Frísk í Gróttu – Heilsuefling fyrir 65 ára og eldri

Kynningarfundur ​​á nýju hreyfingarúrræði fyrir íbúa 65 ára og eldri á Seltjarnarnesi. Kynningarfundurinn fer fram í hátíðarsal Gróttu miðvikudaginn 19.febrúar klukkan 14:00.

Frísk í Gróttu er heilsueflandi verkefni fyrir einstaklinga 65 ára og eldri á Seltjarnanesi. Starfsemi Frísk í Gróttu verður byggð í kringum hópþjálfun þar sem þátttakendur fá tækifæri á því að stunda líkamsrækt í skemmtilegum félagsskap undir handleiðslu fagmenntaðra þjálfara. Um er að ræða markvissa og skipulagða þjálfun þar sem sem þjálfarar útbúa 6 vikna æfingaráætlanir sem þeir aðlaga eftir getu hvers og eins þátttakanda. Á æfingum verður lögð áhersla á styrktar-, þol-, liðleika- og jafnvægisæfingar. Ekki síður verður lögð áhersla á andlega og félagslega heilsu og verður starfsemin í heild sinni unnin með það að leiðarljósi. Æfingar munu fara fram 2x í viku fyrir hádegi á – þriðjudögum og fimmtudögum í íþróttahúsi Gróttu í nýjum styrktarsal félagsins.

Fyrsta námskeið verður 12. vikur og hefst þriðjudaginn 11. mars.
Hægt verður að velja um tvær tímasetningar klukkan 09:00 og 09:45.

Hægt er að tryggja sér pláss fyrir kynningarfund með því að skrá sig hér: https://docs.google.com/…/1FAIpQLSfD9xbttuAfIW…/viewform
Námskeiðs gjald er 16.500 kr eða 5.500 kr á mánuði.

Rauð viðvörun – Allar æfingar falla niður

Allar æfingar falla niður í dag, miðvikudaginn 5. febrúar hjá öllum deildum félagsins.

Foreldrar eru beðnir að sækja þau börn sem eru nú þegar komin í Íþróttahúsið.

Samkvæmt veðurstofu Íslands getur verið hættulegt að vera utandyra og því hvetjum við fólk til að vera heima.

Appelsínugul viðvörun

Kæru foreldrar ‼️⚠️

Vegna veðurviðvörunar sem tekur gildi kl. 14:00 í dag og á morgunn vekjum við athygli á eftirfarandi:

Allar æfingar hjá yngri flokkum knattspyrnudeildar falla niður í dag og á morgunn.

Æfingar verða á sínum stað hjá handbolta- og fimleikadeild. Ef þið metið að aðstæður séu ekki nægilega öruggar fyrir barnið ykkar til að mæta þá sýnum við því að sjálfsögðu skilning. Foreldrar eru hvattir til þess að merkja við í Abler hvort iðkendur mæta.

Grótta og Sjúkraþjálfun Reykjavíkur hefja samstarf

Við hjá Gróttu erum afar ánægð að tilkynna nýtt samstarf við Sjúkraþjálfun Reykjavíkur sem er staðsett á Fiskislóð 1. Með þessu samstarfi er verið að tryggja forgang í sjúkraþjálfun fyrir iðkendur yngri flokka Gróttu.

Íþróttum geta fylgt meiðsli og við upphaf unglingsáranna geta þrálátir verkir, til dæmis í hnjám og hælum, látið á sér kræla. Oft getur hjálpað mikið að leita ráða hjá sjúkraþjálfara sem stundum ráðleggja meðferð, hvíld eða útbúa æfingaprógrömm sem hjálpa til.

Við höfum einfaldað ferlið með þessu nýja samstarfi! Í Sjúkraþjálfun Reykjavíkur starfar hæfileikaríkt og metnaðarfullt fagfólk.

Hvernig bóka ég tíma?

Sendið tölvupóst á: [email protected]

Í póstinum þarf að koma fram:

• Kennitala iðkanda og forráðamanns

• Símanúmer

Kostnaður:

✅ Frítt ef læknabeiðni liggur fyrir (SÍ greiðir að fullu).

✅ Ef ekki liggur fyrir beiðni er greitt 30% af verði tímans.

Hrafnhildur Thoroddsen – Minning

Hrafnhildur Thoroddsen lést fimmtudaginn 16. janúar síðastliðinn. Það er með miklum söknuði sem við kveðjum kæran og duglegan samstarfsmann og vin, sem starfaði í íþróttahúsinu frá árinu 2014.

Hrafnhildur var einstök manneskja en frá því hún hóf störf hjá okkur sinnti hún af mikilli elju störfum við símsvörun, móttöku iðkenda, foreldra og annarra gesta í móttöku Gróttu ásamt fleiri tilfallandi verkefnum. Bros hennar og hlýlegt viðmót voru einkenni hennar en hún var alltaf tilbúin að rétta hjálparhönd þegar þess þurfti. Þeir sem þekktu hana vita hversu mikill kraftur, jákvæðni og ákveðni bjó í henni. Hún lét alltaf til sín taka þegar hún var í húsinu og ekkert virtist geta stöðvað hana í að leggja sitt af mörkum. Henni leið vel í íþróttahúsinu, að vera á meðal fólks á öllum aldri í amstri hversdagsins, að leggja sitt að mörkum til að öll verkefni dagsins fengju farsælan og lausnarmiðaðan endi.

Við sem störfuðum með Hrafnhildi munum ávallt minnast hennar með hlýju, þakklæti og virðingu. Íþróttafélagið Grótta sendir fjölskyldu, vinum og vandamönnum hennar hugheilar samúðarkveðjur á þessum erfiðu tímum.

Nýir erlendir þjálfarar

Fimleikadeild Gróttu hefur ráðið fimm erlenda þjálfara til starfa. Þjálfararnir eru frábær viðbót við öfluga liðsheild hjá félaginu og hafa náð að aðlagast hratt og vel að starfinu og iðkendum.

Elsa Garcia er 33 ára og kemur frá Mexíkó. Hún er fyrrum landsliðskona Mexíkó í áhaldafimleikum, var í landsliði Mexíkó frá 2000 til 2023 og á ferli sínum keppti hún bæði á Ólympíuleikum og á nokkrum heimsmeistaramótum. Elsa hefur unnið til 35 alþjóðlegra verðlauna og er ein af bestu áhaldafimleikakonum Mexíkó frá upphafi. 

Josiel er 23 ára bandaríkjamaður. Hann er bæði metnaðarfullur og áhugasamur þjálfari með yfir 6 ára reynslu. Hann hefur þjálfað alla aldurshópa, frá leikskólaaldri til keppnishópa á efri stigum. Josiel lauk tölvunarfræðinámi í vor og hefur sótt mörg þjálfaranámskeið.

Csaba er frá Ungverjalandi og hefur þjálfað fimleika í Noregi frá árinu 2016. Hann hefur reynslu af þjálfun bæði stúlkna og drengja í áhaldafimleikum, en hefur að auki verið aðstoðarþjálfari í hópfimleikum.

Gemma Mc Cormick er 22 ára og kemur frá Írlandi og hefur góða reynslu í þjálfun bæði frá Írlandi og Banaríkjunum þar sem hún hefur starfað í International Gymnastics Camp. Gemma er ein af fremstu fimleikakonum í Írlandi og á langan og farsælan feril í fimleikum þar í landi. Gemma mun þjálfa keppnishópa í áhaldafimleikum og líka grunnhópa í fimleikum.

David Dexter kemur frá Bandaríkjunum og býr yfir 8 ára reynslu í fimleikum. Hann hefur þjálfað breiðan hóp iðkenda, eða allt frá byrjendum og upp í afreksþjálfun. 

Við bjóðum þau öll hjartanlega velkomin til starfa hjá Gróttu þar sem þekking þeirra, reynsla og metnaður hefur þegar haft jákvæð áhrif á bæði iðkendur og starfið í heild sinni. 

 Við hlökkum til að sjá árangurinn af starfi þeirra á komandi misserum.

Skötuveisla í Gróttu

Íþróttaféalagið Grótta blæs til veglegrar skötuveislu í hátíðarsalnum 21. desember næstkomandi, frá kl 11.30-13.30.

Boðið verður upp á skötu og saltfisk með öllu tilheyrandi!

Hvað er betra en að taka forskot á jólin í geggjuðum félagsskap!

Þú og Ég og Jól 🎅⭐️🎄

Breyttir opnunar- og símatímar skrifstofu Gróttu

Grótta kynnir breyttan opnunartíma og símatíma skrifstofunnar. Frá og með deginum í dag (04.12.24) verður opnunartíminn eftirfarandi:

opnunartíminn skrisftofu:

  • Mánudaga til fimmtudaga: 13:00 – 16:00
  • Föstudaga: Lokað

Símatími skirfstofunnar:

  • Mánudaga til föstudaga 09:00-12:00

Við minnum á að það er hægt að hafa samband við skrifstofuna í gegnum netfangið [email protected]

Takk fyrir frábæra samveru á Basil Gimlet kvöldi Gróttu!

Við viljum þakka öllum kærlega sem styrktu íþróttafélagið og mættu á Basil Gimlet kvöld Gróttu síðustu helgi. Svona kvöld er mikilvægur þáttur í því að styrkja deildirnar okkar og skapa líflegt félagsstarf innan félagsins.

Það er ómetanlegt að sjá hversu margir mættu, skemmtu sér og lögðu sitt af mörkum til að gera kvöldið ógleymanlegt. Við erum þakklát fyrir stuðninginn og hlökkum til að sjá ykkur á næstu viðburðum!

ÁFRAM GRÓTTA!