Knattspyrnuskólanum lokið

Þá er enn öðru farsælu sumri hjá knattspyrnuskóla Gróttu lokið, en hann var starfrækur frá 10. júní til 31. júlí. Góð mæting var á öll fjögur námskeiðin en tæplega 380 börn voru skráð á námskeiðin. Til viðbótar því voru um 100 börn sem sóttu sumarnámskeið fyrir 4. og 5. flokk. Iðkendur í skólanum eru bæði krakkar sem hafa æft lengi og einnig krakkar sem eru að prófa fótbolta í fyrsta skipti, og lögð er áhersla á að kenna fótbolta í gegnum skemmtilega leiki og æfingar. Námskeiðin voru 4 talsins, í tvær vikur í senn, og í lok hvers námskeiðs var krökkunum blandað saman og skipt í landslið og keppt í HM. Að keppni lokinni var síðan pulsupartí og allir fóru glaðir inn í helgina. Áhugasamir og fjörugir krakkar, efnilegir unglingar og gott veður var virkilega góð blanda sem varð til þess að námskeiðin gengu gríðarlega vel. Hér má sjá myndir frá starfinu í sumar, en einnig eru fleiri myndir og myndbönd á instagram.com/grottasport. 

Starfsmenn knattspyrnuskólans þakka fyrir sumarið og hlakka til að sjá sem flesta aftur næsta sumar!

    Grótta með 12 lið á Símamótinu

    Hátt í 80 Gróttustelpur kepptu á Símamótinu í Kópavogi helgina 10-12. júlí. Um 2400 stelpur léku á mótinu sem er stærsta knattspyrnumót landsins!
    5. flokkur Gróttu tefldi fram fjórum liðum sem samanstóðu af 31 stelpu, 6. flokkur kvenna var með 16 stelpur í þremur liðum og 7. flokkur kvenna fór með 28 stelpur í fimm liðum. Mótið var frá föstudegi til sunnudags og leikið var frá morgni til eftirmiðdags.
    Grótta náði góðum árangri á mótinu í öllum flokkum. Grótta 1 í 7. flokki kvenna vann sinn riðil eftir 3-2 sigur gegn Njarðvík 1 í úrslitum og fóru því með bikar heim! Grótta 1 í 6. flokki kvenna komst í undanúrslit en töpuðu fyrir Hetti 1 2-1, og enduðu í 4. sæti. Grótta 1 í 5. flokki kvenna komst einnig í undanúrslit A-liðakeppni mótsins en töpuðu 2-1 fyrir Þrótti sem stóðu síðan uppi sem sigurvegarari, en Grótta endaði í 4. sæti.
    Gróttustelpurnar upplifðu bæði sigra, töp og jafntefli, en leikgleðin var aldrei langt undan. Það er mikil upplifun að spila á Símamótinu og alltaf mikið tilhlökkunarefni hjá ungum knattspyrnukonum. Keppendum frá Gróttu fer fjölgandi með ári hverju sem er skýrt merki um uppgang kvennafótboltans á Nesinu.
    Stelpurnar stóðu sig með prýði á mótinu og voru Gróttu til sóma 👏🏼
    Myndir: Eyjólfur Garðarsson og Sporthero.

    Ungir leikmenn semja við Gróttu

    Í morgun skrifaði knattspyrnudeild Gróttu undir samninga út árið 2021 við sex leikmenn meistaraflokks kvenna. Um er að ræða stelpur á aldrinum 16-19 ára sem komu flestar inn í liðið í fyrra og hafa allar spilað með Gróttu í Lengjudeildinni í sumar. 

    Þetta eru þær Tinna Brá Magnúsdóttir (16 ára), Rakel Lóa Brynjarsdóttir (16 ára), María Lovísa Jónasdóttir (17 ára), Lovísa Scheving (17 ára), Helga Rakel Fjalarsdóttir Hagalín (19 ára) og Edda Björg Eiríksdóttir (19 ára). 

    Tinna Brá, Rakel Lóa, María Lovísa og Lovísa eru allar uppaldar í Gróttu. Tinna er markmaður, Rakel getur bæði leikið sem varnar- og miðjumaður, María leikur sem framherji eða kantmaður og Lovísa dreifir spilinu á miðjunni.

    Helga Rakel er uppalin í Vesturbænum og lék upp yngri flokkana með KR og Gróttu/KR. Helga, sem leikur sem miðjumaður, var á láni hjá Gróttu í fyrra en skipti alfarið yfir síðasta haust. Edda Björg er uppalin á Höfn – hún lék með Sindra til 15 ára aldurs þar til hún skipti yfir í Val. Edda, sem getur bæði leikið sem kantmaður og bakvörður, gekk til liðs við Gróttu í vetur. 

    „Það er mikið gleðiefni fyrir Gróttu að hafa samið við þessar frambærilegu stelpur. Þær hafa allar staðið sig vel og eru klárar í að halda áfram af fullum krafti í uppbyggingunni í Gróttu.“ sagði Magnús Örn Helgason þjálfari meistaraflokks kvenna.

    „Hér erum við að semja við sex stelpur sem hafa allar spilað stórt hlutverk í sumar og munu bara eflast á næstu  árum. Framtíðin er sannarlega björt hjá meistaraflokki kvenna.“ sagði Birgir Tjörvi Pétursson formaður knattspyrnudeildar þegar samningarnir voru undirritaðir.

    Tinna Brá Magnúsdóttir, Lovísa Scheving, Rakel Lóa Brynjarsdóttir, María Lovísa Jónasdóttir og Birgir Tjörvi Pétursson.

    Edda Björg Eiríksdóttir og Helga Rakel Fjalarsdóttir Hagalín.

    5. flokkur karla á N1 mótinu

    5 flokkur karla hélt til Akureyrar í síðustu viku til að spila á hinu fræga N1 móti. Mótið hófst á miðvikudegi og spilað var til laugardags. Grótta fór með fimm lið á mótið og stóðu drengirnir sig með prýði innan sem utan vallar! Fleiri skemmtilegar myndir má sjá á instagram síðu knattspyrnudeildarinnar @grottasport

    Knattspyrnudeildin semur við Arnþór Pál

    Nú á dögunum var gengið frá leikmannasamningi við Arnþór Pál Hafsteinsson til næstu tveggja ára. Arnþór Páll er fæddur árið 2002 og er uppalinn hjá Gróttu. Ásamt því að spila með 2. flokki félagsins hefur hann einnig verið að spila með Kríu. Arnþór er gríðarlega efnilegur leikmaður og einn af framtíðarmönnum félagsins. Knattspyrnudeildin er því mjög ánægð með að Arnþór hafi skrifað undir samning við uppeldisfélagið sitt. Það verður spennandi að sjá hann vaxa og þroskast á næstu misserum.

    6. flokkur karla á Orkumótinu í Eyjum

    Eldra ár 6. flokks karla hélt til Vestmannaeyja í síðustu viku til að spila á Orkumótinu. Grótta fór með þrjú lið á mótið sem samanstóðu af 24 drengjum. Mótið gekk mjög vel fyrir sig og var hópurinn vel samstilltur og var ótrúlega góður andi í öllum sem voru í Gróttu. Öll liðin stóðu sig frábærlega á vellinum, spilið hjá drengjunum til fyrirmyndar og voru allir staðráðnir í að standa sig eins vel og þeir gátu fyrir liðsfélagana sína og sitt lið. Utan vallar voru þeir til fyrirmyndar og voru flottir fulltrúar Gróttu.

    5. flokkur kvenna á TM-mótinu í Eyjum

    Á dögunum héldu pæjurnar í 5. flokki Gróttu á TM-mótið í Vestmannaeyjum, betur þekkt sem Pæjumótið. Annað árið í röð fóru 34 stelpur frá Gróttu sem skipuðu fjögur lið, hvorki meira né minna!
    Grótta1 gerði sér lítið fyrir og endaði í 4. sæti mótsins sem er besti árangur Gróttu frá upphafi. Ennfremur jöfnun á besta árangri 5. flokks Gróttu á stórmóti í en A-lið 5.fl.kk hjá Gróttu endaði í 4. sæti á N1-mótinu árið 2009. Arnfríður Auður Arnarsdóttir var fulltrúi Gróttu í landsleiknum og skoraði tvö mörk fyrir framan troðfulla stúku. Í mótslok var Aufí, eins og hún er oftast kölluð, valin í úrvalslið mótsins.
    Grótta2 byrjaði brösuglega en komst svo á þvílíka siglingu og sigraði alla sína leiki á öðrum degi. Stelpurnar héldu áfram að spila vel á lokadeginum og voru ekki langt frá því að komast í úrslit í sinni deild. Enduðu sem fimmta hæsta B-lið mótsins.
    Grótta3 byrjaði hægt en óx jafnt og þétt eftir því sem leið á mótið. Sama má í raun segja um stelpurnar í Gróttu4 en þar voru allar á sínu fyrsta Pæjumóti og þurftu því sinn tíma til að venjast aðstæður.
    Auk fótboltans fór Gróttuliðið í skemmtilegra siglingu og tók þátt í hæfileikakeppni. Stelpurnar voru Gróttu til mikils sóma á móti og mikið gleðiefni að svo stórir og glæsilegir hópar stelpna séu nú á fleygiferð í fótbolta hjá Gróttu.

    7. flokkur karla á Norðurálsmótinu

    Helgina 19.-21. júní hélt 7. flokkur karla á Akranes til að spila á hinu fræga Norðurálsmóti. Grótta fór með 39 drengi í sjö liðum á mótið svo það var nóg um að vera hjá strákunum og þjálfurum. Spilað var á Akranesi þrjá daga í röð, föstudag til sunnudag, og gist á Skaganum. Margir voru að fara á sitt fyrsta stórmót og því mikil spenna í hópnum. Mótið gekk mjög vel hjá drengjunum og allir fóru glaðir heim, þótt margir hefðu helst vilja vera aðeins lengur 😊

    7. flokkur kvenna á Kristalsmóti Gróttu

    Kristalsmót Gróttu fór fram þann 21. júní á Vivaldivellinum en á mótið var fyrir 7. flokk kvenna. Um 200 stelpur mættu á mótið frá Gróttu, Val, Stjörnunni, Fylki, Álftanesi, HK og FH. Sólin skein á Vivaldivellinum og mótið gekk gríðarlega vel! Allir fóru heim með medalíu, Kristal og bros á vör.

    6. flokkur kvenna á Steinullarmóti Tindastóls

    15 stelpur úr 6. flokki kvenna fóru á Steinullarmót Tindastóls síðustu helgi. Stelpurnar stóðu sig vel innan sem utan vallar og gekk mótið mjög vel fyrir sig. Það er alltaf mikil upplifun að fara á gistimót og spenningurinn var því búinn að vera mikill. Grótta tefldi fram þremur liðum á mótinu en spilað var á laugardegi og sunnudegi, ásamt því að brasa ýmislegt þess á milli. Næst á dagskrá hjá stelpunum er Símamótið og eftirvæntingin ekki síðri fyrir því!