Námskeið í fullorðinsfimleikum

Fimleikadeild Gróttu býður upp á 14 skipta námskeið í fullorðinsfimleikum sem hefst þriðjudaginn 3. mars og lýkur þriðjudaginn 28. apríl.

Ekki verður æfing 31. mars (páskar), 2. apríl (páskar) og 23. apríl (sumardagurinn fyrsti).

Kennt verður á þriðjudags- og fimmtudagskvöldum frá kl. 20:00–21:15 í fimleikasal Gróttu. Ekki er gerð krafa um bakgrunn í fimleikum. Hægt er að velja um að æfa einu sinni eða tvisvar í viku.

Þjálfari námskeiðsins er Guðlaugur Jón Árnason. skráning fer fram á abler: https://www.abler.io/shop/grotta?program=Q2x1YlNlcnZpY2U6NTQyODA=

Gróttumessa

Gróttumessa mun fara framm sunnudaginn 8. mars, kl. 11. Messan verður með léttu sniði, Gróttulagið verður sungið, barnakór Seltjarnarnes kirkju syngur tvö lög, krakkarnir í sunnudagaskólanum syngja tvö lög,  Gróttu fólk sér um ritningarlestur og hugleiðingu. Boðið verður upp á veitingar fyrir fólkið sem mætir.

Væri gaman að sjá sem flesta mæta í Gróttu treyjum eða peysum.💙💛

Frábær árangur hjá fimleikakonum

Íþróttahátíð Seltjarnarness fór fram þriðjudaginn 2. febrúar í hátíðarsal Gróttu þar sem afreksfólk bæjarins kom saman til að fagna glæsilegum árangri sínum á árinu 2025 og taka við verðskulduðum viðurkenningum.

Hrefna Höskuldsdóttir Rafnar, Þuríður Katrín Kristinsdóttir og Sólveig Þóra Sölvadóttir hlutu allar viðurkenningu sem efnilegar íþróttakonur. Þessar ungu fimleikakonur hafa með elju, metnaði og jákvæðu viðmóti verið félagi sínu til mikils sóma. Þær hafa jafnframt haft afar góð áhrif á andrúmsloft og menningu deildarinnar og eru fyrirmyndir innan hennar.

Fimleikadeild Gróttu óskar þeim innilega til hamingju með þennan glæsilega árangur.

Bikarmeistarar í 3. þrepi A-deild hlutu einnig viðurkenningu fyrir frábæran árangur á árinu. Bikarlið Gróttu í 3. þrepi A-deild tryggði sér 2025 bikarmeistaratitilinn með glæsilegri frammistöðu og frábærri heildarútkomu, hvorki meira né minna en 223,196 stigum.

Liðið skipuðu Mjöll Jónsdóttir, Sigurrós Ylfa Rúnarsdóttir, Þuríður Katrín Kristinsdóttir, Fanney Petrea L. Arnórsdóttir, Sigríður Lára Indriðadóttir og Sunna Mist Sheehan.

Það er jafnframt vert að nefna að Grótta var með yngsta liðið í keppninni. Fimleikadeild Gróttu óskar þeim innilega til hamingju með þennan stórkostlega árangur.

Mynd: Eyjólfur Garðarsson

Ofurhetjumót Gróttu og Colgate haldið 13.–15. febrúar

Helgina 13.–15. febrúar fór fram hið árlega Ofurhetjumót Gróttu og Colgate þar sem yfir 220 efnilegar fimleika-ofurhetjur frá fimm félögum komu saman og sýndu listir sínar. Keppt var frá 6. þrepi og upp í frjálsar æfingar og var stemningin frábær alla helgina.

Það var sannarlega ánægjulegt að fylgjast með kraftinum, gleðinni og metnaðinum hjá keppendum. Ljóst er að framtíðin er björt í íslenskum fimleikum. 

Allir keppendur fengu þátttökuverðlaun frá Colgate að móti loknu og kunnum við þeim bestu þakkir fyrir stuðninginn.

Þá viljum við einnig þakka þjálfurum og dómurum fyrir vel unnin störf, ásamt öllum þeim fjölmörgu sjálfboðaliðum sem lögðu hönd á plóg við undirbúning og framkvæmd mótsins, án ykkar væri svona viðburður ekki mögulegur.

Takk fyrir frábæra helgi, við hlökkum til næsta móts!

Myndir : Eyjólfur Garðarsson

Ofurhetjumótið 2026

Nú styttist í skemmtilegasta mót ársins, Ofurhetjumótið! 

Ofurhetjumót Gróttu verður haldið dagana 13.–15. febrúar. Við erum ofur spennt og hlökkum til að sjá ykkur öll!

Æfingagjöld Fimleikadeildar Gróttu vorönn 2026

Fimleikadeild Gróttu hefur birt upplýsingar um æfingagjöld fyrir vorönn 2026 og hefur gjaldskráin verið sett fram á nýjan hátt með það að markmiði að vera gagnsæ, skýr og í samræmi við það sem tíðkast hjá öðrum fimleikafélögum. Æfingagjöldin eru nú reiknuð eftir vikufjölda og fjölda klukkustunda sem iðkendur eru með í stundatöflu.


Æfingagjöld hjá Fimleikadeild Gróttu þurfa að standa undir umfangsmiklum rekstri deildarinnar, en starfseminni hefur sannarlega vaxið fiskur um hrygg.  Deildin telur í dag hátt í 700 iðkendur á breiðum aldri, eða frá 1 árs í krílafimi og upp í fullorðinsfimleika, og tæplega 70 þjálfara. Markmið deildarinnar er að tryggja faglega þjálfun, góða þjónustu og öruggt umhverfi, topp aðstöðu, öfluga starfsemi og rekstur sem stendur undir sér. 

Fagleg þjálfun 

Þjálfarar Gróttu mynda öflugt og fjölbreytt teymi sem býr yfir víðtækri reynslu og sérþekkingu í fimleikaþjálfun. Þá sækja þeir reglulega fræðslu til að styrkja færni sína.  Til að halda góðu þjálfarateymi og laða til okkar hæfa þjálfara er mikilvægt að deildin geti boðið upp á samkeppnishæf laun ásamt öruggum og stöðugum starfsaðstæður.   

Góð þjónusta og öryggi iðkenda í fyrirrúmi

Við leggjum okkur fram við að hver iðkandi fái góða athygli og leiðsögn þjálfara á æfingum. Fjöldi iðkenda í hóp er í mesta lagi 12-14 á hvern þjálfara auk aðstoðarþjálfara. Þá fá iðkendur góðan æfingatíma í sal, nægilegt pláss og þann fjölda æfingatíma sem þarf til að ná árangri í sinni íþrótt 

Hátt hlutfall þjálfara er einnig öryggismál fyrir iðkendur, en í fimleikasalnum hverju sinni eru margir hópar á fjölda áhalda að gera stór stökk og æfingar sem gæta þarf vel að.

Samkeppnishæf aðstaða

Fimleikadeildin býður upp á fullbúinn fimleikasal þar sem aðstaða og fjöldi áhalda styður við faglega þjálfun og skapar öruggt æfingaumhverfi. Salurinn er skipulagður með öryggi iðkenda í fyrirrúmi, áhöld og dýnur eru reglulega yfirfarin og endurnýjuð eftir þörfum. Salurinn er yfirleitt fullnýttur og ávallt mikið fjör. 

Rekstur deildarinnar 

Rekstur Fimleikadeildar Gróttu snýst um að styðja við blómlegt starf deildarinnar og tryggja gott samstarf við foreldra og forráðamenn. 

Fimleikadeildin leggur sig fram um að æfingagjöld endurspegli raunverulegan kostnað. Deildin er ekki rekin í hagnaðarskyni og reynt er eftir fremsta megni að enda árið réttu megin við núllið. Eins og önnur félög og atvinnustarfsemi hefur bent á, hefur launaskrið og verðbólga þyngt rekstrarumhverfi mikið undanfarin ár og hefur Fimleikadeildin ekki farið varhluta af því enda með yfir 70 starfsmenn. Starfsmaður er á skrifstofu sem gegnir mikilvægu hlutverki við að halda utan um starfsemina. Auk þess standa æfingagjöldin straum af nauðsynlegum innviðum, svo sem tækjabúnaði, hljóðkerfi, viðhaldi áhalda og tækja, tryggingum og fl.  

Þess má geta að fjöldi fólks leggur deildinni lið sem sjálfboðaliðar, bæði í stjórn og sértækum verkefnum og fyrir það erum við ótrúlega þakklát. Án sjálfboðaliða gæti íþróttastarf fyrir börn og unglinga á Íslandi ekki staðið undir sér og verið sú mikilvæga grunnstoð í lýðheilsu og forvörnum sem við sem samfélag treystum á. 

Við viljum þakka iðkendum og forráðamönnum fyrir frábært samstarf á árinu sem er að líða og fögnum þeim árangri sem iðkendur hafa náð. Við erum sprúðlandi spennt fyrir 2026 og hlökkum til að gera enn betur á komandi ári.

Haustmót Fimleikasambands Íslands – frábær frammistaða hjá Gróttu! 🤸‍♀️

Haustmót Fimleikasambands Íslands fór fram um helgina, 18.–19. október, í Versölum hjá Gerplu. Fimleikadeild Gróttu átti glæsilegan hóp keppenda sem stóð sig með stakri prýði á fyrsta móti haustannar! 

Í 3. þrepi kepptu þær Salka, Guðrún, Sigurrós, Elsa, Sunneva, Sigurlaug Mirra og Hugrún. Sigurrós tryggði sér 2. Sæti á slá! Í 2. þrepi kepptu þær Fanney og Sigríður. Í unglingaflokki keppti Eldey Erla og tryggði sér 3. sæti á tvíslá!

Fimleikadeild Gróttu óskar öllum keppendum og þjálfurum innilega til hamingju með mótið og árangurinn. Við hlökkum til að fylgjast með þeim blómstra í vetur! 

Áfram Grótta!

Ágústa Edda leiðir Fimleikadeild Gróttu

Ágústa Edda Björnsdóttir hefur verið ráðin sem framkvæmdastjóri Fimleikadeildar Gróttu og hefur tekið til starfa.

Ágústa Edda kemur til Gróttu frá Sidekick Health þar sem hún hefur starfað við verkefnastýringu og notendarannsóknir síðustu fjögur ár. Áður starfaði hún hjá Félagsvísindastofnun í 10 ár sem verkefnastjóri við rannsóknir, rýnihópa, kannanir og viðtöl. Ágústa Edda hefur einnig sinnt stundakennslu í íþróttafélagsfræði við bæði HÍ og HR. Hún hefur ennfremur yfirgripsmikla reynslu af þjálfun þvert á íþróttagreinar. Ágústa Edda þjálfaði fimleika hjá Gróttu, var yfirþjálfari yngri flokka Vals í handbolta um árabil og er enn að þjálfa hjólreiðar hjá Hreyfingu, World Class og utandyra með Tindi. Ágústa Edda er með MA-gráðu í félagsfræði frá HÍ og B.sc. í félagsfræði og viðskiptafræði frá sama skóla. 

Margir þekkja Ágústu Eddu sem afreksíþróttakonu í fimleikum, handbolta, hjólreiðum og nú nýlega í hlaupum. Ágústa Edda byrjaði í fimleikum 8 ára gömul þegar Fimleikadeild Gróttu var stofnuð, var í fyrsta keppnishóp félagsins og var valin í landsliðið. Handboltinn átti síðar hug hennar allan og spilaði hún með U-18 ára og A-landsliðum um árabil. Síðustu 10 ár hefur Ágústa Edda stundað hjólreiðar af kappi, verið í landsliðinu og keppt á þremur heimsmeistaramótum. Nú er hlaupin í hana áhugi fyrir hlaupum og við hlökkum til að fylgjast með afrekum hennar á því sviði. 

Ágústa Edda býr í Garðabæ og á þrjá syni sem hafa allir stundað íþróttir af kappi hjá Stjörnunni og yngri landsliðum. Hún hefur einnig setið í stjórn Barna-og unglingaráðs Stjörnunnar. Ágústa Edda býr þannig yfir víðtækri reynslu af íþróttastarfi og afreksþjálfun barna sem iðkandi, foreldri og þjálfari. Við bjóðum Ágústu Eddu hjartanlega velkomna til starfa heim á Seltjarnarnesið og erum sannfærð um að þarna fari mikill liðstyrkur fyrir Gróttu og Fimleikadeildina.

Lið Gróttu Bikarmeistarar í 3. Þrepi

Um helgina fór fram Bikarmót 2025 í áhalda- og hópfimleikum, þar sem fremsta fimleikafólk landsins keppti um titlana. Mótið var haldið af Fjölni í Egilshöll, og óhætt er að segja að sannkölluð fimleikaveisla átti sér stað. Grótta sendi sex lið til keppni ásamt tveimur gestum í frjálsu þrepi og 2. þrepi fimleikastigans. Liðin stóðu sig með prýði.

Í 3. þrepi A-deild tryggði lið Gróttu sér titil bikarmeistara með frábæra útkomu, 223.196 stig. Liðið skipuðu Mjöll Jónsdóttir, Sigurrós Ylfa Rúnarsdóttir, Þuríður Katrín Kistinsdóttir, Fanney Petrea L. Arnórsdóttir, Sigríður Lára Indriðadóttir og Sunna Mist Sheehen. Það er einnig vert að nefna að Grótta var með yngsta liðið í keppninni, og óskum við þeim innilega til hamingju með stórkostlegan árangur.

Í 3. þrepi B-deild hafnaði lið Gróttu í 2. sæti, og óskum við stelpunum innilega til hamingju með glæsilegan árangur. Liðið skipuðu Guðrún Jakóbína Eiríksdóttir, Margrét Helga Geirsdóttir, Magnea Margrét Þorsteinsdóttir, Hrefna Höskuldsdóttir Rafnar, Sigurlaug Margrét Pétursdóttir og Mirra Kjartansdóttir.

Hópfimleikadeild Gróttu sendi fjögur lið til keppni, og sýndu liðin miklar framfarir. Lið 3. flokks í A-deild hafnaði í 4. sæti, og verður gaman að fylgjast með þeim á Íslandsmeistaramótinu í hópfimleikum, sem fram fer á Akranesi 10.–13. apríl. Óhætt er að segja að framtíðin sé björt í fimleikadeild Gróttu.