Dida til Benfica

Ana Lúcia Dida, markvörður Gróttu, hefur gengið til liðs við portúgalska stórliðið Benfica. Dida hefur heillað Gróttufólk í sumar með frammistöðu sinni og jákvæðu viðmóti utan vallar. Grótta kveður Didu með söknuði en fagnar um leið því frábæra tækifæri sem hún fær nú hjá Benfica.

Continue reading

Meistaraflokkur kvenna í æfingaferð í Bosön

Meistaraflokkur kvenna hélt til Bosön í Svíþjóð í æfingaferð dagana 5. 10. júní. 20 leikmenn, einn liðsstjóri og þrír þjálfarar héldu í ferðina snemma á miðvikudagsmorgni. Í Bosön beið hópnum frábær aðstaða, gervigrasvöllur, styrktarsalur, fjölbreytt og hollt fæði og skemmtileg kojustemning. Veðrið lék við hópinn, sólin skein og kannski full heitt fyrir suma, að minnsta kosti á meðan æfingum stóð.

Hópurinn nýtti tímann vel og æfði sjö sinnum á fimm dögum, fór og fylgdist með Svíþjóð – Malta, spókaði sig um í miðbæ Stokkhólms og liðsfundirnir voru einnig ófáir. Ferðin gekk vel í alla staði og er hópurinn enn tilbúnari í átök sumarsins, þéttari sem nokkru sinni fyrr.

Viðtal við meistaraflokks þjálfara knattspyrnudeildarinnar

Það er mikið líf á Vivaldivellinum þegar blaðamann Nesfrétta ber að garði á fallegu síðdegi í maí. Örugglega um 60 börn og unglingar að æfa á iðagrænu gervigrasinu. Við höfum mælt okkur mót við þjálfara meistaraflokka Gróttu í knattspyrnu, þá Óskar Hrafn Þorvaldsson og Halldór Árnason sem þjálfa karlaliðið og Magnús Örn Helgason og Pétur Rögnvaldsson sem þjálfa kvennaliðið.

Continue reading

Ungar og efnilegar framlengja við Gróttu

Um daginn skrifuðu Rut Bernódusdóttir og Valgerður Helga Ísaksdóttir undir nýjan tveggja ára samning við Gróttu.

Það er mikið ánægju efni fyrir deildina þegar uppaldir leikmenn framlengja samninga sína við félagið. Rut og Valgerður eru enn gjaldgengar í 3.flokk félagsins og má búast við miklu af þeim á næstu tveimur árum en þeim er ætlað stórt hlutverk í þeirri uppbyggingu sem er í gangi hjá meistaraflokki kvenna.

Á myndinni má sjá Davíð Örn annan þjálfara liðsins handsala samninginn

Grótta semur við lykilleikmenn í meistaraflokki kvenna

Á dögunum skrifuðu þær Hrafnhildur Fannarsdóttir, Diljá Mjöll Aronsdóttir, Sigrún Ösp Aðalgeirsdóttir og Tinna Bjarkar Jónsdóttir undir tveggja ára samning við félagið. Þetta eru mikil gleðitíðindi enda um að ræða öflugar knattspyrnukonur sem voru í lykilhlutverki á síðasta tímabili.

Hrafnhildur er sóknarmaður, fædd árið 1995. Hún á að baki 58 meistaraflokksleiki og hefur skorað í þeim 17 mörk. Ásamt því hefur hún spilað þrjá U17 landsleiki. Hrafnhildur hefur spilað með Gróttu síðustu tvö tímabil, en spilaði áður með Víking Ó og KR.

Diljá Mjöll er miðju- og sóknarmaður, fædd 1997. Hún hefur spilað með liðinu frá stofnun þess en er uppalin í Fylki. Diljá á að baki 45 meistaraflokksleiki og hefur skorað í þeim 11 mörk.

Sigrún Ösp er varnar- og miðjumaður, fædd árið 1995. Hún spilaði sitt fyrsta tímabil með Gróttu á liðinni leiktíð en var ekki lengi að setja sitt mark á liðið. Hún átti frábært sumar, var eftir tímabilið valin leikmaður ársins og er nú orðin fyrirliði liðsins. Áður spilaði Sigrún með Hömrunum, Völsungi og Þór/KA og á að baki 36 meistaraflokksleiki.

Tinna Jónsdóttir er sóknarmaður og fædd árið 1996. Hún er uppalin í Gróttu og hefur því spilað með liðinu frá stofnun þess, en hún er varafyrirliði liðsins. Tinna hefur leikið 45 meistaraflokksleiki og skorað í þeim 18 mörk.

Magnús Örn Helgason þjálfari fagnar því að fjórmenningarnir verði áfram í herbúðum Gróttu:
„Það er virkilegt sterkt fyrir félagið að svona öflugir leikmenn og flottir karakterar séu klárir í slaginn í með okkur. Þær spila lykilhlutverk í liðinu á ólíkum stöðum á vellinum og eru auk þess fyrirmyndir fyrir yngri stelpur sem eru að banka á dyrnar. Gróttuliðið er í mótun og þetta er eitt skrefið af mörgum“.