Daníel, Halldór og Magnús semja við Gróttu

Handknattleiksdeild Gróttu hefur gert fyrstu samninga við unga og efnilega leikmenn félagsins sem hluta af uppbyggingu félagsins. Allir leikmennirnir eru lykilleikmenn í 3.flokki og U-liði félagsins. Leikmennirnir eru: Daníel Þór Þórsson, Halldór Ingi Hinriksson og Magnús Malik Nielsen Friðriksson. Þeir eru allir fæddir 2010 og þess vegna á 16. aldursári.

* Daníel Þór er rétthentur getur bæði leikið sem leikstjórnandi og skytta. Hann er góður skotmaður, hraður og öflugur beggja megin vallarins.

* Halldór Ingi er örvhentur og leikur aðallega í hægra horninu. Hann er öflugur og vilugur leikmaður. Hann hefur stigið stór framfaraskref síðastliðinn vetur.

* Magnús Malik er rétthentur og leikur í vinstra horninu. Hann er með mikla og góða skottækni. Það verður gaman að sjá hann blómstra á tímabilinu.

Daníel og Magnús hafa hlotið eldskírn sína með meistaraflokki í vetur á meðan Halldór Ingi á hana eftir og vonandi kemur hún á næstu misserum. Grótta er virkilega ánægt með samningana enda eru þeir mikilvægur liður í framtíðaráformum félagsins.

„Við erum mjög ánægðir að vera búnir að semja við þessa ungu stráka. Þeir voru allir viðloðandi meistaraflokkinn á undirbúningstímabilinu og stóðu sig mjög vel. Það er því eðlileg þróun að þeir stígi næsta skref og verði partur af uppbyggingunni,“ sagði Andri Sigfússon þjálfari Gróttuliðsins.

3.flokkur í draumaferð

3.flokkur karla fór í draumaferð til Þýskalands um miðjan júnímánuð. Strákarnir dvöldu fyrstu fjóra dagana í Gummersbach þar sem þeir æfðu með og léku æfingaleik við heimamenn. Sameiginlegu æfingarnar voru með U17 og U19 ára akademíuliðum Gummersbach. Æfingaleikurinn var gegn U17 ára liðinu og fór hann með fjögurra marka sigri heimamanna, 29-33.

Seinustu þrír dagar ferðarinnar voru í Köln þar sem Final 4 í meistaradeildinni fór fram í glæsilegri Lanxess-íþróttahöllinni. Þar sáu strákarnir hverja stórstjörnuna á fætur annarri og að lokum Barcelona með Viktor Gísla Hallgrímsson innanborðs verða Evrópumeistara eftir frábæra leiki.

Ferðin mun án efa skilja eftir ótal minningar enda vel heppnuð ferð hjá strákunum.

Happdrætti 3. og 4.flokks

Leikmenn yngri flokka Gróttu hafa staðið í ströngu í vetur við að fjárafla fyrir ferðum sínum utan landsteinanna. Núna er komið að happdrætti þar sem fjölmargir glæsilegir vinningar eru í boði. Heildarverðmæti vinninga er rúmlega 1.500.000 kr. Hér að neðan má sjá vinningaskránna.

Einn miði kostar 2.500 kr og þrír miðar kosta 6.000 kr.

Hægt er að kaupa hjá leikmönnum en einnig er hægt að senda tölvupóst á [email protected] og kaupa miða þannig.

Eingöngu verður dregið úr seldum miðum.

Áfram Grótta!

VINNINGASKRÁ

Bessi á HM í Egyptalandi

Bessi Teitsson og U19 ára landslið karla leikur næstu daga á HM í handbolta sem fram fer í Egyptalandi. Liðið leikur í D-riðli ásamt Gíneu, Sádi-Arabíu og Brasilíu.

Eftir riðakeppnina leikur íslenska liðið í miliriðlum og síðan í 8 liða úrslitum ef liðinu vegnar vel. Við flytjum fréttir af gengi Bessa og U19 ára landsliðinu næstu daga.

Fyrsti leikur liðsins er gegn Gíneu og hefst hann núna kl. 09:45. Allir leikir liðsins er sýndir í beinni útsendingu á YouTube síðu IHF áhorfendum að endurgjaldslausu.

Lið Gróttu Bikarmeistarar í 3. Þrepi

Um helgina fór fram Bikarmót 2025 í áhalda- og hópfimleikum, þar sem fremsta fimleikafólk landsins keppti um titlana. Mótið var haldið af Fjölni í Egilshöll, og óhætt er að segja að sannkölluð fimleikaveisla átti sér stað. Grótta sendi sex lið til keppni ásamt tveimur gestum í frjálsu þrepi og 2. þrepi fimleikastigans. Liðin stóðu sig með prýði.

Í 3. þrepi A-deild tryggði lið Gróttu sér titil bikarmeistara með frábæra útkomu, 223.196 stig. Liðið skipuðu Mjöll Jónsdóttir, Sigurrós Ylfa Rúnarsdóttir, Þuríður Katrín Kistinsdóttir, Fanney Petrea L. Arnórsdóttir, Sigríður Lára Indriðadóttir og Sunna Mist Sheehen. Það er einnig vert að nefna að Grótta var með yngsta liðið í keppninni, og óskum við þeim innilega til hamingju með stórkostlegan árangur.

Í 3. þrepi B-deild hafnaði lið Gróttu í 2. sæti, og óskum við stelpunum innilega til hamingju með glæsilegan árangur. Liðið skipuðu Guðrún Jakóbína Eiríksdóttir, Margrét Helga Geirsdóttir, Magnea Margrét Þorsteinsdóttir, Hrefna Höskuldsdóttir Rafnar, Sigurlaug Margrét Pétursdóttir og Mirra Kjartansdóttir.

Hópfimleikadeild Gróttu sendi fjögur lið til keppni, og sýndu liðin miklar framfarir. Lið 3. flokks í A-deild hafnaði í 4. sæti, og verður gaman að fylgjast með þeim á Íslandsmeistaramótinu í hópfimleikum, sem fram fer á Akranesi 10.–13. apríl. Óhætt er að segja að framtíðin sé björt í fimleikadeild Gróttu.