Ráðningar í knattspyrnudeild
Það er okkur mikil ánægja að tilkynna að í gær var gengið frá ráðningum á nýjum þjálfurum hjá yngri flokkum félagsins, auk þess sem ný staða hefur verið tekin upp.
Halda áfram að lesaVivaldi framlengir styrktarsamning sinn
Vivaldi á Íslandi hefur gert tveggja ára styrktarsamning við knattspyrnudeild Gróttu vegna barna- og unglingastarf deildarinnar. Samkvæmt samningnum munu vörumerkin Vivaldi og Arna prýða keppnisbúninga yngri flokka Gróttu næstu tvö árin.
Samningurinn er lyftistöng fyrir starfið í félaginu og með honum hefur Jón von Tetzchner forsvarsmaður fyrirtækisins enn og aftur sýnt í verki mikilvægan stuðning við uppeldisfélagið sitt.
Við tilefnið afhenti Bragi Björnsson, formaður Gróttu, Jóni bronsmerki félagsins sem honum var veitt í byrjun árs, fyrir stuðning sinn við knattspyrnudeildina í gegnum árin.
Tinna Brá til Írlands með U17 ára landsliðinu
Efnilegi markmaðurinn Tinna Brá leggur land undir fót með U17 ára landsliðinu á morgun en ferðinni er heitið til Írlands 🇮🇪 U17 ára landslið kvenna spilar tvo vináttuleiki við Írland, á föstudag og sunnudag.
Knattspyrnudeild Gróttu óskar Tinnu Brá til hamingju með landsliðsvalið og góðs gengis í leikjunum! 👏🏼
Emma Steinsen í Gróttu
Hin 16 ára gamla Emma Steinsen Jónsdóttir er gengin til liðs við Gróttu frá Val á láni út tímabilið. Emma er efnilegur varnarmaður sem á 6 leiki með U16 ára landsliðinu og einn leik með U17. Gróttasport ræddi við Emmu og Magnús Örn þjálfara eftir æfingu í gærkvöldi:
Maggi:
„Það er frábært að fá Emmu í okkar raðir. Hún er öflugur varnarmaður og auk þess flottur karakter og mikil keppnismanneskja. Hún hefur staðið sig vel á æfingum og smellpassar inn í hópinn“.
Emma:
„Ég er mjög ánægð með að vera komin og hlakka til að spila með Gróttu á tímabilinu. Mér leist strax vel á aðstæður og stelpurnar hafa tekið mér mjög vel. Þjálfunin hjá Gróttu er góð og ég er viss um að ég geti bætt mig hérna.“
Þrír ungir og efnilegir leikmenn Gróttu skrifa undir
Þrír ungir og efnilegir Gróttumenn skrifuðu undir tveggja ára samning við félagið í vikunni. Um er að ræða þá Daða Má Patrek Jóhannsson, Kjartan Kára Halldórsson og Grím Inga Jakobsson. Daði Már er fæddur árið 2001 en Kjartan og Grímur eru fæddir 2003. Þeir Daði og Kjartan hafa æft með Gróttu frá 5 ára aldri en Grímur skipti yfir í Gróttu úr Val þegar hann flutti á Nesið fyrir fimm árum. Þremenningarnir eru allir lykilleikmenn í 2. flokki og hafa æft með meistaraflokki síðustu misseri. Þeir Kjartan og Grímur hafa ennfremur verið viðloðandi U16 og U17 ára landsliðin en Kjartan hefur spilað sex landsleiki og Grímur fjórtán.
Það er mikið gleðiefni fyrir Gróttu að hafa skrifað undir við þessa frambærilegu drengi sem munu vonandi vinna sig enn betur inn í meistaraflokkinn á árinu.
Ágúst og Bjarki gengnir til liðs við Gróttu
Þeir Ágúst Freyr Hallsson og Bjarki Leósson eru gengnir til liðs við Gróttu og skrifuðu undir tveggja ára samning við félagið nú á dögunum.
Halda áfram að lesaPétur Theodór Árnason er íþróttamaður Seltjarnarness
Pétur Theodór Árnason var valinn íþróttamaður Seltjarnarness við hátíðlega athöfn í Félagsheimili Seltjarnarness í gær.
Pétur er fæddur og uppalinn á Seltjarnarnesi. Hann er 24 ára gamall og lék upp alla yngri flokkana með Gróttu. Þegar Pétur var aðeins 16 ára gamall spilaði hann sína fyrstu leiki með Gróttu í 1. deild og lék einnig með U16 ára landsliði Íslands á Norðurlandamótinu. Þá um haustið fór Pétur á reynslu til enska liðsins Reading og var viðloðandi landsliðshópa næstu misseri. Sumarið 2013 lenti Pétur í því áfalli að slíta krossband í hné og ári síðar, eftir margra mánaða endurhæfingu, slitnaði krossbandið aftur. Síðan þá hefur ferill Péturs farið smám saman upp á við en hann kom sterkur inn í Gróttuliðið um mitt sumar 2018 og hjálpaði liðinu að komast upp
úr 2. deild.
Árið 2019 var ár Péturs Theodórs. Hann var markahæsti leikmaður Mjólkurbikarsins með 9 mörk og var lykilmaður í liði Gróttu sem sigraði Inkasso-deildina eftirminnilega í sumar. Pétur var valinn besti leikmaður fyrri hluta mótsins, hann var markakóngur deildarinnar með 15 mörk
í 22 leikjum og í lok tímabilsins var Pétur í liði ársins! Pétur Theodór var valinn leikmaður ársins hjá Gróttu á lokahófi meistaraflokkanna en einnig var hann kjörinn leikmaður leikmanna af liðsfélögum sínum.
Pétur er mikill liðsmaður með stórt Gróttuhjarta. Hann æfir af krafti og hugsar vel um sig utan vallar. Fyrirmyndarleikmaður í einu og öllu. Pétur var einnig valinn íþróttamaður Gróttu 2019.
6. flokkur karla á Njarðvíkurmótinu og með bikar heim
6. flokkur karla skellti sér á Njarðvíkurmótið síðustu helgi. Grótta tefldi fram 5 liðum á mótinu en spilað var í Reykjaneshöllinni. Fallegur fótbolti og leikgleði var fremst í flokki og allir leikmenn stóðu sig með prýði. Lið Gróttu í Ensku-deildinni gerði sér svo lítið fyrir og vann sína deild á mótinu 👏🏼🏆
7. flokkur kvenna á fótboltamóti HK og Auðar
Þrjátíu stelpur úr 7. flokki kvenna spiluðu á fótboltamóti Auðar og HK í gær, laugardaginn 18. janúar. Grótta tefldi fram fimm liðum á mótinu og skemmtu sér allir gríðarlega vel. Sigrar, töp og jafntefli en umfram allt leikgleði og barátta.
Rakel Lóa á úrtaksæfingum U16 ára landsliðsins
Gróttukonan Rakel Lóa Brynjarsdóttir er í hóp U16 ára kvennalandsliðsins sem æfði saman 29.-31. janúar undir stjórn Jörundar Áka Sveinssonar. Rakel er á á sextánda ári og því á eldra ári í 3. flokki en æfir alfarið með meistaraflokki Gróttu. Rakel er mjög efnileg knattspyrnukona sem er búin að stimpla sig vel inn í meistaraflokkinn.