Grótta og Dusty bjóða upp á rafíþróttanámskeið

Rafíþróttanámskeið fyrir börn og unglinga fædd 2007 – 2014  verður haldið á vegum Gróttu og rafíþróttafélags DUSTY

Námskeiðin verða sem hér segir:

Námskeið 1: (26. júní – 30. júní)   (Síðasti dagur skráningar er 26. júní) 
Námskeið 2: (3.júlí – 6. júlí)  (síðasti dagur skráningar 2. júlí) 

Yngri hópur: (9-12 ára)  kennt:  9:00-13:00
Eldri hópur: (13-16 ára) kennt: 14:00-18:00

Staðsetning námskeiðs Skútuvogur 1G, efsta hæð!
Takmarkaður fjöldi: Það komast 10 að á hverju námskeiði. 

LÝSING Á NÁMSKEIÐI 

Grótta og rafíþróttafélagið Dusty hafa tekið höndum saman í að bjóða uppá sumarnámskeið  í rafíþróttum fyrir börn og unglinga fædd 2007 – 2014. Á námskeiðinu verður lögð áhersla á skemmtilega og fjölbreytta upplifun iðkenda. 

Á námskeiðinu verður einblínt á eftirfarandi leiki: Fortnite, Valorant, Overwatch 2 og CS:GO. Farið verður yfir lykilhugtök í leikjunum og grunnfærni (core mechanics) í leikjunum æfð. Þá er lögð áhersla á að kynna mikilvægi og ávinning heilbrigðra spilahátta á frammistöðu og upplifun af leikjum ásamt því að hreyfing verður partur af hverri æfingu. 

Sumarnámskeið Gróttu og Dusty í rafíþróttum eru fullkominn vettvangur fyrir metnaðarfulla spilara sem vilja bæta sig og kynnast öðrum til að spila með.

Á lokadegi námskeiðisins býðst öllum iðkendum tækifæri á að spreyta sig á áskorunum í leikjum námskeiðisins og fá allir sem taka þátt viðurkenningu og verðlaun frá Gróttu og Dusty

Verð kr. 19.990.- (5 dagar)     

DUSTY var stofnað árið 2019 og hefur haldið úti keppnisliðum í rafíþróttum síðan þá. Liðið er sigursælasta rafíþróttalið Íslands og ásamt því að hafa unnið fjöldan allan af keppnum á Íslandi í CS:GO, Valorant, Rocket League og League of Legends, þá hefur liðið unnið stór erlend mót í tvígang. DUSTY hefur einnig unnið með nokkrum af stærstu rafíþróttaliðum heims í ýmsum verkefnum, eins og t.a.m. Cloud9 og Vitality.

Frá ársbyrjun 2023 hefur DUSTY haldið útí yngri flokka starfi og nú standa börnum og unglingum í Gróttu það til boða að sækja þangað námskeið. 

Innritun og greiðsla á eftirfarandi námskeið fer fram í gegnum 

-Eldri hópur: https://www.sportabler.com/shop/grotta/sumarnamskeid/product/Q2x1YlNlcnZpY2U6MTk1ODc=?

-Yngri hópur: https://www.sportabler.com/shop/grotta/sumarnamskeid/product/Q2x1YlNlcnZpY2U6MTk1ODY=?

Upplýsingar um skráningu er hægt að nálgast á vef Gróttu, grotta.is/sumar-2023/ eða í síma 561-1133 á milli kl 13:00 og 16:00 eða með því að senda tölvupóst á netfangið grotta@grotta.is 

Opnað verður fyrir skráningu 31. maí kl. 15:00

FORSKRÁNING Í FIMLEIKADEILD GRÓTTU 2023-24

Þann 1. júní til 30. júní næstkomandi fer fram forskráning í fimleikadeild Gróttu fyrir veturinn 2023-24. Athugið að ekki er forskráning í stubbafimi en skráningin í stubbafimi opnar 1. júlí. 

Greitt er 10.000 kr skráningargjald með kreditkorti við skráningu. Skráningargjaldið er óafturkræft en dregst frá æfingagjöldum næsta vetrar. Komi upp sú staða að fimleikadeildin þurfi að neita umsækjendum um pláss er möguleiki á að óska eftir að fá skráningargjaldið endurgreitt.

Athugið að biðlistinn fellur nú úr gildi og allir sem vilja komast að næsta vetur þurfa að forskrá sig. Eftir að forskráningu lýkur verður hægt að skrá á biðlista.

Skráning fer fram hér: https://www.sportabler.com/shop/grotta

Grótta leitar að verkefnastjóra

Íþróttafélagið Grótta óskar eftir því að ráða öflugan verkefnastjóra á skrifstofu
aðalstjórnar félagsins í 100% starf. Um er að ræða fjölbreytt, krefjandi og lifandi starf.
Gert er ráð fyrir að ráðið sé í starfið frá 1. ágúst.

Helstu verkefni og ábyrgð:

  • Hefur umsjón með viðburðum félagsins og hefur aðkomu að mótahaldi
  • Leiðir umbótavinnu við gerð verkferla
  • Leiðir samstarf innan sem utan félags
  • Ritstjórn miðla, samræming kynningarefnis og innleiðing skýjalausna
  • Almenn þjónusta við félagsmenn og samskipti við hagsmunaaðila

Kröfur um hæfni (þekking, færni, eiginleikar):

  • Háskólagráða sem nýtist í starfi
  • Góð samstarfs- og samskiptahæfni
  • Frumkvæði, sjálfstæði, skipulagshæfni og ögun í vinnubrögðum
  • Góð tölvufærni og hæfni til að tjá sig í ræðu og riti
  • Hreint sakavottorð

Umsóknarfrestur er til og með 31. maí 2023.
Sótt er um starfið á umsóknarvef Alfreðs: Íþróttafélagið Grótta (alfred.is)
Nánari upplýsingar má nálgast með því að senda tölvupóst á grotta@grotta.is

Aðalfundur Gróttu 2023

Aðalfundir deilda og ráða Íþróttafélagsins Gróttu fóru fram 27. apríl og fóru þeir fram í hátíðarsal félagsins.  Fundurinn hófst á tónlistaratriði Jón Guðmundsson frá tónlistarskóla Seltjarnanesbæjar kynnti inn 3 stúlkur sem einnig eru iðkendur í félaginu. Þetta eru þær Arney María Arnarsdóttir sem spilaði á þverflautu, Sólveig Þórhallsdóttir einnig á þverflautu og Eyrún Þórhallsdóttir á saxófón.

Ólafur Örn Svansson hélt um fundarstjórnina en fundurinn hófst með skýrslu Þrastar Guðmundssonar, formanns aðalstjórnar og í kjölfarið komu formenn og gjaldkerar deilda og ráða í pontu og fóru yfir starfið á árinu og rekstrarniðurstöður. 

Þröstur var að klára sitt fyrsta ár sem formaður en aðrir aðalstjórnarmeðlimir gáfu öll kost á sér til endurkjörs og er stjórnin því óbreytt. 

Gísli Örn Garðarsson hætti í stjórn fimleikadeildar og Fanney Magnúsdóttur kemur inn í hans stað. Gylfi Magnússon hætti í stjórn handknattleiksdeildar og Páll Gíslason í stjórn unglingaráðs handknattleiksdeildar. 

Þá hættu þeir Alexander Jensen og Rögnvaldur Dofri Pétursson í stjórn knattspyrnudeildar en það var fækkað í stjórninni sem er núna skipuð þeim Þorsteinn Ingasyni formanni, Hörpu Frímansdóttur, Kristínu Huld Þorvaldsdóttur, Stefáni Bjarnasyni, Helga Héðinssyni og Hildi Ólafsdóttir. 

Gefin var út glæsileg árskýrsla fyrir síðasta ár:
https://grotta.is/wp-content/uploads/2023/05/A%CC%81rssky%CC%81rsla-Gro%CC%81ttu-2022-web.pdf

Eyjólfur Garðarsson ljósmyndari félagsins mætti svæðið og tók frábærar myndir sem lýsa vel heppnuðum aðalfundi. 

Örlygur lætur af störfum

Örlygur Ásgeirsson sem starfað hefur hjá okkur sem starfsmaður íþróttamannvirkjanna frá árinu 2016 við afar góðan orðstír lætur af störfum í dag 28. apríl nk og fer á eftirlaun. Örlygur hefur frá fyrstu tíð komið af krafti og fagmennsku inn í starfið hjá okkur. Hann er vinnusamur, samvinnuþýður og hefur húmorinn í lagi sem er mikilvægur eiginleiki til að gefa vinnustaðnum. Haldið var kveðjuhóf honum til heiðurs í gær en þar var Örlygur leystur út með gjöfum auk þess sem hann var sæmdur bronsmerki félagsins. Íþróttafélagið Grótta þakkar Örlygi kærlega fyrir samfylgdina og framlag hans til félagsins.

Aðalfundur Gróttu 27. apríl

Aðalfundir aðalstjórnar og deilda Íþróttafélagsins Gróttu fara fram fimmtudaginn 27. apríl 2023. Aðalfundirnir hefjast kl. 17:30 og er gert ráð fyrir að þeim sé lokið kl. 18:30. Eftir að aðalfundum lýkur verður öllum fundargestum boðið upp á léttar veitingar.

Fyrirspurnum og framboðum til stjórna skal skilað á netfangið grotta@grotta.is

Maksim heldur á vit nýrra ævintýra

Maksim Akbachev, yfirþjálfari barna- og unglingastarfs Gróttu í handknattleik, hefur fengið stórt tækifæri sem þjálfari í Bahrain. Þar mun hann vinna að þróun og þjálfun á landsliðsmönnum þeirra ásamt því að þjálfa unglingalandslið þeirra fyrir heimsmeistaramótið í sumar. Maks heldur utan um páskana.

Maks hefur stýrt þremur flokkum á þessu keppnistímabili sem allir hafa nú fengið nýja öfluga þjálfara.

“Ég hef ákveðið að fjúga á vit ævintýranna eftir 3 frábær ár hjá Gróttu. Ákvörðunin var alls ekki auðveld því hér hefur mér liðið mjög vel við þjálfun og í hlutverki yfirþjálfara. Ég vil þakka öllum iðkendum, þjálfurum, foreldrum og öðrum innilega fyrir samstarfið og fyrir mig – ég hlakka til að fylgjast áfram með ykkur!”

Grótta þakkar Maks frábært samstarf

Maks hefur starfað við þjálfun hjá Gróttu síðan 2020 og undanfarin tvö ár sem yfirþjálfari við góðan orðstír. Þekking hans á íþróttinni er með eindæmum mikil og hæfileiki hans til að miðla henni til iðkenda á öllum aldri framúrskarandi. Maks er mikill liðsmaður og það hefur verið virkilega gaman að vinna með honum undanfarin ár. Stemningin í handboltanum og húsinu hefur verið mjög góð undir hans stjórn og við þökkum honum af öllu hjarta fyrir frábært samstarf, drifkraft og liðsanda – dyr Gróttu standa honum alltaf opnar!

Staða yfirþjálfara barna- og unglingadeildar Gróttu í handknattleik er nú laus og er leitin að eftirmanni Maks hafin.

Barna- og unglingaráð handknattleiksdeildar Gróttu.