Katrín Anna er íþróttakona æskunnar 2021

Katrín Anna Ásmundsdóttir er íþróttakona æskunnar fyrir árið 2021 hjá Gróttu.
Úr umsögn handknattleiksdeildar um Katrínu Önnu:
Katrín Anna er leikmaður meistaraflokks kvenna og 3.flokks félagsins. Hún er fædd árið 2004 og er örvhentur hornamaður. Þrátt fyrir ungan aldur er þetta þriðja tímabil Katrínar Önnu með meistaraflokki Gróttu. Hún skoraði 51 mark í deildinni í fyrra þegar liðið komst alla leið í úrslit í umspili um sæti í Olísdeildinni en tapaði í úrslitaeinvígi við Olísdeildarlið HK. Katrín Anna hefur sýnt með sinni frammistöðu að hún er einn albesti örvhenti hornamaður deildarinnar. Á lokahófi meistaraflokks í vor var Katrín Anna valinn efnilegasti leikmaður liðsins.

Katrín Anna hefur verið fastamaður í unglingalandslið Íslands og var tvívegis valin í keppnisferðir með liðinu á árinu. Í sumar lék U17 ára landslið Íslands í Litháen á Evrópumóti B-landsliða. Þar komst liðið alla leið í úrslitaleik en tapaði honum naumlega. Katrín Anna lék stórt hlutverk með liðinu og stóð sig frábærlega. Núna í haust var hún aftur valin og nú til keppni í Serbíu þar sem liðið lék við Slóvena, Slóvaka og Serba um laust sæti á Evrópumót A-landsliða næstkomandi sumar. Því miður tapaði liðið aftur úrslitaleik og nú gegn Serbíu. Aftur lék Katrín Anna vel með liðinu.
Katrín Anna er félagsmaður mikill og tekur virkan þátt í starfi félagsins. Í sumar þjálfari Katrín Anna í Handboltaskóla Gróttu og stóð sig vel þar.

Við fórum þá leið í ár að framleiða myndbönd um verðlaunahafa í stað þess að hafa athöfn. 
Sérstakar þakkir fá Fjalar Sigurðarson, Lilja Nótt Þórarinsdóttir og Jói B (Audioland.is) fyrir óeigingjarnt framlag til myndbandagerðarinnar.

Pétur Theodór er íþróttamaður Gróttu 2021

Pétur Theodór Árnason  er íþróttamaður Gróttu árið 2021. 

Úr umsögn Knattspyrnudeildar um Pétur.
Pétur er 26 ára gamall og er fæddur og uppalinn Gróttumaður. Hann lék sinn fyrsta leik í meistaraflokki aðeins 16 ára gamall en þá lék liðið 1. deild. Eftir að hafa orðið fyrir og loks sigrast á afar erfiðum meiðslum blés Pétur nýju lífi í ferilinn og gekk til liðs við Gróttu um mitt sumar 2018. Var Pétur mikilvægur hlekkur í að tryggja liðinu sæti í efstu deild, í fyrsta skipti í sögu félagsins.

Eftir erfitt ár í efstu deild kom Pétur tvíefldur til baka sl. sumar og þegar yfir lauk hafði hann skorað 26 mörk í 23 leikjum í deild og bikar. Pétur var vafalaust einn af bestu mönnum liðsins og deildarinnar í sumar og hjó nærri um hálfrar aldar gömlu markameti í næst efstu deild. Frammistaða hans vakti athygli liða í efstu deild og eftir lok tímabils gekk hann í raðir Breiðabliks. 

Við fórum þá leið í ár að framleiða myndbönd um verðlaunahafa í stað þess að hafa athöfn. 

Sérstakar þakkir fá Fjalar Sigurðarson, Lilja Nótt Þórarinsdóttir og Jói B (Audioland.is) fyrir óeigingjarnt framlag til myndbandagerðarinnar.


Nanna Guðmundsdóttir íþróttakona Gróttu 2021

Nanna Guðmundsdóttir er íþróttakona Gróttu árið 2021. 
Úr umsögn Fimleikadeildar um Nönnu. Nanna Guðmundsdóttir er í hópi fremstu áhaldafimleikakvenna landsins og hefur lagt mikið á sig til komast á þann stað sem hún er á í dag.  Nanna varð Íslandsmeistari í fjölþraut á Íslandsmótinu sem var haldið í mars. Þetta var hennar fyrsti Íslandsmeistaratitilll í fjölþraut í kvennaflokki. Nanna var valin í úrvalshóp kvenna hjá FSÍ árið 2021. Nanna var í landsliði Íslands á Evrópumótinu í áhaldafimleikum sem var haldið í Sviss dagana 21. – 25. apríl. Nanna var með besta árangur Íslenskra landsliðsins í fjölþraut og hæstu stig sem íslensk fimleikakona fékk á árinu. Hún fékk samtals 47,032 stig sem að eru hæstu stig sem hún hefur fengið í fjölþraut. Hennar besti árangur var á gólfi þar sem hún varð í 40. sæti af 91 keppanda.

Hún var í landsliði Íslands á Heimsmeistaramótinu í áhaldafimleikum sem var haldið í Japan dagana 18. – 24. október. Hún var efst íslenskra kvenna á einstökum áhöldum, en hún skoraði 12.000 stig á gólfi og fékk hrós frá yfirdómara á gólfi fyrir „perfect artistry“. Hún varð í 39. sæti af alls 82 keppendum. 


Við fórum þá leið í ár að framleiða myndbönd um verðlaunahafa í stað þess að hafa athöfn. Sérstakar þakkir fá Fjalar Sigurðarson, Lilja Nótt Þórarinsdóttir og Jói B (Audioland.is) fyrir óeigingjarnt framlag til myndbandagerðarinnar. 

Smitgát og sóttkví í íþróttum

Af gefnu tilefni vil Íþrótta- og Ólympíusamband Íslands minna á leiðbeiningar um smitrakningu í íþróttum sem má nálgast hér. Einnig er hægt að skoða viðmið smitrakningateymis hér á covid.is.

Það hefur líklega ekki farið framhjá neinum að smittölur í samfélaginu eru ansi háar þessa dagana og því hefur verið mikið að gera hjá smitrakningarteyminu. Ekki er alltaf hægt að ná í smitrakningarteymið til að fá svör og þegar upp kemur smit á æfingu eða í íþróttakeppni er gott ef þjálfarar og aðrir sem koma að skipulaginu séu meðvitaðir um ofangreindar leiðbeiningar og geti brugðist við á viðeigandi hátt.

Í leiðbeiningunum er hægt að sjá þau viðmið sem smitrakningarteymið notast við en auðvitað eru aðstæður mismunandi og geta verið flóknar í íþróttahreyfingunni. Ef upp kemur smit í ykkar röðum skulu þið endilega styðjast við leiðbeiningarnar og sinna þessu eftir bestu getu miðað við þær upplýsingar sem þið hafið hverju sinni.

Hér er hægt að lesa allt um smitgát og hér um sóttkví en að lokum er vert að benda á breyttar reglur um sóttkví fyrir einstaklinga sem hafa verið þríbólusettir eða fengið tvær bólusetningar og fengið COVID-19. Allt um nýja reglugerð í tengslum við sóttkví má lesa hér á vef Heilbrigðisráðuneytisins.

Ný lög um frádráttarbæra styrki til íþróttafélaga

Með nýjum lögum sem samþykkt voru 1. nóvember síðastliðinn geta einstaklingar nú styrkt Gróttu um allt að 350.000 krónur en að lágmarki 10.000 krónur á ári sem er frádráttarbært frá skattskyldum tekjum.

Fyrirtækjum er heimilt að draga frá skattstofni allt að 1,5% af rekstrartekjum.

Svona er ferlið:
Þú millifærir upphæð að eigin vali að lágmarki kr. 10.000 inn á reikning Gróttu:
0512-14-405405, kt. 700371-0779

Sendir tölvupóst með eftirfarandi upplýsingum á grotta@grotta.is

  • Nafn greiðanda
  • Kennitala greiðanda
  • Fjárhæð framlags
  • Greiðsludagur

Einnig þarf að tilgreina hvaða deild viðkomandi vill styrkja óski greiðandi eftir því, annars fara öll framlög í sérstakan sjóð sem aðalstjórn síðan úthlutar til allra deilda.

Grótta gefur út kvittun til greiðanda þar sem kemur fram nafn og kennitala greiðanda og fjárhæð framlags.

Til að geta nýtt sér heimildina fyrir 2021 þarf greiðsla að hafa borist fyrir 30. desember nk.

Íþróttafélagið Grótta þakkar kærlega fyrir allan ómetanlegan stuðning í gegnum tíðina.

Jólakort Gróttu 2021

Jólakortsamkeppni Gróttu var haldin í þriðja skipti nú fyrir jólin. 
Eins og fyrri árin efndum við til teiknisamkeppni í 4. bekk Mýrarhúsaskóla um að velja teikningu sem myndi príða jólakortið í ár.
Guðmunda Margrét Jónsdóttir átti teikninguna sem varð hlutskörpust og hún prýðir jólakort félagsins árið 2021.   Auk þess voru veitt verðlaun fyrir 3 aðrar teikningar en þær teiknuðu Elmar Darri Magnússon, Sólveig Kristjana Hafstein og Sylvía Guðrún Sölvadóttir. Við viljum þakka skólastjórnendum í Mýrarhúsaskóla fyrir samstarfið í ár og er þessi viðburður orðinn hefð hjá félaginu.

Guðmunda Margrét Jónsdóttir
Guðmunda Margrét Jónsdóttir teiknaði Jólakort Gróttu 2021.

STARFSMANNAKYNNING GRÓTTU

Nafn: Hrafnhildur Thoroddssen
Gælunafn: Bídó
Ég ólst upp mestmegnis í Keflavík 
Fyrri störf: Ég var byrjuð að vinna sem sendill á lögfræðisstofu föður míns. Ári síðar hóf ég störf á smurbrauðsstofunni Birninum á Njálsgötu og vann þar með skóla og öll sumur til sextán ára aldurs en þá lenti ég í bílslysi á leið til vinnu.   Á Birninum var ég þátttakandi í matseld, þjónustu og þrifum auk þess sem ég smurði snittur og gerði brauðtertur fyrir veislur. Tvö síðustu ár mín á Birninum leysti ég eigendur af í fríum og bar ábyrgð á starfsseminni. 

Ég lauk stúdentsprófi frá MH árið 2002 en ég var nemandi í skólanum fyrir slysið. Fyrir þann tíma hafði ég starfað á kassa í Hagkaupum. Eftir stúdentsprófið starfaði ég hjá Össur stoðtækjaþjónustu eða þar til ég hóf störf hjá íþróttamiðstöð Seltjarnaness.    

Árið 1994 fór ég til Shangai í Kína til skoðunar vegna lömunar minnar sem lauk með því að kínverskur skurðlæknir kom tvisvar til Íslands og gerði á mér tilraunaskurðaðgerðir. Eftir það fór ég fjórum sinnum til Moskvu í Rússlandi í rafmagnsmeðferðir, tvisvar sinnum til Burgundy í Frakklandi í leisermeðferðir og tvisvar sinnum til London í sértæka sjúkraþjálfun.  Í mörg ár æfði ég stíft göngu á spelkum.  Allt þetta hefur verið mikil vinna. 

Hve lengi starfað hjá Gróttu: Ég er búinn að vinna hjá Gróttu í 6 ár.  
Áhugamál:  Hef gaman að horfa á sjónvarp eða lesa góða bók. 
Stundaðir þú íþróttir: Ég stundaði ekki beint íþróttir en ég var í leikfimi hjá Sissa.
Bíómynd í uppáhaldi: No country for old man er í sérstöku uppáhaldi en ég hef líka gaman af Woody Allen myndunum.  
Uppáhalds tónlistarmaður: Bubbi Morthens sem er nýji nágranni minn.
Hvað færðu að borða á Aðfangadag: Hamborgarahrygg.
Skilaboð til foreldra:  Gleðileg jól til allra 

STARFSMANNAKYNNING GRÓTTU

Nafn: Sólveig Soffía Herbertsdóttir
Gælunafn: Solla
Hvar ólstu upp:  Akureyri
Fyrri störf (nefna 2-3):  Var lengi á lyfjadeildinni á sjúkrahúsinu á Akureyri. Einnig vann ég á hamborgastaðnum á Lækjartorgi um tíma.
Hve lengi starfað hjá Gróttu: Ég hóf störf hjá Gróttu: Búin að vera í 5 ár.   
Áhugamál: Ferðalög og útivera, geng mikið. 
Stundaðir þú íþróttir:  nei en var mikið í sundi sem krakki.
Bíómynd í uppáhaldi: Hef alltaf gaman af spennu og löggu myndum.
Uppáhalds matur: Lambahryggur og meðlæti, svo er ég hrifin af grænmetisréttum.
Skilaboð til foreldra:  Mér finnst krakkarnir vera algjörir snillingar, það sem vellur uppúr þeim er oft alveg ótrúlegt. 

STARFSMANNAKYNNING GRÓTTU

Nafn: Reynir Hólm Jónsson  
Ræstitæknir í fimleikasal Gróttu
Fyrri störf: Byrjaði sem messagutti hjá Eimskip haustið 1966 (þá 14 ára) síðar var ég háseti, lærði svo skipstjórn og endaði sem yngsti skipstjóri hjá Eimskip 1977. Ári síðar fór ég í land og gerðist verkstjóri.  Þegar ég hætti hjá Eimskip árið 2017 átti ég lengstan starfsaldur hjá fyrirtækinu.
Hve lengi starfað hjá Gróttu: Ég hóf störf hjá Gróttu : Hóf störf í byrjun árs 2019.  
Hvar ólstu upp:  Ég ólst upp í Norðurmýrinni í Reykjavík.
Áhugamál: Útivera, veiðar og golf. 
Stundaðir þú íþróttir:  Stundaði knattspyrnu með Val.
Uppáhalds tónlistarmenn:  Uppáhalds hljómsveit er ELO en einnig fíla ég Metallica.  Þegar ég þríf fimleikasalinn eldnsnemma á morgnana þá blasta ég stundum Metallica.
Bíómynd í uppáhaldi: Forrest Gump og svo voru Dirty Harry myndirnar góðar.
Uppáhalds matur:  Skötuselur innvafinn í beikon – grillað úti.
Skilaboð til foreldra: Að kenna börnunum að ganga vel um.  

Skráning í stubbafimi vorönn 2022 hefst 1. desember

Skráning í stubbafimi vorönn 2022 hefst 1. desember inn á vefverslun sportabler https://www.sportabler.com/shop/grotta/

Stubbafimi er ætluð yngstu iðkendunum.

Áhersla lögð á grundvallarhreyfigetu og líkamsvitund með fjölbreyttum æfingum.

Markmiðið er að vekja áhuga á fimleikum, byggja upp góðan grunn fyrir áframhaldandi fimleikaiðkun, kenna jákvæðan aga og reglur sem gilda í salnum.

Kennt er á laugardagsmorgnum:
Iðkendur fæddir 2019 eru kl. 08:50 – 09:40.
Iðkendur fæddir 2018 eru kl. 09:50 – 10:40.
Iðkendur fæddir 2017 eru kl. 10:50 – 11:40.

Fyrsti stubbatími vorannar verður laugardaginn 8. janúar og sá síðasti 30. apríl.

Fyrirkomulagið er á þann hátt að börn fædd 2019 eru með foreldri á æfingu en iðkendur fæddir 2018 og 2017 æfa án foreldra í tímunum.