Magnús Örn ráðinn yfirmaður knattspyrnumála

Knattspyrnudeild Gróttu hefur tekið stórt skref í átt að frekari styrkingu og framþróun með því að ráða Magnús Örn Helgason í nýtt og mikilvægt hlutverk sem yfirmann knattspyrnumála. Þessi ráðning markar upphaf nýs kafla í sögu deildarinnar, þar sem lögð verður enn frekari áhersla á fagmennsku og markvissa framtíðarsýn.

Magnús kemur til Gróttu með mikla reynslu og þekkingu á íslenskri knattspyrnu. Hann hefur frá árinu 2021 starfað hjá KSÍ, fyrst sem þjálfari U17 ára landsliðs kvenna og síðar U15 kvenna. Auk þess hefur Magnús í tvö ár stýrt Hæfileikamótun kvenna hjá KSÍ. Fram á vor mun Magnús sinna verkefnum sínum hjá KSÍ meðfram starfinu hjá Gróttu.

Magnús Örn er öllum hnútum kunnugur innan Gróttu enda Gróttumaður í húð og hár. Hann lék upp yngri flokka Gróttu áður en hann sneri sér að þjálfun en hann hefur þjálfað flesta aldurshópa hjá félaginu auk þess að gegna starfi yfirþjálfara yngri flokka árin 2014-2017. Á þeim tíma var hann m.a. annar höfunda „Gróttuleiðarinnar“ sem er handbók um markmið og hugmyndafræði deildarinnar. Árið 2018 tók hann við meistaraflokki kvenna en undir hans stjórn komst Grótta upp um deild árið 2019.

Í sínu nýja hlutverki mun Magnús hafa yfirumsjón með margvíslegum þáttum í rekstri knattspyrnudeildarinnar. Hann mun vinna náið með stjórn deildarinnar, yfirþjálfurum yngri flokka og þjálfurum meistaraflokka karla og kvenna til að tryggja að Grótta haldi áfram að vera í fremstu röð í íslenskri knattspyrnu.

„Við erum þakklát fyrir að hafa fengið Magga aftur til okkar, og það í þetta nýja og stóra hlutverk innan deildarinnar. Hans þekking og reynsla verða ómetanleg í áframhaldandi þróun knattspyrnudeildar og við höfum fulla trú á að leiðtogahæfileikar hans muni leiða knattspyrnudeild Gróttu til nýrra hæða,“ segir Þorsteinn Ingason, formaður knattspyrnudeildar Gróttu.

„Það er afar spennandi að taka við þessu nýja starfi. Ég hlakka til að vinna með þeim framúrskarandi þjálfurum sem starfa hjá félaginu, leikmönnum á öllum aldri og auðvitað sjálfboðaliðunum sem eru félaginu dýrmætir. Það er margt sem gengur vel hjá Gróttu og ég mun leggja mitt að mörkum til að svo verði áfram,“ segir Magnús sem skrifaði undir nú síðdegis á Vivaldivellinum.

Ráðning Magnúsar er mikilvægur liður í stefnu Gróttu um að byggja upp öfluga knattspyrnudeild með skýra sýn í bæði uppeldis- og afreksstarfi. Við hlökkum til að sjá árangurinn af þessu samstarfi á komandi misserum og bjóðum Magnús hjartanlega velkominn aftur heim í Gróttu.

Myndir: Eyjólfur Garðarsson 

Handboltaskóli Gróttu/KR

Í vetrarleyfinu verður boðið upp á handboltaskóla í Hertz-höllinni fyrir krakka f. 2012-2017 eða þá sem eru í 1. – 6.bekk. Skólinn er kl. 09:00-12:00 og eru krakkarnir beðnir um að taka með sér nesti. Byrjendur jafnt sem lengra komnir eru velkomnir.

Námskeiðsdagarnir eru:

Föstudagurinn 16.febrúar
Mánduagurinn 19.febrúar

Skráning fer fram í Sportabler: https://www.sportabler.com/shop/grotta/handbolti

https://www.sportabler.com/shop/grotta/handbolti

Auður Anna og Ingi Þór íþróttamenn Seltjarnarness 2023

Kjör íþróttamanns Seltjarnarness 2023 í karla- og kvennaflokki fór fram fimmtudaginn 8. febrúar í 30. skipti við hátíðlega athöfn í íþróttahúsinu.

Íþróttamenn Seltjarnarness 2023 eru Auður Anna Þorbjarnardóttir fimleikakona og Ingi Þór Ólafson golfari.

Kjörið er í umsjón íþrótta- og tómstundanefndar Seltjarnarness, sem vill með kjörinu vekja athygli á gildi íþrótta, öflugu íþróttastarfi á Seltjarnarnesi og verðlauna sérstaklega afreksíþróttamenn úr hópi bæjarbúa. Sex tilnefningar bárust nefndinni þetta árið. Jafnframt voru veitt verðlaun til landsliðsfólks, ungs og efnilegs íþróttafólks auk þess sem Íslands- og bikarmeistarar voru sérstaklega verðlaunaðir og tveir íþróttamenn fengu úthlutað úr afreksmannasjóði ÍTS.

Auður Anna Þorbjarnardóttir, fimleikakona

Auður Anna er nýorðin 14 ára og einn allra efnilegasti iðkandi fimleikadeildar Gróttu. Hún var í bikarliði Gróttu í frjálsum æfingum vorið  2023, keppti fyrir Gróttu á Íslandsmóti í áhaldafimleikum í unglingaflokki í maí og varð í 4. sæti í fjölþraut. Auður Anna komst í úrslit á stökki, slá og gólfi og fékk silfur á stökki. Þá sigraði hún á stökki í unglingaflokki í GK móti Fimleikasambands Íslands og varð í 3. sæti á stökki í unglingaflokki á haustmóti FSÍ.

Auður Anna var valin í úrvalshóp Fimleikasambands Íslands og keppti með unglingalandsliði Íslands á Norðurlandamóti unglinga í Finnlandi sem og á EYOF (European Youth Olympic Festival) í Slóveníu á árinu. Á Norðurlandamótinu varð Auður Anna í 13. sæti í fjölþraut, stigahæst íslensku keppendanna. Hún komst í úrslit á stökki þar sem að hún vann silfurverðlaun. Þá keppti Auður með Gróttu á alþjóðlegu móti Gymsport í Porto á árinu þar sem hún varð í 10. sæti í fjölþraut og komst í úrslit á stökki og gólfi. Hún fékk bronsverðlaun fyrir stökk á mótinu og varð í 6. sæti á gólfi.

Ingi Þór Ólafson, golfari

Ingi Þór er afrekskylfingur sem keppir í golfi fyrir hönd Golfklúbbs Mosfellsbæjar. Hann leikur á mótaröð þeirra bestu og endaði í 8. sæti á stigalista mótaraðarinnar 2023. Hápuktur sumarsins var 4. sæti í Íslandsmótinu í höggleik en einnig var hann í öðru sæti í Hvaleyrarbikarnum. Ingi Þór lék í karlasveit Golfklúbbs Mosfellsbæjar sem sigruðu Íslandsmót golfklúbba 2023 og má segja að Ingi Þór hafi verið einn af lykilmönnum sveitar GM. Í kjölfarið var hann valinn í lið þriggja kylfinga úr GM til að leika á Evrópumóti golfklúbba í Portúgal.

Ingi Þór fór í tvö úrtökumót fyrir Nordic mótaröðina í haust og lék frábært golf og tryggði sér fullan þátttökurétt á mótaröðinni fyrir keppnistímabilið 2024. Einnig var Ingi Þór valinn í landsliðshóp GSÍ fyrir 2024.

Þau sem hlutu tilnefningar til Íþróttamanns Seltjarnarness 2023


Frá vinstri: Ingi Þór Ólafson golf, Lovísa Davíðsdóttir Scheving knattspyrna, Rut Bernódusdóttir handknattleikur og Auður Anna Þorbjarnardóttir. Á myndina vantar Hannes Grimm handknattleikur og Grím Inga Jakobsson knattspyrna.

Afreksmannastyrkur

Aðalsteinn Karl Björnsson júdó og Ingi Þór Ólafson golf.

Landsliðsfólk

Frá vinstri: Rebekka Sif Brynjarsdóttir U-15 knattspyrna, Arnfríður Auður Arnarsdóttir U-15 knattspyrna, Katrín Anna Ásmundsdóttir U19 handknattleikur, Antonie Óskar Pantano U-17 handknattleikur, Sara Björk Arnarsdóttir U-15 knattspyrna, Auður Anna Þorbjarnardóttir U-landslið fimleikar. Á myndina vantar Andra Fannar Elísson U-19 handknattleikur og Tómas Johannessen U-17 knattspyrna.

Ungt og efnilegt íþróttafólk

Í stafrófsröð:

  • Arnfríður Auður Arnarsdóttir, knattspyrna
  • Birgir Davíðsson Scheving, knattspyrna
  • Edda Sigurðardóttir, handknattleikur
  • Elísabet Þóra Ólafsdóttir, golf
  • Freyja Geirsdóttir, hópfimleikar
  • Jón Agnar Magnússon, golf
  • Jón Bjarni Pálsson, handknattleikur
  • Katrín Arna Andradóttir, handknattleikur
  • Nína Karen Jóhannsdóttir, áhaldafimleikar
  • Rakel Lóa Brynjarsdóttir, knattspyrna
  • Tómas Johannessen, knattspyrna
  • Þröstur Blær Guðmundsson, handknattleikur

Bikarmeistarar í 2. þrepi fimleikastigans

Í stafrófsröð:

  • Ása Agnarsdóttir
  • Áslaug Glúmsdóttir
  • Harpa Hrönn Egilsdóttir
  • Nína Karen Jóhannsdóttir
  • Á myndina vantar Eldey Erlu Hauksdóttur sem einnig varð Íslandsmeistari í 2. þrepi.

Til hamingju allir með frábæran árangur á árinu 2023. 

Ljósmyndari: Eyjólfur Garðarsson.

Aufí á leið til Portúgals með U17 ára landsliðinu

Þórður Þórðarson landsliðsþjálfari U17 kvenna, hefur valið hóp sem tekur þátt í milliriðli Evrópumóts UEFA í Portúgal dagana 19.-28.febrúar 2024. Gróttukonan Arnfríður Auður Arnarsdóttir hefur verið valin í hópinn. Hin 15 ára Aufí lék einnig með U17 í undankeppni EM í október sl.
Knattspyrnudeild Gróttu óskar Aufí innilega til hamingju með valið og góðs gengis í Portúgal!

Leikdagur – Grótta x Stjarnan

Í kvöld fer fram risaleikur hjá stelpunum okkar þegar Stjarnan kemur í heimsókn í Hertz-höllina í 8 liða úrslitum Powerade-bikarsins. Fjölmennum, styðjum okkar lið og tryggjum liðinu í undanúrslit. Leikurinn hefst kl. 20:00.

Fyrir það stuðningsfólk sem kemst ekki á leikinn, þá er hann sýndur í beinni útsendingu á RÚV 2.

Við minnum á rjúkandi heitar Domino´s pizzur fyrir leik og í hálfleik.

🤾‍♀️ Grótta – Stjarnan
⏱ Miðvikudaginn 7.febrúar kl. 20:00
📍 Hertz-höllin
⛽️ Powerade-bikarinn

Áfram Grótta !

Íþróttafólk Gróttu 2023

Kjör íþróttafólks Gróttu fór fram við hátíðlega athöfn fimmtudaginn 1. febrúar síðastliðinn. Athöfnin fór fram í hátíðarsal Gróttu þar sem fagnað var íþróttaárinu 2023.

Íþróttafólk Gróttu 2023 eru þau Einar Baldvin Baldvinsson handknattleiksmaður og Freyja Hannesdóttir, fimleikakona. Einnig var kjörið íþróttafólk æskunnar en í ár eru það knattspyrnufólkið Tómas Johannessen og Arnfríður Auður Arnarsdóttir sem hlutu þá viðurkenningu. Andri Sigfússon handknattleiksþjálfari er þjálfari ársins.

Valið á sjálfboðaliðum ársins er þáttur í því að þakka þeim sem leggja til af sínum tíma og orku í félagið á hverju ári. Sjálfboðaliðar ársins 2023 eru Guðrún Jóna Stefánsdóttir hjá fimleikadeild, Eyjólfur Garðarsson hjá handknattleiksdeild og Þórir Hallgrímsson hjá knattspyrnudeild.

Veitt var viðurkenning til þeirra sem kepptu fyrir hönd Íslands í fyrsta skipti á árinu. Að þessu sinni voru það Arnfríður Auður Arnarsdóttir og Rebekka Sif Brynjarsdóttir sem spiluðu sína fyrstu landsleiki á árinu.

Í ár voru 20 aðilum veitt heiðursmerki Gróttu fyrir vel unnin störf fyrir félagið.

Þau sem hlutu bronsmerki voru eftirfarandi: Anna Dóra Ófeigsdóttir, Arnar Þór Axelsson, Bogi Elvar Grétarsson, Hansína Þóra Gunnarsdóttir, Hannes Grimm, Hildur Ólafsdóttir, Hrafnhildur Thoroddsen, Jóhanna Selma Sigurðardóttir, Sólveig Herbertsdóttir, Þórir Hallgrímsson, Ægir Steinarsson og Valgerður Thoroddsen.

Þau sem hlutu silfurmerki voru eftirfarandi: Ólöf Línberg Kristjánsdóttir, Nanna Guðmundsdóttir, Íris Björk Símonardóttir og Valdimar Ólafsson.

Þau sem hlutu gullmerki voru eftirfarandi: Arndís María Erlingsdóttir, Davíð Örn Hlöðversson, Gabriella Belányi og Kristín Þórðardóttir.

Heiðursfélagi Gróttu er æðsti heiður sem félagið veitir. Í ár var Kristín Finnbogadóttir gerð að heiðursfélaga.

Við viljum óska þeim öllum til hamingju!

Kjör íþróttafólks GRÓTTU 2023

Íþróttamaður og kona Gróttu fyrir árið 2023 verða kjörin við hátíðlega athöfn á morgunn, fimmtudaginn 1. febrúar kl. 17:30 í hátíðarsal Gróttu.

Auk þess verða krýnd:

*Íþróttakona æskunnar.

*Íþróttamaður æskunnar.

*Þjálfari ársins.

*Sjálfboðaliðar ársins hjá öllum deildum.

*Þau sem kepptu í fyrsta sinn fyrir Íslands hönd á árinu.

*Afhent verða brons-, silfur- og gullmerki Gróttu.

*Heiðursfélagi Gróttu.

Við hvetjum allt Gróttufólk til að mæta og heiðra okkar flotta íþróttafólk.

Léttar veitingar í boði.

Viðburður á Facebook