Starfsmaður óskast

ÍÞRÓTTAFÉLAGIÐ GRÓTTA AUGLÝSIR EFTIR STARFSMANNI Í HLUTASTARF Í VALLARHÚS FÉLAGSINS

Helstu verkefni og ábyrgð

  • Starfsmaður aðstoðar nemendur grunn- og leikskóla og iðkendur Íþróttafélagsins
  • Dagleg þrif í vallarhúsi,
  • Önnur tilfallandi verkefni í samvinnu við vallarstjóra

Helstu verkefni og ábyrgð

  • Starfsmaður aðstoðar nemendur grunn- og leikskóla og iðkendur Íþróttafélagsins
  • Dagleg þrif í vallarhúsi,
  • Önnur tilfallandi verkefni í samvinnu við vallarstjóra

Menntunar- og hæfniskröfur

  • Áhugi á að vinna með börnum
  • Sveigjanleiki og hæfni í mannlegum samskiptum
  • Frumkvæði, jákvæðni og sjálfstæð vinnubrögð
  • Hæfni til að vinna í hóp
  • Viðkomandi þarf að tala og skilja íslensku

Viðtalstímar framkvæmdastjóra Fimleikadeildar

Skrifstofa framkvæmdastjóra Fimleikadeildar Gróttu er opin milli klukkan 13:00-15:00 á mánudögum og 15:00-17:00 á miðvikudögum. Einnig er hægt er að hafa samband við Guðrúnu Stefánsdóttur framkvæmdastjóra Fimleikadeildar í gegnum netfangið [email protected] og í síma: 561-1137. Símatími skrifstofu fimleikadeildar er á miðvikudögum og föstudögum á milli kl. 10:00-12:00.

Skrifstofa Fimleikadeildar Gróttu er til húsa á annarri hæð í Íþróttahúsi Seltjarnarness við Suðurströnd. Gengið er inn anddyrið í íþróttahúsinu, beygt til vinstri fram hjá skrifstofu húsvarða, þar er farið upp stiga upp á aðra hæð og skrifstofa fimleikadeildar er þar önnur hurð til hægri.

Áfram Grótta!

Fjör á 9.flokks æfingum

Tæplega 15 krakkar mæta að staðaldri á æfingar 9.flokks á laugardögum í Íþróttahúsi Gróttu. Um er að ræða krakka fædd 2019 og 2020. Eva Björk Hlöðversdóttir og aðstoðarfólk hafa veg og vanda að skipulagningu og æfingum krakkanna en Eva Björk er margreynd í þjálfun hjá félaginu.

Innihald æfinganna eru leikir með og án bolta auk fjölbreyttra handboltaæfinga sem reyna á samhæfingu, jafnvægi, styrk og hittni. Segja má að mikil einbeiting og mikið stuð sé hjá þessum flotta hópi á laugardögum. Æfingarnar hefjast kl. 09:15.

Skráning í flokkinn fer fram í Sportabler: https://www.sportabler.com/shop/grotta/handbolti

Frekar upplýsingar um handboltastarfið er hægt að nálgast á heimasíðu Gróttu eða hjá Andra Sigfússyni yfirþjálfara, [email protected]

Basil Gimlet kvöld Gróttu

Laugardaginn 16. nóvember verður haldið Basil Gimlet kvöld Gróttu, þar sem gleði og góð stemning mun ráða för!

Dagskrá kvöldsins:

? Fordrykkur frá kl. 19:00 – 20:00, eða á meðan birgðir endast, í boði Ölgerðarinnar.

? Friðrik Dór tekur nokkra vel valda slagara!

?DJ Haffi Haff heldur uppi trylltri stemningu fram á nótt!

Beerpong, kareoke, Gróttulottó og margt fleira skemmtilegt verður í boði!

?️ Miðasala fer fram hér: https://tix.is/event/18508/basil-gimlet-kvold-grottu – takmarkað magn miða í boði!

Allur ágóði rennur til deilda Gróttu – komum saman og styrkjum félagið okkar!

Orri Steinn mætir í heimsókn á Vivaldivöllinn

Orri Steinn Óskarsson mætir á Vivaldivöllinn í dag, miðvikudaginn 9. október, í heimsókn á sinn gamla heimavöll.

Við hvetjum krakkana til að líta við – eflaust hægt að plata Orra í áritun og myndatöku.

Valdimar Ólafsson – Minning

Valdimar Ólafsson, betur þekktur sem Valdi, lést þriðjudaginn 17. september sl. Valdi hóf störf sem vallarstjóri á Vivaldivellinum hjá íþróttafélaginu Gróttu í september 2016 og var frá fyrsta degi einstakur starfsmaður sem gaf allt fyrir félagið sitt.

Valdi var sannur Gróttumaður, uppalinn á Seltjarnarnesi og tengdist félaginu allt frá stofnun þess árið 1966. Á yngri árum stundaði hann bæði fótbolta og handbolta hjá félaginu og prófaði einnig körfubolta einn vetur þegar sú íþrótt var stunduð hjá Gróttu.

Í vallarhúsinu réði Valdi ríkjum og sinnti hann störfum sínum af mikilli samviskusemi og vandvirkni. Valdi var einstaklega vel liðinn af starfsfólki og foreldrum, en sérstaklega af iðkendum félagsins. Hann var ávallt til staðar, hvort sem um var að ræða verkefni stór eða smá. Valdi lagði mikla áherslu á að vallarhúsið væri opið fyrir alla iðkendur félagsins, unga sem aldna, sem og aðra gesti, og þangað væri fólk velkomið. 

Samstarfsmenn Valda munu sakna hans sárt. Minningin um Valda mun lifa áfram hjá félaginu, um góðan dreng sem minnst verður af hlýju og virðingu.

Íþróttafélagið Grótta sendir Steinu, Bjössa og vinum og vandamönnum Valda hugheilar samúðarkveðjur á þessum erfiðu tímum.

Eldri borgara ganga Gróttu fer aftur af stað

Íþróttafélagið Grótta í samstarfi við Félag eldri borgara á Seltjarnarnesi býður öllum eldri borgurum upp á Gróttugöngu um Nesið á föstudögum kl. 10:30.

Brottför verður frá íþróttahúsi Gróttu kl. 10:30 og að göngu lokinni býður Grótta upp á kaffi og Björnsbakarí upp á bakkelsi í anddyri íþróttahússins.

Fyrsta gangan er á föstudaginn næsta, 13. september kl. 10:30 og lagt af stað frá anddyri íþróttahússins.

Vinsamlegast látist berast til eldri borgara í kringum ykkur.

Öll eru velkomin!

Ársreikningar lagðir fram til samþykktar

Þar sem aðalfundir Íþróttafélagsins Gróttu hafa þegar verið haldnir, verða ársreikningar lagðir fram til samþykktar á fundi aðalstjórnar og deilda.

Fundurinn fer fram kl. 18:00 miðvikudaginn 25. september í hátíðarsal Gróttu.

Góð stemning á Kynningarkvöldi

Mikill fjöldi og góð stemning var á Kynningarkvöldi Gróttu sem fram fór í kvöld í Hátíðarsal Gróttu. Þar hlýddu gestir á þjálfara meistaraflokkanna, þá Róbert Gunnarsson og Sigurjón Friðbjörn Björnsson fara yfir leikmannahópana, hvernig undirbúningurinn hefur verið og markmið fyrir veturinn.

Ólafur Finnbogason formaður Handknattleiksdeildar Gróttu ræddu hin ýmsu mál og kynnti breytt úrval árskorta sem eru komin í sölu á Stubbur appinu. Nýr og glæsilegur keppnisbúningur var frumsýndur og var Einar Örn Jónsson fjölmiðlamaður með létta tölu um Gróttu.

Kvöldið heppnaðist frábærlega og var góð stemning á meðal stuðningsfólks. Fyrstu eikir meistaraflokkanna okkar eru á laugardaginn þegar fyrsta Gróttutvenna tímabilsins fer fram.

Grótta – ÍBV kl. 14:00 / Mfl. kvenna

Grótta – KA kl. 16:15 / Mfl. karla

Fjölmennum og styðjum Gróttu til sigurs !

Nýr vallarstjóri og yfirhúsvörður Gróttu

Við hjá Íþróttafélaginu Gróttu erum ánægð að tilkynna ráðningu á nýjum vallarstjóra og yfirhúsverði.

Hlynur ráðinn vallarstjóri
Hlynur hefur verið ráðinn nýr vallarstjóri Gróttu og tekur við starfinu af Valda okkar. Hlynur kemur til okkar með mikla reynslu, en hann starfaði hjá Íþróttafélaginu Val um árabil í sambærilegu starfi. Við erum spennt fyrir því að fá Hlyn til liðs við okkur og vitum að hann á eftir að sinna starfinu af fagmennsku.

Jóhanna Selma verður yfirhúsvörður
Það gleður okkur einnig að tilkynna að Jóhanna Selma hefur verið ráðin yfirhúsvörður Gróttu. Yfirhúsvörður er ný staða hjá félaginu og meginn tilgangur starfsins er að skerpa alla yfirsýn yfir mannvirki félagsins, samhæfa vinnulag og bæta eftirfylgni með gæðum á viðhaldi og þrifum mannvirkjanna. Margir þekkja hana Jóhönnu, en hún hefur unnið sem húsvörður hjá félaginu í meira en 8 ár. Jóhanna hefur ávallt verið ómetanlegur starfskraftur og við hlökkum til áframhaldandi samstarfs við hana í nýju hlutverki.

Við óskum Hlyni og Jóhönnu Selmu innilega til hamingju með nýju stöðurnar og bjóðum þau velkomin í þeirra nýju verkefni hjá Gróttu!