarsson er þjálfari ársins 2021 hjá Gróttu. 

Úr umsögn handknattleiksdeildar:
Arnar Daði er fæddur árið 1992 og var ráðinn til Gróttu haustið 2019 á erfiðum tíma hjá Handknattleiksdeild Gróttu. Þá hafði liðið fallið úr úrvalsdeildinni og ekki bjartir tímar framundan. Fáir leikmenn voru samningsbundnir félaginu og elstu yngri flokkar Gróttu voru fámennir. Ný stjórn við og réð Arnar Daða sem þjálfara meistaraflokks karla. Arnar Daði hafði aldrei áður stýrt meistaraflokk en hafði sýnt frábæran árangur sem þjálfari yngri flokka. Á sínu fyrsta ári kom Arnar Daði liðinu aftur á meðal bestu liða landsins, í úrvalsdeildina sem vakti mikla athygli í handboltaheiminum.

Í fyrra lék liðið í úrvalsdeildinni og með fyrstu verkum Arnars Daða var að fá Maksim Akbachev sem aðstoðarþjálfara. Arnar Daði fékk til sín unga og efnilega leikmenn sem langaði að sanna sig og í bland við unga og efnilega Seltirninga gerðist hið ótrúlega, liðið hélt sæti sínu í deildinni um vorið. Sá árangur vakti mikla athygli enda Gróttuliðið ungt, efnilegt og lítill leikmannakostnaður sem fylgdi því. 

Núna í vetur er sama uppi á teningnum. Gróttuliðið er ungt, efnilegt og kostnaðarlítið. Liðið situr sem stendur í 10.sæti Olísdeildarinnar og hefur náð frábærum árangri í leikjunum hingað til. Grótta hefur tapað naumlega gegn bestu liðum landsins, unnið verðskuldað leiki gegn virkilega sterkum liðum og spilað feikilega skemmtilegan handbolta. Auk þess að þjálfa meistaraflokk, þjálfar Arnar Daði 3.flokks félagsins sem eru ungir leikmenn sem vonandi með tíð og tíma munu spila með meistaraflokki félagsins. Arnar Daði er ennfremur í þjálfarateymi ungmennaliðs Gróttu sem Maksim Akbachev stjórnar. Liðið situr þar á toppi 2.deildar.

Arnar Daði er mikill félagsmaður. Ekkert verk er of lítið eða of stórt fyrir hann. Hann hefur áhuga á öllu starfi deildarinnar eða félagsins ef því er að skipta. Hann tekur mikinn þátt í sjálfboðaliðstarfi félagsins, hvort sem það er mönnum dómara, dómgæsla, umgjörð á leikjum meistaraflokka eða hvað það sem viðkemur deildinni.