Samstarfi við KR slitið

Fyrr í dag var okkur í stjórn knattspyrnudeildar Gróttu tilkynnt um að stjórn knattspyrnudeildar KR hefði ákveðið að slíta samstarfi við Gróttu í 2., 3. og 4. flokki kvenna. Ávörðunin tekur gildi frá og með lokum keppnistímabils í Íslandsmóti. Þessi ákvörðun var tilkynnt án nokkurs fyrirvara og kemur okkur á óvart. Að okkar mati hefur samstarfið borið góðan ávöxt hingað til og skapað svigrúm til að veita sem flestum iðkendum verkefni við hæfi.

Knattspyrnudeild Gróttu mun halda sínu striki og starfrækja alla yngri flokka kvenna á komandi tímabili þar sem haldið verður áfram að byggja ofan á það frábæra starf sem unnið hefur verið í kvennaknattspyrnu á Seltjarnarnesi. Eins og kunnugt er er meistaraflokkur kvenna í toppbaráttu í Lengjudeildinni annað tímabilið í röð og uppaldar Gróttustelpur hafa skilað sér upp í liðið nær árlega. Og við erum rétt að byrja. Tilkynnt verður um þjálfara og æfingatíma á næstunni. Allt kapp verður lagt á að byggja upp sterka einstaklinga og frambærilegar knattspyrnukonur til framtíðar.

Við þökkum nágrönnum okkar í KR fyrir samstarfið og óskum félaginu velfarnaðar.

Barna- og unglingaráð knattspyrnudeildar Gróttu mun boða foreldra í viðeigandi flokkum á upplýsingafund í næstu viku þar sem farið verður betur yfir næstu skref.

Virðingarfyllst,

Stjórn knattspyrnudeildar Gróttu

Handboltaskóli, afreksskóli og fókusþjálfun

Núna á næstu dögum hefst sumarstarf handboltans. Það verður ýmislegt í boði fyrir verðandi grunnskólaaldur. Öll námskeið fara fram í Hertz-höllinni á Seltjarnarnesi og eru viku í senn.

Handboltaskóli fyrir krakka f. 2013-2018
29. júlí – 21.ágúst
kl. 09:00-12:00
Skólastjóri: Patrekur Pétursson Sanko
Þjálfarar: Þjálfarar handknattleiksdeldar auk gestaþjálfara
Hægt að kaupa gæslu frá kl. 08:00-09:00 og frá 12:00-13:00

______________________________________________

Afreksskóli fyrir krakka og unglinga f. 2009-2012
6. ágúst – 21.ágúst
kl. 12:30-14:00
Skólastjóri: Patrekur Pétursson Sanko
Þjálfarar: Þjálfarar handknattleiksdeildar auk gestaþjálfara

______________________________________________

Fókusþjálfun fyrir krakka og unglinga f. 2008-2012
29. júlí – 1.ágúst
kl. 12:00-13:00
Umsjón og þjálfun: Tinna Jökulsdóttir

______________________________________________

Skráning í handbolta- og afreksskólann fer fram í gegnum Sportabler. Beinn hlekkur er hér: https://www.abler.io/shop/grotta/handbolti. Hægt er að nálgast frekari upplýsingar um skólana hjá Andri Sigfússyni yfirþjálfara á [email protected].

Skráning í Fókusþjálfun fer fram í gegnum Tinnu Jökulsdóttur, [email protected]. Hægt er að nálgast frekari upplýsingar um Fókusþjálfunina í meðfylgjandi auglýsingu eða á https://www.instagram.com/fokusthjalfun

Gróttunámskeið í Fókusþjálfun

Grótta býður iðkendum sínum að taka þátt í spennandi námskeiði á vegum Fókusþjálfunar. Skemmtilegt námskeið þar sem farið er yfir liðkun, jafnvægi og snerpuæfingar. Einnig eru gerðar skemmtilegar boltaæfingar sem reyna á samhæfingu, athygli og víðsýni.

Námskeiðið verður í fjóra daga, mánudaginn 29.júlí til fimmtudagsins 1.ágúst. Námskeiðið fer fram í Hertz-höllinni.

Þjálfari námskeiðsins er Tinna Jökulsdóttir, eigandi Fókusþjálfunar, sjúkraþjálfari og fyrrum handboltakona. Hún er sjúkraþjálfari meistaraflokks kvenna í Stjörnunni og A-landsliðs kvenna í handbolta. Skráning fer fram á [email protected]

Frekari upplýsingar um Fókusþjálfun má nálgast á instagram-síðunni https://www.instagram.com/fokusthjalfun

Frábær ferð til Þýskalands

Í byrjun júní hélt 3.flokkur karla í æfinga- og keppnisferð til Þýskalands. Liðið dvaldi í Leipzig fyrri hluta ferðarinnar þar sem liðið æfði og lék þrjá æfingaleiki gegn unglinga- og ungmennaliðum félagsins. Fyrsti leikurinn var gegn B-jugend liðinu. Okkar strákar léku við hvern sinn fingur og uppskáru góðan 23-40 sigur þar sem allir útileikmenn skoruðu og markmennirnir dreifðu markvörslunni á milli sín.

Daginn eftir léku strákarnir gegn U23 ára liði Leipzig. Um var að ræða hörkuleik gegn öflugu liði. Því miður tapaðist leikurinn 31-24 og segja má að Akkilesarhæll liðsins hafi verið færanýting. Seinasti æfingaleikur Gróttu var gegn A-jugend liði Leipzig. Eftir hraðan og skemmtilegan leik voru það okkar menn sem uppskáru fimm marka sigur, 35-40.

Á meðan liðið dvaldi í Leipzig bauð Gróttumaðurinn Viggó Kristjánsson leikmaður Leipzig liðinu heim til sín í grillveislu. Við þökkum honum kærlega fyrir heimboðið og gestrisnina.

Seinni hluti ferðarinnar var í Köln þar sem strákarnir fylgdust með Final 4 í meistaradeildinni. Þar horfðu þeir á undanúrslitin og úrslitaleikina í stórkostlegri Lanxess-höllinni. Eftir mikla baráttu voru það Barcelona sem voru sterkastir eftir æsispennandi úrslitaleik.

Ferðin stóð yfir í rúmlega viku og heppnaðist frábærlega. Hún skilur án efa eftir góðar minningar hjá strákunum.

Ungir og efnilegir skrifa undir

Grótta hefur framlengt samninga sína til tveggja ára við unga og efnilega leikmenn félagsins sem hluta af uppbyggingu félagsins. Allir leikmennirnir eru lykilleikmenn í 3.flokki og U-liði félagsins. Leikmennirnir eru Alex Kári Þórhallsson, Gísli Örn Alfreðsson, Hannes Pétur Hauksson og Sverrir Arnar Hjaltason.

* Alex Kári er 18 ára gamall. Hann örvhentur og getur bæði leikið sem skytta og hornamaður. Hann er klókur leikmaður og spilar vel upp á félaga sína í liðinu.

* Gísli Örn er 17 ára gamall og getur bæði leikið sem leikstjórnandi og skytta. Hann er góður skotmaður, fylginn sér og öflugur beggja megin vallarins.

* Hannes Pétur er 18 ára gamall og er hávaxinn markvörður. Hann hefur góðar staðsetningar, les skotin vel og hefur góða sendingagetu.

* Sverrir Arnar er 16 ára gamall og er línumaður. Hann er nautsterkur, viljugur og hefur stigið stór framfaraskref síðastliðinn vetur.

Gísli og Hannes hafa hlotið eldskírn sína í Olísdeildinni á meðan Alex og Sverrir eiga hana eftir og vonandi kemur hún á næstu misserum.

Grótta er virkilega ánægt með samningana enda eru þeir mikilvægur liður í framtíðaráformum félagsins.

„Við erum mjög ánægðir að vera búnir að semja við þessa ungu stráka. Þessir strákar hafa flestir verið viðloðandi meistaraflokkinn síðastliðinn vetur og því eðlileg þróun að þeir stígi næsta skref og verði partur af uppbyggingunni,“ sagði Róbert Gunnarsson þjálfari Gróttuliðsins.

Frábært frammistaða í bikarúrslitum

6.flokkur kvenna yngri og 6.flokkur karla eldri léku sunnudaginn 10.mars í bikarúrslitum í Laugardalshöllinni.

Andstæðingar stelpnanna voru Valur. Fjölmargir áhorfendur gerðu leið sína í Laugardalshöllina til að fylgjast með stelpunum. Eftir mikla baráttu gegn frábæru liði, þá þurftu okkar stelpur að sætta sig við silfrið að þessu sinni. Lokatölur voru 2-7 fyrir Val. Gróttustelpurnar geta þrátt fyrir úrslitin verið hrikalega sáttar enda börðust þær eins og ljón allan leikinn og ekki sjálfgefið að komast alla leið í úrslitaleikinn. Vonandi nýta þær sér þessa reynslu til að halda áfram að bæta sig, þetta er rétt að byrja !

Andstæðingar strákanna voru FH. Strákarnir komu reynslunni ríkari í Laugardalshöllina eftir svekkjandi tap í úrslitaleik fyrir ári síðan. Liðið lék á bikarmóti HSÍ í janúar og núna fór fram úrslitaleikurinn í því móti. Baráttan og leikgleðin skein úr andliti strákanna í dag sem fengu góðan stuðning fjölmargra áhorfenda. Gróttustrákarnir uppskáru sigur, 8-5 eftir frábæran leik.

Grótta í bikarúrslitum

Um helgina fara fram bikarúrslit í öllum keppnisflokkum HSÍ. Við í Gróttu eigum tvö lið í úrslitum en það eru 6.flokkur karla eldri og 6.flokkur kvenna yngri.

Allir úrslitaleikirnir fara fram við glæsilega umgjörð í Laugardalshöllinni. Báðir leikir Gróttu fara fram á laugardeginum.

6.flokkur kvenna yngri
Grótta – Valur
Laugardaginn 8.mars
kl. 09:45

6.flokkur karla eldri
Grótta – FH
Laugardaginn 8.mars
kl. 11:15

Við hvetjum allt Gróttufólk til að fjölmenna í Laugardalshöllina og hvetja okkar upprennandi leikmenn til dáða.

Áfram Grótta !