Íslenska U20 ára landsliðið í 7.sæti

Íslenska U20 ára landsliðið með okkar stelpum, Önnu Karólínu Ingadóttur og Katrínu Önnu Ásmundsdóttur innanborð gerði sér lítið fyrir og endaði í 7.sæti á HM. Mótið var haldið í Norður-Makedóníu og stóðu okkar leikmenn sig vel.

Íslenska liðið vann riðilinn sinn og komst í milliriðla með full hús stiga. Þar unnu þær íslensku Svartfjallaland en töpuðu gegn Portúgal. Með þeim úrslitum voru andstæðingar íslenska liðsins Ungverjaland í 8 liða úrslitum. Ungverjar eru ríkjandi Evrópumeistarar og því um erfiða leik að ræða. Okkar stelpur létu það lítið á sig fá og fór leikurinn í framlengingu. Ungverjar voru sterkari þar og mætti því íslenska liðið Svíum í krossspili um 5. – 8.sæti. Þar voru Svíar sterkari og mætti íslenska liðið því Svisslendingum um 7.sæti mótsins. Íslenska liðið sýndi mátt sinn og megin og vann 29-26 í miklum baráttuleik.

Þessi árangur, 7.sæti á HM er besti árangur sem kvennalandslið hefur náð frá upphafi. Við erum stolt af árangri liðsins og ekki síst okkar leikmanna, Önnu Karólínu Ingadóttur og Katrínar Önnu Ásmundsdóttur sem léku vel fyrir liðið. Þessi reynsla mun án efa hjálpa þessum efnilegum leikmönnum til frekari afreka og hjálpa Gróttuliðinu í Olísdeildinni í haust.

Til hamingju leikmenn og þjálfarar !

Fimleikadeild Gróttu hefur ráðið fjóra fimleikaþjálfara til starfa hjá deildinni fyrir næsta tímabil.

Fimleikadeild Gróttu hefur ráðið fjóra erlenda þjálfara til starfa hjá deildinni og hefja þeir allir störf í águst mánuði. Þjálfararnir er ungir og efnilegilegir og eru spennt fyrir því að koma að þjálfa í Gróttu. Grótta bíður þjálfarana velkomna til starfa hjá félaginu.

Elsa Garcia er 33 ára og er fyrrum landsliðskona Mexico í áhaldafimleikum. Elsa var í landsliði Mexico frá árinu 2000-2023 og fór meðal annars á ólympíuleika og á nokkur heimsmeistaramót. Elsa hefur unnið til 35 verðlauna á alþjóðlegum mótum. Hún ein af bestu fimleikakonum Mexico í áhaldafimleikum frá upphafi.

David Dexter er 27 ára frá Bandaríkjunum. Ungur og efnilegur þjálfari sem að hefur þjálfað fimleika í rúm 8 ár. Hann þjálfar nú hópa allt frá byrjendum upp í afreksþjálfun í Bandaríkjunum. David hefur verið að stunda háskólanám síðustu ár og er með  Bachelor’s of Health Science ásamt því að þjálfa fimleika.

Josiel 23 ára er einnig frá Bandaríkjunum og hefur þjálfað fimleika í yfir 6 ár og er mjög metnaðarfullur og áhugasamur þjálfari. Josiel hefur þjálfað börn frá leikskólaaldri uppí keppnishópa á eftri stigum fimleikastigans. Josiel útskrifast úr háskola nú í vor sem tölvunarfræðingur. Hann hefur sótt mikið að þjálfaranámskeiðum síðustu ár og hefur metnað fyrir því að menta sig meira í fimleikaþjálfun.

Csaba er 40 ára og er frá Ungverjalandi. Csaba hefur síðustu ár verið að þjálfa fimleika og vinna í Noregi frá því árið 2016. Csaba hefur þjálfað stelpur og stráka á öllum aldri. Einng hefur hann verið aðstoðarþjálfari í hópfimleikum.

Frábær ferð til Þýskalands

Í byrjun júní hélt 3.flokkur karla í æfinga- og keppnisferð til Þýskalands. Liðið dvaldi í Leipzig fyrri hluta ferðarinnar þar sem liðið æfði og lék þrjá æfingaleiki gegn unglinga- og ungmennaliðum félagsins. Fyrsti leikurinn var gegn B-jugend liðinu. Okkar strákar léku við hvern sinn fingur og uppskáru góðan 23-40 sigur þar sem allir útileikmenn skoruðu og markmennirnir dreifðu markvörslunni á milli sín.

Daginn eftir léku strákarnir gegn U23 ára liði Leipzig. Um var að ræða hörkuleik gegn öflugu liði. Því miður tapaðist leikurinn 31-24 og segja má að Akkilesarhæll liðsins hafi verið færanýting. Seinasti æfingaleikur Gróttu var gegn A-jugend liði Leipzig. Eftir hraðan og skemmtilegan leik voru það okkar menn sem uppskáru fimm marka sigur, 35-40.

Á meðan liðið dvaldi í Leipzig bauð Gróttumaðurinn Viggó Kristjánsson leikmaður Leipzig liðinu heim til sín í grillveislu. Við þökkum honum kærlega fyrir heimboðið og gestrisnina.

Seinni hluti ferðarinnar var í Köln þar sem strákarnir fylgdust með Final 4 í meistaradeildinni. Þar horfðu þeir á undanúrslitin og úrslitaleikina í stórkostlegri Lanxess-höllinni. Eftir mikla baráttu voru það Barcelona sem voru sterkastir eftir æsispennandi úrslitaleik.

Ferðin stóð yfir í rúmlega viku og heppnaðist frábærlega. Hún skilur án efa eftir góðar minningar hjá strákunum.

Anna Karólína og Katrín Anna í 8 liða úrslit

Anna Karólína og Katrín Anna ásamt U20 ára landsliði kvenna eru heldur betur að standa sig vel á HM í Norður-Makedóníu. Íslenska liðið mætti Svartfjallalandi og Portúgal í milliriðlum á mánudaginn og þriðjudaginn. Leikurinn gegn Svartfjallalandi vannst örugglega en því miður tapaðist leikurinn gegn Portúgal með aðeins einu marki.

Íslenska liðið endaði því í 2.sæti í milliriðlinum og er komið í 8 liða úrslit á HM. Þar mun liðið mæta feykilega sterku liði Ungverjalands sem eru ríkjandi Evrópumeistarar. Leikurinn fer fram á morgun, fimmtudag kl. 16:00. Allir leikir íslenska liðsins eru sýndir í beinni útsendingu á rás IHF á Youtube. Með sigri kemst Ísland í undanúrslit mótsins en tapi liðið gegn Ungverjum leikur liðið um sæti 5 – 8 í keppninni.

Gróttustelpurnar hafa heldur betur staðið sig vel á mótinu hingað til. Katrín Anna Ásmundsdóttir skoraði 1 mark gegn Svartfjallalandi og 3 mörk gegn Portúgal og er samtals komin með 17 mörk í mótinu. Þar er hún í 3.sæti af íslensku stelpunum. Anna Karólína Ingadóttir náði því miður ekki að verja þau skot sem hún fékk á sig í milliriðlinum. Engu að síður er hún búin að verja 18 skot í keppninni með 47,3% markvörslu. Þar er hún í 2.sæti yfir bestu hlutfallsmarkvörsluna í öllu mótinu.

Við höldum áfram að fylgjast með liðinu og okkar stelpum í mótinu.

Samningar við unga og efnilega leikmenn

Grótta heldur áfram að framlengja leikmannasamninga við unga og efnilega leikmenn félagsins. Samningarnir eru til tveggja ára og eru hluti af framtíðaráformum félagsins við að byggja upp meistaraflokkinn með leikmönnum Gróttu.

Allir leikmennirnir eru lykilleikmenn í 3.flokki og U-liði félagsins. Leikmennirnir eru Bessi Teitsson, Hrafn Ingi Jóhannsson, Kári Benediktsson og Þórður Magnús Árnason,

* Bessi er 18 ára gamall. Hann rétthentur hornamaður og öskurfljótur sem slíkur. Hann býr yfir mikilli skottækni.

* Hrafn Ingi er 18 ára gamall og er fjall að burðum. Hann er línumaður og öflugur varnarmaður.

* Kári er 17 ára gamall. Hann er örvhentur og leikur sem hornamaður. Hann er hávaxinn og sterkur.

* Þórður Magnús er 17 ára gamall. Hann er metnaðarfullur markvörður sem ætlar sér langt. Hann býr yfir snerpu og góðum staðsetningum.

Allir leikmennirnir voru tvívegis í leikmannahópi meistaraflokks á nýafstaðinni leiktíð. Við munum án efa fá að sjá þá enn oftar á næstu leiktíð.

Grótta er virkilega ánægt með samningana enda eru þeir mikilvægur liður í framtíðaráformum félagsins.

„Við erum mjög ánægðir að vera búnir að semja við þessa ungu stráka. Þessir strákar hafa verið viðloðandi meistaraflokkinn síðastliðinn vetur og því eðlileg þróun að þeir stígi næsta skref og verði partur af uppbyggingunni,“ sagði Róbert Gunnarsson þjálfari Gróttuliðsins.

Arnari veitt gullmerki HSÍ og silfurmerki ÍSÍ

Ársþing HSÍ fór fram miðvikudaginn 19.júní síðastliðinn í Laugardalshöll. Eins og venja ber á ársþingum þá eru reikningar og skýrsla stjórnar síðasta árs lagðir fram, stjórnarkjör fer fram og önnur mál sem fram koma í lögum sambandsins.

Gróttumaðurinn Arnar Þorkelsson hefur setið í stjórn HSÍ sem gjaldkeri undanfarin 8 ár. Hann hefur ákveðið að hætta í stjórn sambandsins og við það tilefni var honum afhent gullmerki HSÍ fyrir frábær störf fyrir handboltann í landinu. Við sama tilefni var honum einnig afhent silfurmerki ÍSÍ fyrir sín störf.

Þó að Arnar hafi byrjað ungur að æfa handbolta hjá Gróttu, þjálfað yngri flokka, setið í barna- og unglingaráði, setið í nefndum á vegum Gróttu, verið formaður Handknattleikadeildar Gróttu og setið í stjórn HSÍ í 8 ár, þá er hann engan veginn hættur. Hann hefur tekið sæti í barna- og unglingaráði Handknattleiksdeildar Gróttu.

Til hamingju Arnar !

Ungir og efnilegir skrifa undir

Grótta hefur framlengt samninga sína til tveggja ára við unga og efnilega leikmenn félagsins sem hluta af uppbyggingu félagsins. Allir leikmennirnir eru lykilleikmenn í 3.flokki og U-liði félagsins. Leikmennirnir eru Alex Kári Þórhallsson, Gísli Örn Alfreðsson, Hannes Pétur Hauksson og Sverrir Arnar Hjaltason.

* Alex Kári er 18 ára gamall. Hann örvhentur og getur bæði leikið sem skytta og hornamaður. Hann er klókur leikmaður og spilar vel upp á félaga sína í liðinu.

* Gísli Örn er 17 ára gamall og getur bæði leikið sem leikstjórnandi og skytta. Hann er góður skotmaður, fylginn sér og öflugur beggja megin vallarins.

* Hannes Pétur er 18 ára gamall og er hávaxinn markvörður. Hann hefur góðar staðsetningar, les skotin vel og hefur góða sendingagetu.

* Sverrir Arnar er 16 ára gamall og er línumaður. Hann er nautsterkur, viljugur og hefur stigið stór framfaraskref síðastliðinn vetur.

Gísli og Hannes hafa hlotið eldskírn sína í Olísdeildinni á meðan Alex og Sverrir eiga hana eftir og vonandi kemur hún á næstu misserum.

Grótta er virkilega ánægt með samningana enda eru þeir mikilvægur liður í framtíðaráformum félagsins.

„Við erum mjög ánægðir að vera búnir að semja við þessa ungu stráka. Þessir strákar hafa flestir verið viðloðandi meistaraflokkinn síðastliðinn vetur og því eðlileg þróun að þeir stígi næsta skref og verði partur af uppbyggingunni,“ sagði Róbert Gunnarsson þjálfari Gróttuliðsins.

Aufí og Rebekka á leið til Finnlands með U16 ára landsliðinu

Gróttukonurnar Arnfríður Auður Arnarsdóttir og Rebekka Sif Brynjarsdóttir eru á leið til Finnlands með U16 ára landsliðinu sem tekur þátt í Norðurlandamótinu dagana 1. til 7. júlí næstkomandi. Knattspyrnudeild Gróttu er hreykin af því að eiga svona flotta fulltrúa innan þessa hóps. Aufí og Rebekka eru báðar leikmenn meistaraflokks Gróttu og gríðarlega efnilegar knattspyrnukonur.

Ísland mætir Englandi í fyrsta leik sínum á mótinu mánudaginn 1. júlí kl. 10:00. Úrslit leiksins skera svo úr um það hvaða liði það mætir í leik tvö og þrjú.
Það verður spennandi að fylgjast með þeim í Finnlandi í júlí!

Til hamingju stelpur og gangi ykkur vel!

Elvar Otri framlengir

Leikstjórnandinn og skyttan Elvar Otri Hjálmarsson hefur framlengt samning sinn við Handknattleiksdeild Gróttu til tveggja ára. Elvar er 23 ára gamall og kom til Gróttu frá Fjölni fyrir tveimur árum síðan. Hann fór mikinn á nýafstöðu leiktímabili en þá skoraði hann 44 mörk og var öflugur í varnarleik Gróttuliðsins.

Það eru frábært tíðindi að Elvar verði áfram í Gróttu enda mikilvægur hlekkur í liðinu. Það verður gaman að sjá hann og Gróttuliðið taka næsta skref á næsta leiktímabili.