Emelía til Kristianstad

Í síðasta mánuði var tilkynnt að hin 15 ára gamla Emelía Óskarsdóttir hefði gert 3 ára samning við sænska úrvalsdeildarfélagið Kristianstads DFF, sem tekur gildi í mars næstkomandi á 16 ára afmæli Emelíu. Þetta eru frábær tíðindi og mikil viðurkenning fyrir Emelíu en Kristianstad hefur á síðustu árum verið eitt allra best lið Svíþjóðar. Síðustu tvær leiktíðir hefur Kristianstads endað í 3. sæti sænsku deildarinnar og mun því í annað sinn leika í Meistaradeild Evrópu á komandi keppnistímabili. 

Emelía hóf knattspyrnuferil sinn í 8. flokki Gróttu og lék upp yngri flokkana með Gróttu og Gróttu/KR. Hún kom inn í meistaraflokkslið Gróttu í Lengjudeildinni sumarið 2020, þá aðeins 14 ára gömul, og skoraði 1 mark í 13 leikjum. Síðasta sumar fluttist hún til Danmerkur og spilaði með unglingaliðum BSF þar sem frammistaða hennar vakti athygli Kristianstad og fleiri stórliða. Emelía hefur leikið 5 leiki með yngri landsliðum Íslands og skorað eitt mark. 

Elísabet Gunnarsdóttir er þjálfari Kristianstad en hún sagði í viðtali í sænskum fjölmiðlum að Emelía væri mjög spennandi framherji og hún fagnaði því að hafa fengið hana til liðs við félagið. Amanda Andradóttir gekk nýverið til liðs við Kristianstad en á síðustu leiktíð léku Sveindís Jane Jónsdóttir og Sif Atladóttir með liðinu. 

Emelía kvaðst vera spennt fyrir komandi tímum: „Þetta er rosalega spennandi tækifæri og ég er mjög spennt að takast á við þetta verkefni í Svíþjóð.“

Knattspyrnudeild Gróttu óskar Emelíu og fjölskyldu hennar til hamingju með þennan áfanga og hlakkar til að fylgjast með ævintýrum hennar í Svíþjóð.

Hallgerður til Gróttu og Elín Helga framlengir

Hallgerður Kristjánsdóttir skrifaði undir samning við knattspyrnudeild Gróttu nú á dögunum. Hallgerður, sem er tvítug, leikur sem varnarmaður og er uppalin hjá Val. Síðustu tvö ár hefur Hallgerður spilað með Tindastól; í Lengjudeildinni árið 2020 og svo í Pepsi Max deildinni síðasta sumar. Hallgerður á einnig að baki tvo leiki með U16 ára landsliði Íslands. Hallgerður er mikill liðsstyrkur fyrir Gróttuliðið sem undirbýr sig nú af krafti fyrir baráttuna í 2. deild kvenna í sumar. Knattspyrnudeild Gróttu fagnar komu Hallgerðar og býður hana velkomna í félagið!

Elín Helga Guðmundsdóttir framlengdi einnig samning sinn við Gróttu nú á dögunum en hún er uppalin í Gróttu. Elín Helga er 16 ára varnarmaður sem lék tvo leiki með Gróttu í Lengjudeildinni síðasta sumar og einn í Mjólkurbikarnum, ásamt því að spila bæði með 2. og 3. flokki kvenna þar sem hún var lykilleikmaður. Knattspyrnudeild fagnar því að Elín Helga hafi framlengt samning sinn við félagið, enda efnilegur leikmaður þar á ferð sem verður spennandi að fylgjast með á komandi tímabili.

Íþróttamaður Grótta myndbandið – bakvið tjöldin

Við fórum þá leið í ár að framleiða myndbönd um verðlaunahafa í stað þess að hafa athöfn.

Við boðuðum tilnefnda og vinningshafa í myndatöku hjá Eyjólfi Garðarssyni fimmtudaginn 6 janúar og myndbands upptökur með siguvegurum fóru fram fyrstu helgina eftir undir styrkri stjórn Fjalars Sigurðarsonar.  

Eftirtaldir aðilar lögðu fram krafta sína í myndbands gerðina og kunnum við þeim bestu þakkir fyrir. 
Þulur: Lilja Nótt Þórarinsdóttir 
Hljóðsetning: Jói B/Audioland.is
Klipping: Ástrós Lind
Grafík: Elsa Nielsen
Ljósmyndir: Eyjólfur Garðarsson
Handknattleiksefni: Kári Garðarsson og Arnar Daði Arnarsson
Fimleikaefni: Fimleikasamband Íslands
Ýmsar reddingar: Lilja Nótt Þórarinsdóttir
Framleiðendur: Gunnlaugur Jónsson & Fjalar Sigurðarson

Eyjólfur ljósmyndari var mættur laugardaginn 8 janúar þegar upptökur fóru fram á myndbandinu og fangaði stemmninguna. 

Fjalar Sigurðarsson við upptökur
Nanna Guðmundsdóttir íþróttakona Gróttu 2021
Kjartan Kári íþróttamaður æskunnar
Verðlaunagripirnir

Arnar Daði þjálfari ársins
Pétur Theodór íþróttamaður Gróttu árið 2021
Hér er myndbandið í fullri lengd

Níu aðilar fengu heiðursmerki Gróttu

Íþróttafélagið Grótta veitti í byrjun ársins 9 aðilum heiðursmerki sem hafa unnið gott starf fyrir félagið. 
Þau eru: Eyjólfur Garðarsson knattspyrnu og handknattleiksdeild sem fékk gullmerki Gróttu.  Ásdís Björk Pétursdóttir fimleikdeild fékk silfurmerki Gróttu. 
Bronsmerki hlutu Guðjón Rúnarsson og Axel Bragason fimleikadeild. Ásmundur Einarsson handknattleiksdeild og frá knattspyrnudeild Sigurvin Reynisson, Halldór Kristján Baldursson, Eydís Lilja Eysteinsdóttir  og Alexander Jensen Hjálmarsson.
Til hamingju öll sömul og takk fyrir ómetanlegt starf fyrir Gróttu 🙏

Þorrablótinu frestað !

Þorrablót Gróttu sem árlega fer fram í janúar fellur því miður niður vegna áhrifa heimsfaraldurs. Þetta er annað árið í röð sem fella þarf niður þorrablót Gróttu sem hefur verið gríðarlega vinsæll viðburður. Tekjutapið fyrir deildir félagsins er umtalsvert en þessi viðburður hefur verið mikilvægur hlekkur í félagslífi Gróttufólks undanfarin ár og þykir okkur því afar leitt að þurfa að aflýsa þorrablótinu. Við munum blása til viðburðar á vegum félagsins um leið og tækifæri gefst.

Arnar Daði þjálfari ársins 2021

Arnar Daði Arnarsson er þjálfari ársins 2021 hjá Gróttu. 

Úr umsögn handknattleiksdeildar:
Arnar Daði er fæddur árið 1992 og var ráðinn til Gróttu haustið 2019 á erfiðum tíma hjá Handknattleiksdeild Gróttu. Þá hafði liðið fallið úr úrvalsdeildinni og ekki bjartir tímar framundan. Fáir leikmenn voru samningsbundnir félaginu og elstu yngri flokkar Gróttu voru fámennir. Ný stjórn við og réð Arnar Daða sem þjálfara meistaraflokks karla. Arnar Daði hafði aldrei áður stýrt meistaraflokk en hafði sýnt frábæran árangur sem þjálfari yngri flokka. Á sínu fyrsta ári kom Arnar Daði liðinu aftur á meðal bestu liða landsins, í úrvalsdeildina sem vakti mikla athygli í handboltaheiminum.

Í fyrra lék liðið í úrvalsdeildinni og með fyrstu verkum Arnars Daða var að fá Maksim Akbachev sem aðstoðarþjálfara. Arnar Daði fékk til sín unga og efnilega leikmenn sem langaði að sanna sig og í bland við unga og efnilega Seltirninga gerðist hið ótrúlega, liðið hélt sæti sínu í deildinni um vorið. Sá árangur vakti mikla athygli enda Gróttuliðið ungt, efnilegt og lítill leikmannakostnaður sem fylgdi því. 

Núna í vetur er sama uppi á teningnum. Gróttuliðið er ungt, efnilegt og kostnaðarlítið. Liðið situr sem stendur í 10.sæti Olísdeildarinnar og hefur náð frábærum árangri í leikjunum hingað til. Grótta hefur tapað naumlega gegn bestu liðum landsins, unnið verðskuldað leiki gegn virkilega sterkum liðum og spilað feikilega skemmtilegan handbolta. Auk þess að þjálfa meistaraflokk, þjálfar Arnar Daði 3.flokks félagsins sem eru ungir leikmenn sem vonandi með tíð og tíma munu spila með meistaraflokki félagsins. Arnar Daði er ennfremur í þjálfarateymi ungmennaliðs Gróttu sem Maksim Akbachev stjórnar. Liðið situr þar á toppi 2.deildar.

Arnar Daði er mikill félagsmaður. Ekkert verk er of lítið eða of stórt fyrir hann. Hann hefur áhuga á öllu starfi deildarinnar eða félagsins ef því er að skipta. Hann tekur mikinn þátt í sjálfboðaliðstarfi félagsins, hvort sem það er mönnum dómara, dómgæsla, umgjörð á leikjum meistaraflokka eða hvað það sem viðkemur deildinni.

Kjartan Kári er íþróttamaður æskunnar 2021

Knattspyrnumaðurinn Kjartan Kári Halldórsson er íþróttamaður æskunnar árið 2021.
Hinn 18 ára Kjartan Kári er Gróttumaður í húð og hár sem átti frábært tímabil með Gróttu síðastliðið sumar. Hinn ungi og efnilegi Kjartan á að baki 26 leiki fyrir meistaraflokk Gróttu og hefur skorað í þeim 9 mörk. Hann hóf feril sinn með meistaraflokki árið 2020 í Pepsi Max deildinni með Gróttu en síðasta sumar lék hann 19 leiki í Lengjudeildinni og einn í bikar þar sem hann lét ljós sitt skína. Kjartan var valinn efnilegasti leikmaður Gróttu á lokahófi meistaraflokkanna í haust. 

Kjartan á einnig að baki 12 landsleiki, með U16 ára og U19 ára landsliðum Íslands. Kjartan spilaði fyrir íslenska U-19 ára landsliðið þegar liðið keppti í undankeppni EM, þar kom hann við sögu í öllum þremur leikjum liðsins. Kjartan spilaði einnig í þremur vináttulandsleikjum fyrir U-19 ára landsliðið á árinu. 

Nú á dögunum framlengdi Kjartan samning sinn við knattspyrnudeild Gróttu út árið 2023. Gaman er að segja frá því að á komandi tímabili mun Kjartan spila í nýju númeri, en hin víðfræga sjöa sem Pétur Theódór Árnason hefur spilað í síðustu ár fer nú til Kjartans Kára.

—-
Við fórum þá leið í ár að framleiða myndbönd um verðlaunahafa í stað þess að hafa athöfn. Sérstakar þakkir fá Fjalar Sigurðarson, Lilja Nótt Þórarinsdóttir og Jói B (Audioland.is) fyrir óeigingjarnt framlag til myndbandagerðarinnar.

Katrín Anna er íþróttakona æskunnar 2021

Katrín Anna Ásmundsdóttir er íþróttakona æskunnar fyrir árið 2021 hjá Gróttu.
Úr umsögn handknattleiksdeildar um Katrínu Önnu:
Katrín Anna er leikmaður meistaraflokks kvenna og 3.flokks félagsins. Hún er fædd árið 2004 og er örvhentur hornamaður. Þrátt fyrir ungan aldur er þetta þriðja tímabil Katrínar Önnu með meistaraflokki Gróttu. Hún skoraði 51 mark í deildinni í fyrra þegar liðið komst alla leið í úrslit í umspili um sæti í Olísdeildinni en tapaði í úrslitaeinvígi við Olísdeildarlið HK. Katrín Anna hefur sýnt með sinni frammistöðu að hún er einn albesti örvhenti hornamaður deildarinnar. Á lokahófi meistaraflokks í vor var Katrín Anna valinn efnilegasti leikmaður liðsins.

Katrín Anna hefur verið fastamaður í unglingalandslið Íslands og var tvívegis valin í keppnisferðir með liðinu á árinu. Í sumar lék U17 ára landslið Íslands í Litháen á Evrópumóti B-landsliða. Þar komst liðið alla leið í úrslitaleik en tapaði honum naumlega. Katrín Anna lék stórt hlutverk með liðinu og stóð sig frábærlega. Núna í haust var hún aftur valin og nú til keppni í Serbíu þar sem liðið lék við Slóvena, Slóvaka og Serba um laust sæti á Evrópumót A-landsliða næstkomandi sumar. Því miður tapaði liðið aftur úrslitaleik og nú gegn Serbíu. Aftur lék Katrín Anna vel með liðinu.
Katrín Anna er félagsmaður mikill og tekur virkan þátt í starfi félagsins. Í sumar þjálfari Katrín Anna í Handboltaskóla Gróttu og stóð sig vel þar.

Við fórum þá leið í ár að framleiða myndbönd um verðlaunahafa í stað þess að hafa athöfn. 
Sérstakar þakkir fá Fjalar Sigurðarson, Lilja Nótt Þórarinsdóttir og Jói B (Audioland.is) fyrir óeigingjarnt framlag til myndbandagerðarinnar.

Pétur Theodór er íþróttamaður Gróttu 2021

Pétur Theodór Árnason  er íþróttamaður Gróttu árið 2021. 

Úr umsögn Knattspyrnudeildar um Pétur.
Pétur er 26 ára gamall og er fæddur og uppalinn Gróttumaður. Hann lék sinn fyrsta leik í meistaraflokki aðeins 16 ára gamall en þá lék liðið 1. deild. Eftir að hafa orðið fyrir og loks sigrast á afar erfiðum meiðslum blés Pétur nýju lífi í ferilinn og gekk til liðs við Gróttu um mitt sumar 2018. Var Pétur mikilvægur hlekkur í að tryggja liðinu sæti í efstu deild, í fyrsta skipti í sögu félagsins.

Eftir erfitt ár í efstu deild kom Pétur tvíefldur til baka sl. sumar og þegar yfir lauk hafði hann skorað 26 mörk í 23 leikjum í deild og bikar. Pétur var vafalaust einn af bestu mönnum liðsins og deildarinnar í sumar og hjó nærri um hálfrar aldar gömlu markameti í næst efstu deild. Frammistaða hans vakti athygli liða í efstu deild og eftir lok tímabils gekk hann í raðir Breiðabliks. 

Við fórum þá leið í ár að framleiða myndbönd um verðlaunahafa í stað þess að hafa athöfn. 

Sérstakar þakkir fá Fjalar Sigurðarson, Lilja Nótt Þórarinsdóttir og Jói B (Audioland.is) fyrir óeigingjarnt framlag til myndbandagerðarinnar.