Þórður Þórðarson landsliðsþjálfari U18 kvenna, hefur valið hóp sem tekur þátt í æfingum og leikjum við Svíþjóð. Hópurinn mun hittast til æfinga helgina 25-26.nóvember og þriðjudaginn 28.nóvember 2023. Gróttukonan Arnfríður Auður Arnarsdóttir, betur þekkt sem Aufí, er í hópnum. Þrátt fyrir ungan aldur lék Aufí lykilhlutverk í liði Gróttu í Lengjudeildinni í sumar en hún er einungis 15 ára gömul. Aufí lék 16 leiki í Lengjudeildinni í sumar og skoraði í þeim sjö mörk. Gaman er að segja frá því að Aufí er eini leikmaður hópsins sem fædd er 2008, en aðrir leikmenn eru fæddir árið 2007. Knattspyrnudeild Gróttu er hreykin af því að eiga svona flottan fulltrúa í hópnum. Leikirnir við Svíþjóð munu fara fram á Íslandi 29.nóvember og 1.desember 2023 í Miðgarði Garðabæ. Knattspyrnudeild Gróttu óskar Aufí innilega til hamingju með valið og góðs gengis í verkefninu framundan!
Magnús Örn Helgason, landsliðsþjálfari U15 kvenna, hefur valið hóp sem tekur þátt í UEFA Development Tournament. Gróttukonan Rebekka Sif Brynjarsdóttir hefur verið valin í hópinn. Rebekka er 14 ára gömul og gríðarlega efnileg knattspyrnukona. Hún lék tvo leiki með meistaraflokki Gróttu í Lengjudeildinni í sumar og skoraði í þeim eitt mark. Þá lék hún einnig með 3. flokki kvenna og 4. flokki karla og kvenna í sumar þar sem hún skoraði samtals 30 mörk. Mótið verður haldið í Lissabon í Portúgal dagana 17.-23. nóvember, en liðið æfir í tvígang á Íslandi fyrir brottför. Knattspyrnudeild Gróttu óskar Rebekku innilega til hamingju með valið og góðs gengis á mótinu!
Í gær var greint frá því að Pétur Rögnvaldsson, þjálfari meistaraflokks kvenna, hygðist taka sér frí frá þjálfun eftir farsælt níu ára starf fyrir Gróttu. Við heyrðum hljóðið í Pétri og spjölluðum um frábæran árangur sumarsins hjá stelpunum og tíma hans hjá Gróttu.
Grótta endar í fjórða sæti Lengjudeildarinnar og voru aðeins einum sigri frá því að fara upp um tvær deildir á tveimur árum. Kom þessi árangur þér á óvart?
Nei hann gerði það í rauninni ekki. Jú kannski að við hefðum í lokaumferðinni spilað úrslitaleik um að komast upp í Bestu deildina – ég sá það kannski ekki fyrir – en þegar leið á undirbúningstímabilið var ég viss um að við gætum keppt við öll liðin í deildinni og endað í efri hlutanum.
En hvað er það sem býr til svona árangur. Þið voruð jú nýliðar í deildinni eftir allt saman.
Vissulega vorum við nýliðar en samt sem áður með mjög svipað lið og spilaði í deildinni árið 2021. Þá var kjarninn í liðinu mjög ungur og hann er í raun enn ungur en kominn með talsverða reynslu. Það voru gríðarleg vonbrigði að falla haustið 2021 en upp frá því fór að myndast þetta óútskýranlega hugtak sem kallast liðsheild og hún í bland við gæði leikmanna skapar öflugt lið. Samsetningin liðsins er sömuleiðis frábær – margar heimastelpur í bland við eldri stelpur sem hafa verið lengi í Gróttu. Að viðbættum öflugum nýjum leikmönnum og svo kornungum stelpum sem stíga upp í gott umhverfi.
Hver er ástæðan fyrir því að þú stígur frá borði núna?
Ástæðurnar eru í raun nokkrar. Og þetta er ákvörðun sem ég var nálægt því að taka fyrir tveimur árum en þá vorum við fallin. Maggi (Magnús Örn Helgason) var kominn í vinnu hjá KSÍ og ég vildi ekki skilja við liðið í 2. deild svo ég lét slag standa þegar mér var boðið að taka við. Það var því léttir þegar sæti okkar í Lengjudeildinni var tölfræðilega tryggt í ágúst og ég gat skilið sáttur við. En ein aðalástæðan er sú að ég get ekki varið eins miklum tíma og ég myndi kjósa í þjálfunina. Ég er í annarri vinnu og á næstu dögum stækkar fjölskyldan. Svo hefur líka áhrif að ég hef þjálfað nokkrar í liðinu í sjö til átta ár og þá er stundum óhjákvæmilegt að þjálfara-leikmanna sambandið komist á nokkurs konar endastöð.
Er framtíðin sé björt í kvennaknattspyrnunni á Nesinu?
Já hún er það, ef það verður áfram haldið vel á spöðunum – unnið af metnaði með sterka umgjörð í kringum liðið. Síðustu ár hefur verið unnið öflugt starf í yngri flokkunum og á bak við tjöldin í kringum báða meistaraflokka félagsins. Það einfaldlega skilar sér í uppöldum leikmönnum og góðri og jákvæðri stemningu. Kjarninn í Gróttuliðinu er enn að styrkjast og yngri stelpur að bætast við. Í sumar spilaði Aufí (Arnfríður Auður Arnarsdóttir) stórt hlutverk í liðinu 15 ára gömul og Rebekka (Sif Brynjarsdóttir) kom sterk inn á lokasprettinum aðeins 14 ára gömul. Tvær aðrar á 3. flokks aldri spiluðu með liðinu á undirbúningstímabilinu og það eru fleiri á leiðinni. Í stuttu máli þá hefur Gróttuliðið mikla möguleika á að verða enn betra á næstu árum.
Að lokum – hvað er þér efst í huga þegar þú lítur til baka á árin níu sem þú þjálfaðir hjá Gróttu?
Ótrúlegar minningar. Ég byrjaði að þjálfa 7. flokk kvenna með Jórunni (Maríu Þorsteinsdóttur) í janúar 2015. Mig minnir að Aufí hafi einmitt mætt á sína fyrstu eða aðra æfingu þegar ég byrjaði. Um sumarið hitti ég svo Rebekku sem var þá að æfa í 8. flokki hjá Bjössa (Birni Valdimarssyni) og fékk að spila með okkur á Símamótinu. Það var skemmtilegur endapunktur að þær tvær skildu hafa skorað í lokaleiknum á laugardaginn – fyrir framan troðfulla stúku á Vivaldivellinum.
Eins og nefndi áðan var ég samferða 2003, 2004 og 2005 stelpunum í ansi mörg ár og það hefur verið gaman að fylgjast með þeim þroskast og þróast innan sem utan vallar. Grótta hefur sömuleiðis haft ótrúlega færa þjálfara við störf síðustu árin sem ég hef notið að starfa með, læra af og eignast góða vini.
Vonbrigðatilfinningin sem maður hafði eftir leikinn á laugardaginn var óvanalega fljót að veikjast og upp úr stendur það sem liðinu tókst að áorka og allt sem ég hef fengið að taka þátt í með góðu fólki. Maður er bara með gleðitár í augum.
Við þökkum Pétri kærlega fyrir spjallið og hans framlag til félagsins. Um leið óskum við þjálfurum og leikmönnum mfl. kvk innilega til hamingju með frábært sumar!
Fyrir stuttu tilkynnti Pétur Rögnvaldsson, þjálfari meistaraflokks kvenna, stjórn og leikmönnum að hann hygðist taka sér hvíld frá þjálfun eftir níu ára farsælt starf fyrir knattspyrnudeild Gróttu. Það verður sjónarsviptir af Pétri þar sem hann hefur verið einn burðarásanna í þjálfarahópi félagsins í uppbyggingarstarfi þess á síðustu árum. Drýgstan skerf hefur Pétur þó lagt af mörkum til uppbyggingar kvennaknattspyrnu á Seltjarnarnesi og í Vesturbænum.
Pétur hóf störf hjá knattspyrnudeild Gróttu í ársbyrjun 2015 og hefur starfað þar óslitið síðan. Hann þjálfaði bæði stelpur og stráka í yngri flokkunum og þar af fjögur ár í eldri flokkum kvenna. Fyrst 4. flokk Gróttu/KR tímabilin 2016 og 2017 og síðar 3. flokkinn í tvö ár við góðan orðstír. Í ársbyrjun 2019 tók hann við sem aðstoðarþjálfari Magnúsar Arnar Helgasonar hjá meistaraflokki kvenna í Gróttu sem þá lék í 2. deild. Tveimur árum síðar steig hann upp að hlið Magnúsar sem aðalþjálfari liðsins.
Eftir dramatískt fall í 2. deild haustið 2021 tók Pétur við sem aðalþjálfari enda hafði uppbygging gengið vel og allar forsendur til að fara rakleiðis aftur upp í Lengjudeildina. Það tókst Gróttukonum með Pétur í brúnni í fyrra og í sumar náði liðið besta árangri í sögu meistaraflokks kvenna. Eins og kunnugt er spilaði Grótta hreinan úrslitaleik við Fylki um sæti í Bestu deildinni fyrir framan 800 áhorfendur á Vivaldivellinum laugardaginn 9. september. Eftir jafnan leik hafði Fylkir sigur en sú niðurstaða varpar ekki skugga á stórkostlegan árangur Gróttuhópsins.
Gróttufólk þakkar Pétri ómetanlegt starf í þágu knattspyrnudeildar og félagsins. Það er ekki ofsagt að hann hafi gegnt lykilhlutverki í starfinu; borið hag félagsins fyrir brjósti, alltaf með hjartað á réttum stað og hugann við að byggja upp heilsteypta einstaklinga og öfluga liðsheild. Jafnframt óskum við Pétri velfarnaðar í öllu því sem hann tekur sér fyrir hendur í framtíðinni og bjóðum hann velkominn í bakvarðasveitina!
Grótta mætti Fylki á Vivaldivellinum laugardaginn 9. september í hreinum úrslitaleik um hvort liðið myndi komast upp í Bestu deildina að ári. Fáir höfðu spáð því fyrir tímabilið að Grótta yrði í þessari stöðu, liðið nýkomið upp úr 2. deild eftir stutt stopp þar síðasta sumar, en liðið sýndi svo sannarlega í sumar hvað í þeim býr. Grótta komst yfir gegn Fylki á ’23 mínútu með frábæru skallamarki frá hinni 15 ára Arnfríði Auði Arnarsdóttur, betur þekktri sem Aufí. Fylki tókst að jafna metin á ’54 mínútu og stuttu síðar skoruðu þær sitt annað mark. Grótta jafnaði metin á ’73 mínútu eftir að hin 14 ára Rebekka Sif Brynjarsdóttir lét vaða fyrir utan teig og skoraði geggjað mark fyrir Gróttu en hún var aðeins búin að vera inná í nokkrar mínútur þegar hún skoraði. Því miður tókst Fylkiskonum að komast yfir á ný á ’84 mínútu og endaði leikurinn 2-3 fyrir Fylki sem tryggðu sér þar með sæti í Bestu deildinni að ári. Leikurinn var gríðarlega spennandi og var frábær mæting á völlinn. Umgjörðin í kringum leikinn var fyrsta flokks og stóðu sjálfboðaliðar Gróttu í ströngu til að gera hana sem allra flottasta, eins og sást vel. Gróttukonur mega svo sannarlega ganga stoltar frá borði eftir frábært sumar þar sem þær náðu besta árangri kvennaliðs Gróttu frá upphafi. Þrátt fyrir tapið á laugardaginn er hægt að fagna mörgu – í leiknum skoruðu tvær ungar og efnilegar Gróttukonur sem eiga framtíðina fyrir sér, liðið hefur aldrei endað jafn ofarlega í Lengjudeildinni og fengið jafn mörg stig né skorað jafn mörg mörk og í ár og aldrei hefur verið jafn vel mætt á leik hjá kvennaliðinu líkt og á laugardaginn. Það má einnig nefna það að Grótta átti markahæsta leikmann Lengjudeildarinnar, en Hannah Abraham skoraði 16 mörk fyrir Gróttu í sumar og er markahæsti leikmaður Lengjudeildarinnar!
Meistaraflokkur kvenna þakkar fyrir stuðninginn í sumar og hlakkar til að sjá sem flesta á vellinum í Lengjudeildinni á næsta ári.
Orri Steinn Óskarsson lék sinn fyrsta A-landsleik þegar Ísland mætti Lúxemborg í undankeppni EM 2024 föstudaginn 8. september. Orri kom inn á í hálfleik en leikurinn tapaðist 1-3. Orri var síðan í byrjunarliði Íslands á Laugardalsvelli mánudaginn 11. september þegar liðið tók á móti Bosníu og Hersegóvínu. Ísland vann dramatískan 1-0 sigur en Alfreð Finnbogason skoraði mark Íslands í uppbótartíma. Orri Steinn spilaði allan síðari leikinn og stóð sig gríðarlega vel! Hákon Rafn Valdimarsson var einnig í landsliðshópnum og var á bekk Íslands í báðum leikjunum. Knattspyrnudeild Gróttu er gríðarlega stolt af Orra og Hákoni og óskum við Orra Steini innilega til hamingju með fyrstu landsleikina! Svo sannarlega frábærar fyrirmyndir fyrir unga Gróttukrakka!
3. flokkur kvenna kom heim á þriðjudagsmorgun eftir frábæra viku á USA Cup í Minnesota í Bandaríkjunum. Ferðin var virkilega vel heppnuð í alla staði en 24 stelpur fóru á mótið með þjálfurum og fararstjórum. Stelpurnar kepptu á USA Cup en yfir 1.200 lið léku á mótinu frá ýmsum heimshornum. Stelpurnar úr Gróttu/KR voru til fyrirmyndar innan sem utan vallar og voru félögum sínum svo sannarlega til sóma. Báðum liðum gekk mjög vel á mótinu og stóðu stelpurnar sig gríðarlega vel. Lið 1 vann alla sína leiki og stóðu uppi sem sigurvegarar í U16 með markatöluna 28-3! Lið 2 tapaði einum leik á mótinu sem var á móti sterku liði Fylkis í 8-liða úrslitum og það í framlengingu og enduðu stelpurnar með markatöluna 15-3. Fararstjórarnir stóðu sig ekki síður vel og stóðu vaktina frá morgni til kvölds og héldu vel utan um hópinn. Stelpurnar sköpuðu svo sannarlega dýrmætar minningar í ferðinni sem munu fylgja þeim um ókomna tíð. Knattspyrnudeild Gróttu óskar stelpunum innilega til hamingju með þennan frábæra árangur! 👏🏽 Geggjaðar 💙🖤
Þeir Gabríel Hrannar Eyjólfsson og Paul Westren munu leiða starf yngri flokka knattspyrnudeildar Gróttu næstu tvö árin en þeir skrifuðu undir samninga þess efnis í dag. Þeir munu sinna yfirþjálfarastörfum í sameiningu og þjálfa í yngri flokkunum. Auk þess verða þeir svokallaðir „transition“ þjálfarar hjá félaginu, Paul hjá strákunum og Gabríel hjá stelpunum, og munu styðja við bakið á ungum leikmönnum sem eru að stíga sín fyrstu skref í meistaraflokki.
Paul er Englendingur sem fæddur árið 1980 og kom til starfa hjá Gróttu sumarið 2021. Hann hefur komið víða við á sínum ferli og meðal annars þjálfað í Síerra Leóne, Kína og Lesótó. Paul tók við starfi yfirþjálfara síðasta haust og hefur stýrt deildinni síðustu mánuði á krefjandi tímum þar sem mikil hreyfing hefur verið á þjálfarahópnum.
Gabríel er fæddur árið 1999 og skipti yfir í Gróttu úr KR árið 2018. Þrátt fyrir ungan aldur hefur hann talsverða reynslu af yngri flokka þjálfun og útskrifaðist á dögunum sem íþróttafræðingur frá Háskólanum í Reykjavík. Gabríel er núverandi þjálfari 4. flokks karla, skólastjóri knattspyrnuskólans og leikmaður í meistaraflokki Gróttu.
Hildur Ólafsdóttir hjá barna- og unglingaráði segir spennandi tíma framundan hjá knattspyrnudeildinni: „Við erum gríðarlega ánægð með að hafa samið við bæði Gabríel og Paul til tveggja ára. Markmiðið er að bjóða öllum Gróttukrökkum upp á framúrskarandi gott starf og teljum að það muni klárlega takast með góðum hópi þjálfara og þá Gabríel og Paul við stjórnvöllin.“
Yfirþjálfararnir höfðu þetta að segja þegar skrifað var undir samningana í morgun:
Paul: „Ég er mjög glaður að framlengja samninginn minn og halda áfram að vinna fyrir Gróttu. Eitt af einkennum félagsins er að halda vel utan um uppalda leikmenn og hjálpa þeim að taka skrefið upp í meistaraflokk og því viljum við halda áfram. Grótta er fjölskylduklúbbur og við viljum styðja við bakið á öllum sem taka þátt í starfinu og búa til jákvætt og hvetjandi umhverfi á Vivaldivellinum.“
Gabríel: „Ég er gríðarlega spenntur að halda áfram og efla það góða starf sem unnið hefur verið í Knattspyrnudeild Gróttu undanfarin ár. Ég trúi því innilega að í Gróttu sé unnið eitt besta yngri flokka starf á landinu – félagið hefur alið af sér leikmenn sem eiga möguleika á að ná í fremstu röð og samfélagslegi þátturinn hefur sömuleiðis verið sterkur þó að alltaf megi gera betur. Það er mikill heiður að fá tækifæri til að hafa áhrif og vera í forystuhlutverki.“
Gróttukonan Rakel Lóa Brynjarsdóttir hefur verið valin í æfingahóp U19 ára landsliðsins. Margrét Magnúsdóttir, landsliðsþjálfari U19 kvenna, hefur valið hóp sem æfir dagana 16.-18. janúar. Æfingarnar fara fram í Miðgarði í Garðabæ, en einnig leikur liðið æfingaleik við Stjörnuna á Samsungvellinum. Liðið undirbýr sig fyrir æfingamót sem það tekur þátt í á Algarve í Portúgal 14.-22. febrúar næstkomandi. Til hamingju Rakel og gangi þér vel!
Gróttustelpurnar Rebekka Sif Brynjarsdóttir og Sara Björk Arnarsdóttir hafa verið valdar á úrtaksæfingar U15 ára landsliðsins. Magnús Örn Helgason, landsliðsþjálfari U15 kvenna, hefur valið 30 stelpna hóp fyrir úrtaksæfingar dagana 11.-13. janúar. Æfingarnar fara fram í Miðgarði í Garðabæ. Vel gert stelpur og gangi ykkur vel!
